GE
ბიძინა ივანიშვილი ამბობს, რომ განათლების რეფორმა პროფესიონალი კადრების სიმცირის პრობლემის გადაჭრისთვის დაიწყეს

საქართველოს ყოფილი პრემიერ-მინისტრი ბიძინა ივანიშვილი აცხადებს, რომ ქვეყნის მთავარი პრობლემა პროფესიონალი კადრების სიმცირეა და სწორედ მისი გადაჭრისთვის დაიწყო „ქართულმა ოცნებამ“ განათლების რეფორმა.

„ევოლუცია და არა რევოლუცია, ევოლუციურად უნდა განვითარდეს საზოგადოება და ეს პროცესი ხდება ახლა ზუსტად.. ყველა ხელმოცარული პოლიტიკაში მოდის სამწუხაროდ, ჰგონიათ ყველაზე იოლი პროფესია ესაა, მოდის და ყვირილს იწყებს. სამწუხარო რეალობაა, ჩვენ არც ერთი მიმართულებით პროფესიონალები არ გვყოფნის, ყველაზე დიდი ტრაგედია სწორედ ესაა ჩვენი. ის, რომ ჩვენ მოვახერხეთ და განათლების რეფორმაზე ამხელა ნაბიჯი გადავდგით ეს გმირობის ტოლფასია, რა თქმა უნდა, და ის გუნდმა შეძლო იმ წლების მერე რაც ხდებოდა და ჩვენ ამხელა რესურსი შესაძლებელია განათლებაზე მივმართოთ, ეს შეიძლება იყოს ხსნა ჩვენი ისტორიული წარსულისთვის და გაგვიჩნდეს რეალური, ძალიან წარმატებული მომავალი“, – განაცხადა ბიძინა ივანიშვილმა საზოგადოებრივ მაუწყებელთან ინტერვიუში.

ყოფილმა პრემიერმა და პარტია „ქართული ოცნების“ დამფუძნებელმა განაცხადა, რომ პოლიტიკიდან საბოლოოდ მიდის და საჯარო ფიგურის რანგში ეს მისი ბოლო ინტერვიუ იყო.

განათლების სფეროში ბიძინა ივანიშვილის სახელს უკავშირდება ქუთაისში საერთაშორისო უნივერსიტეტის დაარსება, რომლის მშენებლობის და აღჭურვის პროცესს ფონდი „ქართუ“ დღემდე ახორციელებს. შეცვალა თუ არა მისი გეგმები კონკრეტულად უნივერსიტეტთან დაკავშირებით, ამის შესახებ ბიძინა ივანიშვილს განცხადება არ გაუკეთებია და არც მის მიერვე გამოქვეყნებულ წერილში ყოფილა საუბარი.

დასვით კითხვა და მიიღეთ პასუხი - ედუს საცნობარო სამსახური
თამთა არის© ვირსალაძე Aris.ge-განათლების ჟურნალისტი