GE

,,უსაფრთხო სკოლის” ფარგლებში ქართველ მანდატურებს ამერიკელმა კოლეგებმა გამოცდილება გაუზიარეს

საქართველოს განათლებისა და მეცნიერების სამინისტროს სსიპ საგანმანათლებლო დაწესებულების მანდატურის სამსახურისა და აშშ-ს სკოლის მანდატურთა ეროვნული ასოციაციის (NASRO) წამომადგენლებმა თემაზე: „უსაფრთხო სკოლა“ ერთობლივი კონფერენცია გამართეს, რომელსაც საქართველოს განათლებისა და მეცნიერების მინისტრის მოადგილე ლია გიგაური დაესწრო.

კონფერენციაზე, რომელსაც NASRO-ს აღმასრულებელი დირექტორი ჯეიმს მორის კენედი, საგანმანათლებლო დაწესებულების მანდატურის სამსახურის უფროსი ვახტანგ მეიფარიანი და სხვა მოწვეული სტუმრები ესწრებოდნენ იმჯელეს როგორც უსაფრთხო სკოლის კონცეფციაზე, ასევე, სამართლებრივ განათლებასა და საგანმანათლებლო დაწესებულებებში ძალადობის პრევენციაზე.

როგორც განათლების სამინისტროს ოფიციალურ გვერდზეა აღნიშნული, მნიშვნელოვანია, რომ ვიზიტის ფარგლებში, საქართველოში მყოფი აშშ-ს სკოლის მანდატურთა ეროვნული ასოციაციის (NASRO) წარმომადგენელთა მხრიდან მანდატურებისათვის და მანდატურის სამსახურის თანამშრომლებისათვის სპეციალური ტრენინგები ჩატარდება, რაც, სამინისტროს ცნობით, მანდატურებს დაეხმარებათ, კიდევ უფრო ეფექტური გახადონ მუშაობა ძალადობისა და დანაშაულის აღკვეთაში, შესაბამისად, სკოლებში უსაფრთხო გარემოს განმტკიცებაში. ქართველ და ამერიკელ მანდატურებს შორის სკოლებში, მოხდება ასევე გამოცდილების გაზიარება ძალადობის წინააღმდეგ ბრძოლის, პრევენციული ღონისძიებების გატარების, მოძალადის გამოვლენისა და შესაბამისი ორგანოების დროულად ინფორმირებულობის საკითხებზე.

განათლების სამინისტროს ინფორმაციით, აშშ-ს ამერიკის სკოლის ოფიცერთა ეროვნული ასოციაცია-ნასროსთან (NASRO) მანდატურის სამსახური აქტიურად თანამშრომლობს. ასოციაცია წარმოადგენს სერთიფიცირებული სამართალდამცავი ოფიცრების, სკოლის უსაფრთხოებისა და საგანმანათლებლო პერსონალის, მათ შორის, მასწავლებლებისა და სკოლის ადმინისტრატორების უმსხვილეს სასწავლო ორგანიზაციას მსოფლიოში, რომელიც სამართლებრივ განათლებასთან დაკავშირებული ინოვაციური მიდგომების დანერგვას და სკოლის უსაფრთხოების ოფიცერთა პროგრამების პოპულარიზაციას როგორც აშშ-ში, ასევე მსოფლიოს სხვა ქვეყნებში ახორციელებს.

დასვით კითხვა და მიიღეთ პასუხი - ედუს საცნობარო სამსახური