ყველაფერი განათლებისთვის და განათლებიდან | edu.aris.ge https://edu.aris.ge/news Mon, 10 May 2021 13:15:35 +0000 en-US hourly 1 https://wordpress.org/?v=4.9.9 ილიაუნი – პირველი ქართული ორგანიზაცია საერთაშორისო ინოვაციური ქსელის EBN-ის შემადგენლობაში https://edu.aris.ge/news/iliauni-pirveli-qartuli-organizacia-saertashoriso-inovaciuri-qselis-ebn-is-shemadgenlobashi.html https://edu.aris.ge/news/iliauni-pirveli-qartuli-organizacia-saertashoriso-inovaciuri-qselis-ebn-is-shemadgenlobashi.html#respond Mon, 10 May 2021 13:04:47 +0000 https://edu.aris.ge/news/?p=109446 ილიას სახელმწიფო უნივერსიტეტი პირველი ქართული ორგანიზაციაა, რომელიც ერთ-ერთი მსხვილი საერთაშორისო ინოვაციური ქსელის, EBN (European Business and Innovation Centre Network)-ის წევრი გახდა.

როგორც ილიას სახელმწიფო უნივერსიტეტის მმართველები აცხადებენ, ქსელის წევრობა უნივერსიტეტს შესაძლებლობას მისცემს, დახვეწოს სამეწარმეო-საგანმანათლებლო პროგრამები, შექმნას ინოვაციებზე დაფუძნებული სერტიფიცირებული საინკუბაციო პროგრამა, აკადემიური პერსონალი და სტუდენტები ჩართოს ევროპულ სამეწარმეო პროექტებში, სერტიფიცირებულ საინკუბაციო პროგრამებში გამოიყენოს კვლევის კომერციალიზაცია და საქართველო ღირსეულად წარმოადგინოს ინოვაციური ცოდნის გაზიარებისა და საერთაშორისო კოლაბორაციის მასშტაბურ ევროპულ პლატფორმაზე.

უნივერსიტეტისთვის ამ მნიშვნელოვან სიახლეზე კომენტარს ვიცე-რექტორი ნანა დიხამინჯია აკეთებს:

“რამდენიმე წელია, ილიას უნივერსიტეტი აქტიურად ზრუნავს სტუდენტებისა და პროფესორების სამეწარმეო უნარების განვითარებაზე სხვადასხვა საერთაშორისო პროექტების დახმარებით. გარდა კურიკულუმში ინტეგრირებული სამეწარმეო კურსებისა, ჩვენ ვატარებთ სტარტაპ ბანაკებს, ჰაკათონებს, სტარტაპ შეჯიბრებებს და აქსელერაციის პროგრამებს, ვთავაზობთ კვლევის კომერციალიზაციის ტრენინგებს პროფესორებსა და სტუდენტებს, ისევე როგორც დახმარებას პროდუქტის პროტოტიპის შექმნაში.

ევროპული ბიზნეს და ინოვაციური ცენტრების ქსელში გაერთიანება საშუალებას მოგვცემს, გავზარდოთ ამ პროექტების მასშტაბები, ვიპოვოთ სტრატეგიული სამეცნიერო და ინდუსტრიული პარტნიორები სხვადასხვა ქვეყნებში და მათთან თანამშრომლობით განვახორციელოთ საინტერესო პროექტები.

გარდა ამისა, ამ ქსელის წევრობით სტუდენტები და პროფესორები შეძლებენ მონაწილეობა მიიღონ არაერთ საერთაშორისო სამეწარმეო კონფერენციაზე, შეხვედრებსა და კომერციალიზაციის საგრანტო პროექტებში“, – განაცხადა ვიცე-რექტორმა ნანა დიხამინჯიამ.

EBN (European Business and Innovation Centre Network) აერთიანებს 140 EU | BIC სერტიფიცირებულ ბიზნესს, ინოვაციურ ცენტრებსა და 40 ორგანიზაციას, რომლებიც მხარს უჭერს მეწარმეების, დამწყები, მცირე და საშუალო ბიზნესის განვითარებას.

]]>
https://edu.aris.ge/news/iliauni-pirveli-qartuli-organizacia-saertashoriso-inovaciuri-qselis-ebn-is-shemadgenlobashi.html/feed 0
საკოორდინაციო საბჭო ხვალ გადაწყვეტს, გახანგრძლივდება თუ არა ქვეყანაში უქმე დღეები და მასთან დაკავშირებული შეზღუდვები https://edu.aris.ge/news/sakoordinacio-sabcho-xval-gadawyvets-gaxangrdzlivdeba-tu-ara-qveyanashi-uqme-dgeebi-da-mastan-dakavshirebuli-shezgudvebi.html https://edu.aris.ge/news/sakoordinacio-sabcho-xval-gadawyvets-gaxangrdzlivdeba-tu-ara-qveyanashi-uqme-dgeebi-da-mastan-dakavshirebuli-shezgudvebi.html#respond Mon, 10 May 2021 12:27:39 +0000 https://edu.aris.ge/news/?p=109448 უქმე დღეებისთვის განსაზღვრული პერიოდი 12 მაისს იწურება, თუმცა, არაა გამორიცხული, რომ ეს ვადა გახანგრძლივდეს და შესაბამისად, 12 მაისის შემდეგაც არ განახლდეს საზოგადოებრივი ტრანსპორტის მოძრაობა, არ იმუშაონ ბაღებმა და სკოლებმა და ასევე, არ აღადგინონ მუშაობა სხვა საჯარო დაწესებულებებმა. ყოველ შემთხვევაში, დღეს ეს კატეგორიულად არც გამოურიცხავს და არც დაუდასტურებია ეკონომიკისა და მდგრადი განვითარების მინისტრს.

ნათია თურნავას განცხადებით, ხვალ ამ საკითხზე იმსჯელებს საკოორდინაციო საბჭო და მისი დასრულების შემდეგ მიიღებს საზოგადოება პასუხს კითხვაზე – გახანგრძლივდება თუ არა ქვეყანაში უქმე დღეები და მასთან დაკავშირებული შეზღუდვები?

მინისტრის განცხადებით, უქმე დღეებისა და მასთან დაკავშირებული შეზღუდვების შენარჩუნების მიზეზი, შესაძლოა, კორონავირუსით ინფიცირების მზარდი დადებითობის მაჩვენებელი იყოს.

„ხვალ გვექნება უწყებათაშორისი საკოორდინაციო საბჭოს მორიგი სხდომა, რომელიც ეხება კოვიდს და მასთან ბრძოლას. დღემდე ვახერხებთ იმას, რომ სერიოზული შეზღუდვების გარეშე ვაკონტროლოთ სიტუაცია. მესამე ტალღაა და მას ახასიათებს დადებითობის უფრო მაღალი მაჩვენებელი. პარალელურად მთავარია, რომ წავახალისოთ ვაქცინაცია. თქვენ იცით, რომ ტურიზმის ინდუსტრია ვაქცინაციის თვალსაზრისით პრიორიტეტულია. დავიწყეთ განაცხადების მიღება. საკმაოდ კარგად მიდის პროცესი, აქტიურად ერთვებიან ტურისტული ობიექტები და მე თავადაც, ამ დღეებში, მათთან ერთად ვგეგმავ ვაქცინაციას“, – განაცხადა ნათია თურნავამ.

9 მაისის მდგომარეობით, დადებითობის დღიური მაჩვენებელი არის 5.76 %, ბოლო 14 დღის განმავლობაში – 6.03%, ხოლო 7 დღის განმავლობაში – 6.48%. კოვიდინფიცირების დღიური დადებითობის მაჩვენებლის კრიტიკულ ზღვრად 4% მიიჩნევა.

ამ დროისთვის საქართველოში კორონავირუსის 322 468 შემთხვევაა დადასტურებული. მათ შორის გამოჯანმრთელდა 302 428, გარდაიცვალა 4 305 პაციენტი.

4 მაისიდან 11 მაისის ჩათვლით, საქართველოში უქმე დღეებია გამოცხადებული. საკოორდინაციო საბჭომ 4-11 მაისი უქმე დღეებად 9 აპრილს გამოაცხადა. ამასთან, საბჭომ დამსაქმებლებს თანამშრომელთა დისტანციურ რეჟიმში გადაყვანის რეკომენდაციით მიმართა. მოგვიანებით, 16 აპრილს, ეკონომიკის და გარემოს დაცვისა და სოფლის მეურნეობის მინისტრების ერთობლივი ბრძანებით, იმ მეწარმე-სუბიექტებისა და საქმიანობების ჩამონათვალი განისაზღვრა, რომლებზეც უქმე დღეების შესახებ მთავრობის დადგენილება არ ვრცელდება.

წყარო: tv imedi

]]>
https://edu.aris.ge/news/sakoordinacio-sabcho-xval-gadawyvets-gaxangrdzlivdeba-tu-ara-qveyanashi-uqme-dgeebi-da-mastan-dakavshirebuli-shezgudvebi.html/feed 0
„გაკვეთილები რა ხარისხით ტარდება არავინ ამოწმებს, სკოლის დირექტორი უნდა იყოს ანგარიშვალდებული საზოგადოების წინაშე“ https://edu.aris.ge/news/gakvetilebi-ra-xarisxit-tardeba-aravin-amowmebs-skolis-direqtori-unda-iyos-angarishvaldebuli-sazogadoebis-winashe.html https://edu.aris.ge/news/gakvetilebi-ra-xarisxit-tardeba-aravin-amowmebs-skolis-direqtori-unda-iyos-angarishvaldebuli-sazogadoebis-winashe.html#respond Mon, 10 May 2021 11:14:30 +0000 https://edu.aris.ge/news/?p=109433 განათლების ექსპერტ პაატა პაპავას განცხადებით, PISA-ს კვლევაში საქართველოს არასახარბიელო შედეგები მრავალი მიზეზითაა განპირობებეული, მათ შორის, სკოლამდელი განათლების სისტემისა და სოციალურ-ეკონომიკური ფაქტორებითაც.

ექსპერტი ამბობს, რომ ქვეყნის მხრიდან კარგი გადაწყვეტილება იყო ამ კვლევაში ჩართვა, რათა წლიდან წლამდე შევადაროთ ჩვენი განათლების სისტემა არა მარტო სხვა ქვეყნებს, არამედ საკუთარ მიღწევებსაც, თუმცა დასძენს, რომ არაფერი საიმედო საქართველოს შედეგებში არ არის.

„საქართველომ სწორი გადაწყვეტილება მიიღო, რომ ჩაერთო ამ კვლევაში, რამდენიმე მცდელობის მიუხედავად, რაც პოლიტიკური ნიშნით იყო განპირობებული, იყო მცდელობა რომ დაგვეტოვებინა, მაგრამ საბედნიეროდ, დავრჩით ამ კვლევაში, რაც საშუალებას გვაძლევს შევადაროთ მონაცემები არა მარტო სხვა ქვეყნებს, არამედ საკუთარ მიღწევებს წინა წლებთან. თუმცა არაფერი საიმედო ჩვენს შედეგებში არ არის. ეს კვლევა იმისთვის დაიწყეს, რომ სხვადასხვა ქვეყნის მაგალითზე გამოეყოთ კრიტიკული ფაქტორები და დაეჭირათ ოქროს გასაღები, რომლებსაც სხვადასხვა განათლების სისტემას ასე რეცეპტივით მისცემდნენ“, – განაცხადა პაატა პაპავამ.

მისივე თქმით, სკოლამდელი განათლების სისტემა თავიდან დასალაგებელია.

„ერთ-ერთი კრიტიკული ფაქტორი, რაც ჩვენს შემთხვევაში ნათლად ჩანს, ეს არის სკოლამდელი განათლების პრობლემები. ეს სფერო დიდი ხნის განმავლობაში არ იყო ნაპატრონები. სკოლამდელი განათლება არის ერთ-ერთი ოქროს გასაღები. რაც სკოლამდე ხდება, სახლში პირველ რიგში და შემდეგ სკოლამდელ დაწესებულებაში, აი ეს ორი ფაქტორი არის უფრო კრიტიკული, ვიდრე სხვა ფაქტორები. სტანდარტები მნიშვნელოვანია და ეს არის სისტემა, რომელიც თავიდან არის დასალაგებელი, კადრები მოსამზადებელია“, – განაცხადა პაატა პაპავამ.

რაც შეეხება სოციალურ-ეკონომიკური ფაქტორების გავლენას პიზას კვლევაში მიღწეულ შედეგებზე, ექსპერტის თქმით, ოჯახის სოციალური სტატუსი ძალიან მნიშვნელოვანია, რადგან განათლებას აქვს თავისი ღირებულება.

„ჩვენ უნდა ვაღიაროთ, რომ ოჯახის სოციალური სტატუსი ბავშვის განათლების ძალიან მნიშვნელოვანი ფაქტორია. ეკონომიკურ ჭრილში თუ შევხედავთ, განათლებას აქვს თავისი ღირებულება. სკოლის შერჩევისას, ოჯახი არჩევს არამხოლოდ სწავლას და განათლებას, როგორც სერვისს, არამედ ის ასევე იძენს ბავშვისთვის სოციო-ეკონომიკურ სტატუსს, რადგან სკოლის ერთ-ერთი მთავარი ფუნქცია სწორედ სოციალიზაციაა და არა მხოლოდ მათემატიკის სწავლა. ყველაფერი კი საბოლოოდ ლიდერობამდე დაიყვანება, ამიტომ პასუხი უნდა მოვთხოვოთ ყველას. განათლების სისტემას სჭირდება ისეთი ლიდერები, რომლებიც მოიზიდავენ მეტ თანხას და მერე უკვე ვიმსჯელოთ, როგორ ავაწყოთ სკოლამდელი განათლება და ა.შ.“, – განაცხადა პაატა პაპავამ.

ექსპერტი მიიჩნევს, რომ უნდა გაიზარდოს სკოლის დირექტორებისა და მასწავლებლების ანგარიშვალდებულება საზოგადოების წინაშე და ასევე, უნდა შეიქმნას გარე შემოწმების მექანიზმი.

„პირველი, რასაც უნდა ვაძლიერებდეთ, ესაა ანგარიშვალდებულება. დღეს სკოლის დირექტორი და მასწავლებლები არ არიან ანგარიშვალდებული ფაქტობრივად არავის მიმართ. მართალია, ხარისხის მართვის სისტემა არსებობს, მაგრამ უნდა არსებობდეს მექანიზმი, რომელიც ჩაიბარებს ანგარიშს. წარმოიდგინეთ, ხართ სკოლის დირექტორი, ერთადერთი რაც მოგეთხოვებათ – გაკვეთილები ჩაატაროთ. ეს გაკვეთილები რა ხარისხით ტარდება არავინ ამოწმებს. თქვენ ეფექტურობაზე და ზეგავლენის შექმნაზე ვალდებული არ ხართ. სკოლის დირექტორი უნდა იყოს საზოგადოების წინაშე ანგარიშვალდებული, ამას უნდა დაემატოს გარე შემოწმება“, – განაცხადა პაატა პაპავამ.

PISA-ს ბოლო კვლევის მიხედვით, საქართველოს შედეგები 2015 წლის შედეგებთან შედარებით ყველა ნაწილში – მათემატიკა, საბუნებისმეტყველო საგნები და წიგნიერება, გაუარესებულია.
როგორც კვლევიდან ირკვევა, სამივე მიმართულებაში საქართველო მოსწავლეთა შედეგებით მონაწილე ქვეყნებს შორის ბოლო პოზიციებს იკავებს. თუმცა, როგორც კვლევაშია აღნიშნული, გარდა სხვა გარემო ფაქტორებისა, PISA-ს ყველა ციკლის შედეგები ცხადყოფს, რომ ყველა მონაწილე ქვეყანაში მოსწავლეთა სოციალურ-ეკონომიკური სტატუსი მათ მიღწევებზე მნიშვნელოვან გავლენას ახდენს.

“PISA 2018-ის მონაცემების თანახმად, საქართველოში, კითხვაში, დაბალი სოციალურ-ეკონომიკური სტატუსის მქონე მოსწავლეების მიღწევების საშუალო 68 ქულით ნაკლებია მაღალი სოციალურ-ეკონომიკური სტატუსის მქონე მოსწავლეებისაზე”, – აღნიშნულია კვლევაში.

შეგახსენებთ, რომ მოსწავლეთა შეფასების საერთაშორისო პროგრამა (PISA) ციკლური ხასიათის საერთაშორისო კვლევაა, რომელიც 2000 წლიდან სამ წელიწადში ერთხელ ტარდება. კვლევას ატარებს ეკონომიკური თანამშრომლობისა და განვითარების ორგანიზაცია (OECD) და მასში მონაწილეობენ ორგანიზაციის წევრი და პარტნიორი ქვეყნები. საქართველო PISA-ში 2009 წლიდან მონაწილეობს.

PISA-ს ფარგლებში ფასდება მოსწავლეთა კომპეტენციები კითხვის, მათემატიკისა და საბუნებისმეტყველო მეცნიერებების სფეროებში. PISA 2018-ის ციკლში (ისევე, როგორც 2000 და 2009 წლებში) წამყვან სფეროს კითხვა წარმოადგენდა. მასში 79 ქვეყნისა და ეკონომიკის დაახლოებით 600 000-მა 15 წლის ასაკის მოსწავლემ მიიღო მონაწილეობა. ისინი მოსწავლეთა 32-მილიონიან პოპულაციას წარმოადგენდნენ.

PISA 2018-ში მონაწილეობა მიიღო საქართველოს 326 სკოლის 5 572 მოსწავლემ.

საქართველოს მოსწავლეთა მიღწევები კითხვასა და საბუნებისმეტყველო მეცნიერებებში მნიშვნელოვნად გაუარესებულია – PISA-ს ანგარიში

ფინანსური განათლების კუთხით საქართველოში მოსწავლეთა 49,8%-ს გარკვეული დახმარება სჭირდება – PISA-ს კვლევა

]]>
https://edu.aris.ge/news/gakvetilebi-ra-xarisxit-tardeba-aravin-amowmebs-skolis-direqtori-unda-iyos-angarishvaldebuli-sazogadoebis-winashe.html/feed 0
საქართველოში მოსწავლეთა 20% გადაჭარბებული აზარტული მოთამაშეა https://edu.aris.ge/news/saqartveloshi-moswavleta-20-gadacharbebuli-azartuli-motamashea.html https://edu.aris.ge/news/saqartveloshi-moswavleta-20-gadacharbebuli-azartuli-motamashea.html#respond Mon, 10 May 2021 06:53:41 +0000 https://edu.aris.ge/news/?p=109412 დაავადებათა კონტროლის ეროვნული ცენტრის მონაცემებით, საქართველოში თამაშდამოკიდებული მოზარდების სტატისტიკა საგანგაშოა.

ქართველ მოსწავლეთა 20 პროცენტი (ბიჭების – 28% და გოგონების – 5%) გადაჭარბებული აზარტული, ხოლო 12 პროცენტი (ბიჭების -15 % და გოგონების -5%) პრობლემური აზარტული მოთამაშეა.

7 პროცენტი თამაშობს ინტერნეტით, 21 პროცენტი კი, ინტერნეტის გარეშე.

მოსწავლეთა 8 პროცენტი (ბიჭების – 11%, გოგონების – 6%) თამაშობს კარტით ან კამათლებით; 6 პროცენტი (ბიჭების – 10% და გოგონების – 2%) ინტერნეტით დებს ფსონს სპორტზე ან ცხოველებზე; 5 პროცენტი (ბიჭები 9% და გოგონები 1%) თამაშობს სათამაშო ავტომატებით; 3 პროცენტი (ბიჭები 6% და გოგონები 1%) თამაშობს ლატარიას;

საგანგაშოა სუიციდის შემთხვევებიც. არაოფიციალური მონაცემებით, ბოლო ერთი წლის განმავლობაში აზარტულ თამაშებს 100 მეტი ადამიანის სიცოცხლე შეეწირა, ბოლო ერთ თვეში – 7 ადამიანი.

წყარო: tv imedi

]]>
https://edu.aris.ge/news/saqartveloshi-moswavleta-20-gadacharbebuli-azartuli-motamashea.html/feed 0
ზუგდიდისა და ჩხოროწყუს მასწავლებლებს ვაქცინაცია ჩაუტარდათ https://edu.aris.ge/news/zugdidisa-da-chxorowyus-maswavleblebs-vaqcinacia-chautardat.html https://edu.aris.ge/news/zugdidisa-da-chxorowyus-maswavleblebs-vaqcinacia-chautardat.html#respond Mon, 10 May 2021 06:38:20 +0000 https://edu.aris.ge/news/?p=109409 განათლების სამინისტროს მიერ გავრცელებული ინფორმაციით, მასწავლებელთა და სკოლის პერსონალის ნებაყოფლობითი იმუნიზაციის პროცესი მთელი ქვეყნის მასშტაბით აქტიურად გრძელდება. ამჯერად ზუგდიდის ევექსის რეფერალურ ჰოსპიტალში ზუგდიდისა და ჩხოროწყუს პედაგოგები აიცრნენ.

13 მაისს მოსწავლეები სასწავლო პროცესს საკლასო ოთახებში დაუბრუნდებიან. შესაბამისად, მნიშვნელოვანია მოსწავლეებისა და მასწავლებლებისა და სკოლის პერსონალისთვის უსაფრთხო გარემოს დახვედრება.

სამინისტროს თქმით, მასწავლებლების იმუნიზაციას განსაკუთრებული მნიშვნელობა აქვს, ვინაიდან მათ დღის განმავლობაში უამრავ მოზარდთან და სასკოლო საზოგადოების სხვა წევრებთან აქვთ შეხება. საჯარო ვაქცინაციით ისინი კოლეგებს მოუწოდებენ, გამოიჩინონ საზოგადოებრივი პასუხისმგებლობა და იმუნიზაციის გზით ხელი შეუწყონ მიმდინარე სემესტრის ბუნებრივ გარემოში – საკლასო ოთახში დასრულებას.

“თუ არ მოხდა მოსახლეობის მასობრივი აცრა, შეუძლებელი იქნება კოვიდეპიდემიის დამარცხება. გავუფრთხილდეთ საკუთარ თავს, სხვას და ამით შევიყვარებთ ერთმანეთს, გადავარჩენთ ქვეყანას კოვიდეპიდემიისაგან. მოგიწოდებთ ყველას, რომ ჩავიტაროთ ვაქცინაცია”, – ამბობს დიმონ არახამია, ჩხოროწყუს მუნიციპალიტეტის კირცხის თემის N1 საჯარო სკოლის დირექტორი.

აცრის შემდეგ კომენტარს აკეთებს ზუგდიდის მე-10 საჯარო სკოლის მასწავლებელი: “ნორმალურად ვგრძნობ თავს, მჯერა, რომ ეპიდემიას ვერ დავამარცხებთ ვაქცინაციის გარეშე. გავუფრთხილდეთ უნდა ერთმანეთს, გავიკეთოთ ვაქცინაცია”, – ამბობს ნანა შამუგია.

მასწავლებელთა და სკოლის პერსონალთა ვაქცინაცია ნებაყოფლობითია. მსურველები ინდივიდუალურად რეგისტრირდებიან ჯანდაცვის სამინისტროს პორტალზე, საჭიროების შემთხვევაში კი მათ დახმარებას სკოლის ადმინისტრაცია უწევს.

]]>
https://edu.aris.ge/news/zugdidisa-da-chxorowyus-maswavleblebs-vaqcinacia-chautardat.html/feed 0
„ჩემი შვილი ნახევრად ინგლისურად მელაპარაკება“ – ურჩევნიათ თუ არა ქართველ მოზარდებს უცხო ენა მშობლიურს? https://edu.aris.ge/news/chemi-shvili-naxevrad-inglisurad-melaparakeba-urchevniat-tu-ara-qartvel-mozardebs-ucxo-ena-mshobliurs.html https://edu.aris.ge/news/chemi-shvili-naxevrad-inglisurad-melaparakeba-urchevniat-tu-ara-qartvel-mozardebs-ucxo-ena-mshobliurs.html#respond Mon, 10 May 2021 06:00:51 +0000 https://edu.aris.ge/news/?p=108815 ენების ცოდნა სასარგებლო რამ არის, კარგია ტვინის, აზროვნების განვითარებისთვის. მაგალითად, ორ და მრავალენოვანი ადამიანების შემთხვევაში, როგორც წესი, ტვინის მაკონტროლებელი მექანიზმები უფრო მობილიზებულია, აზროვნების ტემპი უფრო მაღალი და მოქნილია, ასაკში ასეთი ადამიანები ნაკლებად ავლენენ შესუსტებას კოგნიტური უნარების თვალსაზრისით და ა.შ. რომ აღარაფერი ვთქვათ მეტ კონკურენტუნარიანობაზე შრომის ბაზარზე, ან მეტ შესაძლებლობაზე სხვა კულტურების შესაცნობად. და საერთოდ, რამდენი ენაც იცი, იმდენი ადამიანი ხარო, არაერთხელ გვსმენია.

თუმცა, მიუხედავად ამისა, არაერთგვაროვანია დამოკიდებულება თანამედროვე ბავშვებში უცხო ენებისადმი გაზრდილ ლტოლვასთან დაკავშირებით. მშობლების მცირე ნაწილი თუ თავს იმით იწონებს, რომ მათმა შვილმა ქართულთან შედარებით უკეთ იცის ინგლისური, მეორე მხრივ, ხშირად მოისმენთ მშობლებისა და მასწავლებლების მხრიდან წუხილითა და დანანებით ნათქვამ სიტყვებსაც, რომ „ახლანდელ მოზარდებს“ მშობლიურ ენაზე ლაპარაკი, წერა, სწავლა, აზროვნება უჭირთ, ეზარებათ, ან სულაც – „უტყდებათ“. ინგლისურად კი პირიქით, თავისუფლებას გრძნობენ.

რა ხდება სინამდვილეში? თავდაპირველი რეაქცია, თაობის ინგლისურით გატაცების შესახებ, აბსოლუტური აღფრთოვანება და სიამაყე იყო. მაგრამ საამაყო ნამდვილად არის? ან როგორ და რატომ იქცა უცხო, საერთაშორისო ენის სრულყოფილად ფლობა პრობლემად? ან საერთოდ, არის თუ არა ეს პრობლემა და რა სახის სირთულეებს შეიძლება ვეჯახებოდეთ? როდის გვაქვს საქმე პრობლემასთან და როდის არცთუ სასურველ, მაგრამ მაინც იმ რეალობასთან, რომელიც უნდა მივიღოთ და რომელსაც უნდა მოვერგოთ?

ამ თემაზე რამდენიმე მშობელს ვესაუბრეთ. თითოეული ძალიან ღელავს, რომ შესაძლოა, მათ შვილებს გაუცხოება ჰქონდეთ მშობლიურ ენასთან და ამან პრობლემებიც შექმნას მათი სოციალიზაციის ან აკადემიური მოსწრების თვალსაზრისით.

ნანა, მშობელი: “ჩემი შვილი ნახევრად ინგლისურად მელაპარაკება, ბევრად დიდი ლექსიკონი აქვს ქართულთან შედარებით და ამაზე ძალიან ვბრაზობ. ქართულად როცა წერს თემებს, ვამჩნევ, რომ ინგლისურად აქვს თავში მოფიქრებული და მერე თარგმნის ქართულად. ერთმანეთში ეს თაობა სულ ინგლისურად საუბრობს და ესეც ხელს უწყობს ქართულთან გაუცხოებას. რა თქმა უნდა, მივესალმები ენების ცოდნას – რაც მეტი, მით უკეთესი (ნეტა მეც მესწავლა მეტი ენა). უბრალოდ, ზედმეტად მოიცვა ინგლისურმა ეს „ჯენ ზ“ თაობა (90-იანი წლებიდან 2010-იანი წლების ბოლომდე შუალედში დაბადებულთა თაობა – ავტ.). არ ვიცი, ეს ასაკის ამბავია, თუ რა მჭირს, მაგრამ მინდა, რომ გავუფრთხილდეთ ქართულს. პატარების თაობაშიც მინდა, რომ ახსოვდეთ, “ვისი გორისანი არიან“ და პატივს სცემდნენ ამას”.

შვილის დასწავლის უნარ-ჩვევებზე ღელავს მეორე მშობელი, რომლის გოგონაც 11 წლისაა.

ეთო, მშობელი: “მგონია, რომ ყველა რესურსი ამოვწურე. ჩემი 11 წლის შვილი ინგლისურის და გერმანული ენის გარდა, დამოუკიდებლად ვერცერთ საგანს ვერ ამზადებს. უჭირს წაკითხულიდან შინაარსის გამოტანა, კითხვებზე არგუმენტირებული პასუხის გაცემა. ინგლისურ ენაზე მსგავსი პრობლემები არ აქვს. ეს მხოლოდ ქართულ ენაზე ვლინდება. მე ვუკითხავ, აბზაც-აბზაც ვაწვდი ინფორმაციას და შემდეგ ვეკითხები, რა დარჩა იქიდან. ვაყურებინებ დამატებით მასალას და ვაივაგლახით ვსწავლობთ. სასოწარკვეთილებისგან რა გავაკეთო, მართლა აღარ ვიცი”.

კიდევ ერთი მშობელი, 12 წლის სანდროს დედა, აცნობიერებს, რომ ეს დროის მიერ მოტანილი და თითქმის მთელი თაობისთვის დამახასიათებელი მოვლენაა, თუმცა ეს მდგომარეობას დიდად სანუგეშოდ ვერ ცვლის.

სოფო, მშობელი: “ეს ამ თაობის უდიდესი პრობლემაა. მიზეზებს რა გამოლევს: გაძლიერებულად უცხო ენების სწავლა, რასაც მოსდევს უცხო ენაზე აზროვნება; ინტერნეტი და მასში არსებული ზღვა ინფორმაცია; გაჯეტები, რომლებმაც წიგნი ჩაანაცვლეს და ბავშვებს ფანტაზიის უნარი დაუქვეითეს, ახლა კიდევ ონლაინ სკოლა. ჩემი უფროსი 13 წლის ხდება და რომ ვუსმენ, თავის მეგობრებთან ქართულად არ ლაპარაკობს, ძირითადად ინგლისურად. სასაუბრო თემები მეტწილად კომპიუტერული თამაშები, გრაფიკული პროგრამებია, მაგრამ შემდეგ სხვა ყოველდღიურ თემებზეც ინგლისურად გადადიან. თავიდან ძალიან გავაპროტესტე, მაგრამ მერე მივხვდი, რომ ეს მისი ახირება არ იყო და ყველა მეგობარი სიამოვნებით აკეთებდა ამას, ამიტომ შევეშვი. ეს პრობლემა მასწავლებლებმაც კარგად იციან. ისინიც ადასტურებენ, რომ უმრავლესობა იგივე პრობლემის წინაშე დგას. თუმცა ეს ჩვენს მდგომარეობას არ ცვლის და პრობლემა პრობლემად რჩება”.

რამდენად მასშტაბურია ეს პრობლემა და ხომ არ ვაზვიადებთ საკუთარ გამოცდილებასა და შფოთვებს? ამ კითხვებით მასწავლებლებსაც მივმართეთ.

ნინო დათაშვილი, ქართული ენის, ლიტერატურისა და სამოქალაქო განათლების მასწავლებელი:

– როგორც მასწავლებელს, მიწევს იმ ბავშვებთან ურთიერთობა, რომლებიც მშობლიურ ენაზე ასაკის შესაბამისად კარგად ვერ მეტყველებენ. ჩემი მოსწავლეები ხშირად ინგლისურად მელაპარაკებიან, როცა ქართულად ვერ გადმოსცემენ აზრს.

– როგორ ფიქრობთ, რა არის ამის მიზეზი, თქვენი გადმოსახედიდან?

– მშობელთა უმრავლესობა დაკავებულია და სკოლამდელი ასაკის ბავშვთა უმრავლესობა მიჯაჭვულია ინფორმაციულ ტექნოლოგიებს: მობილური, ტელევიზორი, კომპიუტერი, საიდანაც ესმით უცხოენოვანი კონტენტი, ბავშვი ვერ ასწრებს ერთ ენაზე ამეტყველებას, ისე შემოდის სხვა ენები. მოსწავლეებმაც გარკვეული ტერმინოლოგია, ენობრივი კონსტრუქტები ინგლისურად იციან და ამიტომაც, ამავე ენაზე მეტყველება და ერთმანეთთან კომუნიკაციაც მათთვის ბევრად კომფორტულია, ვიდრე ქართულად საუბარი.

– რა რისკები შეიძლება არსებობდეს და სად გვჭირდება ყურადღება მსგავს შემთხვევებში?

– მშობლებს ხშირად არასწორად ჰგონიათ, რომ მათი შვილი ბილინგვია, მაგრამ სინამდვილეში მას ენები აქვს შერეული. ბილინგვები გამართულად საუბრობენ ორ ენაზე, იციან ორივე ენის სტრუქტურა და ა. შ.

სხვადასხვა ენის აღრევა იწვევს ბავშვის დაბნევას. ვინაიდან ენა და აზროვნება ერთმანეთთან პირდაპირ დაკავშირებულია, ეს მოქმედებს ბავშვის კოგნიტურ უნარებზე. არის შემთხვევები, ასეთ ბავშვებს ხშირად უჭირთ მეტყველება (სიტყვების სწორად წარმოთქმა), აქვთ ემოციური, ქცევითი და სოციალიზაციის სირთულეები. ეს აღრევა აქვეითებს ხანდახან დასწავლის უნარს, აფერხებს გონებრივ და მენტალურ განვითარებას, რადგან ენობრივი განვითარება პირდაპირ კავშირშია კოგნიტურ განვითარებასთან.

სამწუხაროდ, ბოლო წლებში საკმაოდ იმატა ბავშვებში ენების აღრევის შემთხვევებმა. თუმცა, უნდა აღინიშნოს, რომ როდესაც პრობლემა ჩნდება, პატარა ასაკში, სპეციალისტების ჩართულობით, ენობრივი სირთულეების გამოსწორება ბევრად ადვილია და სწრაფად ხდება, ვიდრე მოგვიანებით“, – აღნიშნავს მასწავლებელი.

კლინიკური შემთხვევა ადრეულ ასაკში დროულ აღმოჩენას, სპეციალისტის ჩართულობასა და ინდივიდუალურ მიდგომას საჭიროებს. თუმცა, მოზრდილი ბავშვების ყოველდღიურობას რომ დავუბრუნდეთ, მართლაც ხშირად შეამჩნევთ გარშემო, როცა მშობლები რამე სახალისო ისტორიას ჰყვებიან მცირეწლოვან შვილებზე, რომელიც მათთან დიალოგს მოიცავს, ეს დიალოგი ინგლისურენოვანია ხოლმე. ალბათ, თავადაც გამხდარხართ მოწმე, როცა ეთნიკურად ქართველი ბავშვები ინგლისურად საუბრობენ ერთმანეთთან ან მშობლებთან. ისეთი მაგალითებიც გექნებათ, როცა მშობელი შვილის ინგლისურის ცოდნას ვერ ეწევა და თავადაც სჭირდება მეცადინეობა იმისთვის, რომ შვილთან აქტიური და ჯანსაღი კომუნიკაცია შეინარჩუნოს. გარდა იმისა, რომ ცალკეულ ბავშვებს ან მეტიც, მთლიანად თაობას, მიეწერება სიზარმაცე, ინდიფერენტულობა და ქართულთან გაუცხოება, არცთუ იშვიათია, როდესაც მშობლები მასწავლებლებს, ხან კი პირიქით, მასწავლებლები მშობლებს ადანაშაულებენ.

ცხადია, გასაუბრება მოზარდებთანაც ვცადეთ. ჩვენს თემაზე მათეული ხედვა და ინტერპრეტაცია, ვფიქრობთ, ყველაზე ანგარიშგასაწევი უნდა იყოს. 12 წლის კესო გულახდილად, ლაკონიურად და ამომწურავად გვპასუხობს:

კესო: „ის, რომ ხშირად ინგლისურს ვიყენებთ სალაპარაკოდ, ეგ სიმართლეა. მაგრამ, პირადად მე, მარტო იმათთან ვლაპარაკობ ინგლისურად, ვისთანაც ახლოს ვარ და კარგად ვიცნობ, ვისაც თვითონაც ასე ურჩევნია, ან თუ უცხოელია. მე ყველაფერს ინგლისურად ვუყურებ (რადგან ქართულად ჩემთვის მოსაწონებელი ვიდეოები, რაღაც.. ვერ მიპოვია), რაც მაინტერესებს, ქართულად ან ვერ ვპოულობ, ან სულ არ არის. მაგრამ ამის გამო, ხანდახან გამოდის, რომ ინგლისურში უფრო დიდი მარაგი მაქვს სიტყვების და რაღაცის ახსნა ინგლისურად მირჩევნია“, – ამბობს კესო.

– გსაყვედურობენ ამის გამო?

– ხანდახან დედაჩემი მსაყვედურობს, როდესაც ქართულის თემას ვწერ და ნორმალურ სიტყვებს ვერ ვპოულობ, რომ კარგად დავწერო. მაგრამ ინგლისურად როდესაც ვწერ, უფრო კარგად გამომდის, სამწუხაროდ.

– „სამწუხაროდო“, რომ ამბობთ, რატომ გგონიათ, რომ ინგლისურის უკეთესად ცოდნა სამწუხაროა?

– არ ვამბობ რომ ეგ ცუდი რამეა, ან მაინცდამაინც ქართული უნდა იცოდე ყველაზე კარგად და რაღაც. ეს უბრალოდ… იმხელა ისტორია აქვს ამ ენას და ა.შ, მაინც არ მინდა ისე გამოვიდეს, რომ წლები იბრძოლეს ამ ენის გამო და მე ინგლისური უფრო კარგად ვიცი. ეს არის ჩემი აზრი, ჩემი სურვილი, ჩემი საკუთარი თავის მიმართ და არა სხვების მიმართ, – გვეუბნება მოზარდი.

დიდიან-პატარიანად და სტატუსის მიუხედავად, ყველა ვთანხმდებით, რომ ენების ცოდნა მხოლოდ ღირსებას მატებს ადამიანს. საკითხი ასე დგას, როდის და როგორ სჯობს ისწავლოს უცხო ენა ბავშვმა.

ამასთან დაკავშირებით, უახლეს კვლევებზე დაყრდნობით, მეცნიერები გვირჩევენ, რომ ბავშვებს ინდივიდუალურად უნდა მივუდგეთ, კონტექსტის გათვალისწინებით მივიღოთ გადაწყვეტილებები. თუმცა, რაც ყველასთვის გასათვალისწინებელი უნდა იყოს, ისაა, რომ ერთმნიშვნელოვნად ბავშვის ინტერესებშია, იმ პერიოდში შემოვიდეს უცხო ენა მის ცხოვრებაში, როდესაც მშობლიურ ენას უკვე საკმარისად ფლობს და ადეკვატურად შეუძლია ერთ ენაზე კომუნიკაცია. ასეთი ასაკი, საშუალოდ, 5 წელია ტიპური განვითარების ბავშვებში. მნიშვნელოვანია ისიც, რომ უცხო ენის სწავლებას თამაშზე დაფუძნებული სახე ჰქონდეს და არა რუტინული მეცადინეობის.

ორენოვანი ოჯახების შემთხვევაშიც სასურველია, რომ არა მაინც და მაინც ერთ ენაზე ესაუბრონ, არამედ მშობლებმა თავად არ აურიონ ენები ერთმანეთში და იმ ენაზე იქონიონ კომუნიკაცია ბავშვთან, რომელსაც თავად უკეთესად ფლობენ.

მიუხედავად იმისა, რომ მეტყველების განვითარება უმნიშვნელოვანესია ბავშვის განვითარების გზაზე, უნდა გვახსოვდეს, რომ კიდევ უფრო მნიშვნელოვანია კომუნიკაცია, გარემოსთან ურთიერთქმედება, რომლის ერთადერთი გზა მეტყველება არ არის. კომუნიკაცია და გზა, ენა, რომლითაც ბავშვისთვის კომუნიკაცია უფრო კომფორტული და მისაღებია, თანამედროვე კვლევებით, უპირატესია.

ამიტომაცაა, რომ არასასურველია გაჯეტების ჭარბი მოხმარება, მით უმეტეს უცხოენოვანი მასალით, ადრეულ ასაკში, რადგან აქ არ ხდება ორმხრივი, ცოცხალი კომუნიკაცია, რაც, როგორც აღვნიშნეთ, ყველაზე მნიშვნელოვანია.

და მაინც, გასაგებია, რას ვითვალისწინებთ სკოლამდელი ასაკის ბავშვებში. მაგრამ რა გზას ვირჩევთ მოზარდებთან, რომლებიც, ამა თუ იმ ობიექტური და სუბიექტური მიზეზით, მათ ცხოვრებაში შემოჭრილი ინტერნეტის, გაჯეტების, ქართულენოვანი რესურსების სიმწირის გამო, გლობალიზაციის პროცესებისა და ახლა უკვე პანდემიის ხელშეწყობითაც, უკვე იმდენად გაიწაფნენ უცხო ენაზე, რომ მშობლიურმა ენამ უკანა ფლანგზე გადაიწია?

EDU.ARIS.GE-ს ამ კითხვაზე ნეიროფსიქოლოგი, სპეციალური საჭიროების მქონე პირთა განათლების ფილოსოფიის მაგისტრი, ნინო მარგველაშვილი პასუხობს:

– პატივი უნდა ვცეთ ჩვენი შვილების არჩევანს, მოიძიონ/ მიიღონ ინფორმაცია და ისაუბრონ მეგობრებთან მათთვის სასურველ ენაზე. მიუხედავად იმისა, რომ ჩვენთვის ეს შეიძლება არც ისეთი სასიამოვნო იყოს. ამასთანავე, მშობლებმა დრო უნდა დავუთმოთ, გავიაზროთ, რა არის ამ ეტაპზე ოჯახის ღირებულებები (მაგ. ქართული ენის და წინაპრების პატივისცემა), რატომ არის ეს მნიშვნელოვანი და როგორ შეიძლება ამ ღირებულებების დანერგვა და გაღვივება თანმიმდევრულად. შვილებთან ამის გაზიარება, მათი აზრის მოსმენა და ერთობლივად ამ ღირებულებებზე მუშაობა, იმ კონფლიქტებისგან თავის არიდებაში დაგვეხმარება, რასაც მშობელი და შვილი შეიძლება ყოველდღიურად, სიტუაციურად აწყდებოდეს ერთმანეთისთვის შენიშვნის მიცემით, უხეში კომენტარების გაკეთებით, იმედგაცრუების განცდებით. შვილებისთვის შეკითხვების დასმით და მათი გადაწყვეტილებების მიღმა არსებული მიზეზების გაგებით, მშობელს უფრო მეტი შესაძლებლობა აქვს, დაეხმაროს შვილს, თუ მას კონკრეტული საჭიროება აქვს, მაგ. სკოლაში ქართული ენის სწავლისას, ან საუკეთესო შემთხვევაში, იგრძნოს შვება და შვილის ეს ნაბიჯი ახლებურად დაინახოს, – ამბობს ნეიროფსიქოლოგი.

EDU.ARIS.GE-სთან საუბრობს ფსიქოლოგი თამარ ისაკაძეც, მულტიდისციპლინარული გუნდის კოორდინატორი:

– უნდა ვაღიაროთ, რომ ქართულ ენაზე მოზარდებს მათთვის საინტერესო თემებზე მართლა არ აქვთ წვდომა. აქ დიდი მნიშვნელობა აქვს ქართულის მასწავლებლების მხრიდან დახმარებასაც.

მე რომ ვიყავი მე-3 კლასში, ძალიან მიყვარდა წერა, კითხვა. ჩემი შვილი კიდევ ზის და იუთუბზე უყურებს ვიღაცების ვლოგებს. რომ ვუსმენ, უცხოპლანეტელი მგონია ხანდახან. მასაც და მის მეგობრებსაც აქვთ ის ინტერესები და ერკვევიან ისეთ სფეროებში, რაც ჩვენი თაობისთვის უცხო ხილია. მეც ვბრაზდები რომ წიგნებს არ კითხულობს, მაგრამ მგონია, რომ უბრალოდ დრომ მოიტანა და სჯობს, დავაცადო. მგონია, რომ ეს ნორმაა და საგანგაშო არაფერია. უბრალოდ, თუ ეს იმდენად ხანგრძლივია, რომ ბავშვი წყდება უკვე სხვა საქმეებს, მაგალითად, აღარც ჭამს, ნამდვილ ურთიერთობებზე უარს ამბობს და ა.შ. და ეს ხელს უშლის გარემოსთან ადაპტაციაში, უკვე სირთულესთან გვაქვს საქმე და უკვე საჭიროებს ჩვენს ჩარევას. როგორც ნებისმიერ სხვა რამეზე დამოკიდებულების შემთხვევაში.

– როგორ უნდა ამოვიცნოთ პრობლემა, როცა მოზარდს სპეციალისტის დახმარება სჭირდება? როდისაა, რომ შეფასების საჭიროება დგება?

– თუ სტანდარტს საგრძნობლად ჩამორჩება, მიუხედავად სკოლის მიერ გაწეული სხვადასხვა ძალისხმევისა და თუ მეტყველებასა და კომუნიკაციაში არის შესამჩნევი სირთულეები ასაკთან შედარებით, – ამბობს ფსიქოლოგი.

თვალსაჩინო ხდება, რომ ქართული რესურსები, ენის სწავლებისადმი მიდგომები ვერ აკმაყოფილებს თანამედროვე ეპოქისა და ახალი თაობის მოთხოვნებს, გაქანებასა და დინამიკას. ის, რასაც მოზარდებს ვსაყვედურობთ, მხოლოდ სიმპტომია ამის. ისინი ამ გზით მხოლოდ ცდილობენ დაიკმაყოფილონ პირადი ინტერესები, ინფორმაციული შიმშილი და გარესამყაროსთან ურთიერთობის მოთხოვნილება, რომლის მასშტაბი სულ უფრო დიდია და ერთი პატარა ქვეყნის არეალში აღარ ეტევა. ცხადია, ერთი სტატიის გაქანებასა და შესაძლებლობებს სცდება მიზეზების სრულყოფილი ანალიზი და საკითხის გადაჭრის გზების დასახვა. თუმცა, იქნებ, აქ და ახლა, ამ ეპოქაში, თაობებმა, ერთმანეთის განსჯის ნაცვლად, მოკავშირეობისთვის ვიპოვოთ სივრცე, რომ ამოვავსოთ ის სიმწირე, რაც ჩვენს მშობლიურ ენაზე რესურსებსა და ინფორმაციაზე წვდომის თვალსაზრისით გვაწუხებს ყველა თაობას.

ინტერნეტით ნასწავლი უცხო ენა ბავშვებში – რა საფრთხეებზე მიგვითითებენ სპეციალისტები

გვჭირდება თუ არა გაჯეტები სკოლებში – გამოყენების სტატისტიკა და რეკომენდაციები მშობლებს

]]>
https://edu.aris.ge/news/chemi-shvili-naxevrad-inglisurad-melaparakeba-urchevniat-tu-ara-qartvel-mozardebs-ucxo-ena-mshobliurs.html/feed 0
აკაკი წერეთლის უნივერსიტეტის რექტორმა სხვადასხვა პროექტში გამარჯვებულ სტუდენტებს უმასპინძლა https://edu.aris.ge/news/akaki-weretlis-universitetis-reqtorma-sxvadasxva-proeqtshi-gamardjvebul-studentebs-umaspindzla.html https://edu.aris.ge/news/akaki-weretlis-universitetis-reqtorma-sxvadasxva-proeqtshi-gamardjvebul-studentebs-umaspindzla.html#respond Sun, 09 May 2021 11:30:03 +0000 https://edu.aris.ge/news/?p=109397 აკაკი წერეთლის სახელმწიფო უნივერსიტეტის რექტორი როლანდ კოპალიანი ბიზნესის, სამართლისა და სოციალურ მეცნიერებათა ფაკულტეტის სხვადასხვა პროექტში გამარჯვებულ სტუდენტებს შეხვდა. რექტორმა ფაკულტეტის დეკანთან, ნანა შონიასთან და ადმინისტრაციის უფროსთან, კახა კუპატაძესთან ერთად, სტუდენტებს მადლობა გადაუხადა, მომავალი წარმატებები უსურვა და მხარდაჭერა აღუთქვა.

მიმდინარე სასწავლო წელს ბიზნესის, სამართლისა და სოციალურ მეცნიერებათა ფაკულტეტის სტუდენტებმა მონაწილეობა მიიღეს საქართველოს სამართლის ინსტიტუტის მიერ დაგეგმილ „ადამიანის უფლებათა სამართლის“ იმიტირებულ სასამართლო პროცესსა და თბილისის სახელმწიფო უნივერსიტეტის დავის ალტერნატიული გადაწყვეტის ეროვნული ცენტრის ორგანიზებით ჩატარებულ ონლაინ “მედიაციის ეროვნული შეჯიბრში”.

“ადამიანის უფლებათა სამართლის“ იმიტირებულ სასამართლო პროცესში აკაკი წერეთლის სახელმწიფო უნივერსიტეტიდან ორი გუნდი მონაწილეობდა:

  • „RNSA“ – მონაწილეები: ნუნუ დანელია, რამი კვერნაძე, ანა ზარნაძე და სოფიო დგებუაძე (მწვრთნელი – გელა სიორდია).
  • „აია“ – მონაწილეები: ნინო მატარაძე, მარიამ ამბროლაძე, მარიამ რევიშვილი და მალხაზ ქორიძე (მწვრთნელი – თამარ ჭარბაძე).

მათ პირველი და მეორე ადგილები გაინაწილეს.

მედიაციის ეროვნულ შეჯიბრში მონაწილეობა მიიღო მაია ბაკურაძემ, თამარ ხურციძემ, ნიკა ჭეიშვილმა, დავით ქურციკიძემ და ნუნუ დანელიამ (გუნდის მენტორი, ასოც. პროფესორი რობიზონ ხურცილავა). მათ მეორე ადგილი დაიკავეს და სხვადასხვა ნომინაციაში გაიმარჯვეს და მოიპოვეს სპეციალური ნომინაციებიც: “კეთილგონიერი ალტერნატივა” და “თანამშრომლობა მედიატორთან”.

ორივე ოლიმპიადაში მონაწილე სტუდენტებმა შეძლეს ქვეყნის მასშტაბით შეექმნათ დადებითი იმიჯი, როგორც აკაკი წერეთლის სახელმწიფო უნივერსიტეტისთვის, ისე საკუთრივ ბიზნესის, სამართლის და სოციალურ მეცნიერებათა ფაკულტეტისთვის.

სამმა სტუდენტმა (სალომე გოდერიძემ, ლოლიტა კალანდარიშვილმა და ბიძინა კვერნაძემ) აქტიური მონაწილეობა მიიღო ქვეყნის მასშტაბით საქართველოს განათლების და მეცნიერების სამინისტროს მიერ განხორციელებულ პროექტში “მეცნიერება კაპიტანია”. მათ წარმატებით გაართვეს თავი დავალებებს, რის გამოც უნივერსიტეტმა სამინისტროსგან მადლობის წერილი
მიიღო. აკაკი წერეთლის სახელმწიფო უნივერსიტეტის ბიზნესის, სამართლისა და სოციალურ მეცნიერებათა ფაკულტეტის სტუდენტები ხშირად მონაწილეობენ სხვადასხვა პროექტში და ყოველწლიურად წარმატებებს აღწევენ.

]]>
https://edu.aris.ge/news/akaki-weretlis-universitetis-reqtorma-sxvadasxva-proeqtshi-gamardjvebul-studentebs-umaspindzla.html/feed 0
„ევროპის უნივერსიტეტისა” და საფრანგეთის საელჩოს მიერ ორგანიზებული ესეების კონკურსის შედეგები ცნობილია https://edu.aris.ge/news/evropis-universitetisa-da-safrangetis-saelchos-mier-organizebuli-eseebis-konkursis-shedegebi-cnobilia.html https://edu.aris.ge/news/evropis-universitetisa-da-safrangetis-saelchos-mier-organizebuli-eseebis-konkursis-shedegebi-cnobilia.html#respond Sun, 09 May 2021 09:21:21 +0000 https://edu.aris.ge/news/?p=109391 „ევროპის უნივერსიტეტისა” და საფრანგეთის საელჩოს მიერ ორგანიზებული ესეების კონკურსის შედეგები ცნობილია.

კონკურსი თემაზე „საქართველოს ევროპული მომავალი“, „ევროპის დღეები 2021“-ის ფარგლებში ჩატარდა და მასში მონაწილეობდნენ მე-11-მე-12 კლასის მოსწავლეები, როგორც კერძო, ასევე საჯარო ზოგადსაგანმანათლებლო სკოლებიდან.

კონკურსის მიზანს ევროპული ღირებულებების პოპულარიზაცია და მოსწავლეებში ევროინტეგრაციის პროცესებისადმი, ევროპულ ოჯახთან საქართველოს დაახლოების მნიშვნელობისადმი ცნობადობის ამაღლება, დემოკრატიის, ადამიანის უფლებებისა და კანონის უზენაესობის, როგორც ევროპული ღირებულებების გააზრება წარმოადგენდა.

კონკურსში მონაწილეთა 75%-მა 21-ქულიანი ბარიერი წარმატებით გადალახა და მეორე ეტაპზე გადავიდა. სპეციალურად მოწვეული კომისიის ჩართულობით კი გამოვლინდნენ გამარჯვებულები: ხატია ბალხამიშვილი (ქ. კასპის #2 საჯარო სკოლა), ელენა პეტროსიანი (ასპინძის მუნიციპალიტეტის სოფელ დამალას საჯარო სკოლა), ნინო ხიდაშელი (ქ.თბილისის #191 საჯარო სკოლა), ირაკლი კეთილაძე (ქ. თბილისი, 72-ე საჯარო სკოლა), ანანო ჯაფარიძე (მესტიის წმ. ილარიონ ქართველის სახელობის მართლმადიდებლური სკოლა-გიმნაზია).

აღსანიშნავია, რომ ესეების კონკურსის მიმდინარეობისას, დაანონსებული იყო, რომ გამარჯვებულები სიმბოლურად 9 მაისს, “ევროპის დღეს” გამოვლინდებოდნენ და მათი დაჯილდოება საზეიმო ვითარებაში გაიმართებოდა, თუმცა შექმნილი პანდემიური ვითარებიდან გამომდინარე, პროცესი დროში გახანგრძლივდა.

„ევროპის უნივერსიტეტი” საფრანგეთის საელჩოსთან ერთად დაჯილდოების ცერემონიალს გამართავს, რომლის თარიღიც, კონკურსის მონაწილეებს უახლოეს პერიოდში ეცნობებათ.

9 მაისი, როგორც “ევროპის დღე”, 1950 წლიდან აღინიშნება, როდესაც საფრანგეთის საგარეო საქმეთა მინისტრმა, რობერ შუმანმა პარიზში წამოაყენა ევროინტეგრაციის იდეა და შეიქმნა ქვანახშირისა და ფოლადის ევროპული გაერთიანება, რომელიც შემდგომში ჩამოყალიბდა, როგორც ევროკავშირი და დღეს 27 ქვეყანას აერთიანებს.

]]>
https://edu.aris.ge/news/evropis-universitetisa-da-safrangetis-saelchos-mier-organizebuli-eseebis-konkursis-shedegebi-cnobilia.html/feed 0
ქართული ენის სიწმინდის მცველი https://edu.aris.ge/news/qartuli-enis-siwmindis-mcveli.html https://edu.aris.ge/news/qartuli-enis-siwmindis-mcveli.html#respond Sun, 09 May 2021 06:00:40 +0000 https://edu.aris.ge/news/?p=109284 ავტორი: ირაკლი მახათაძე, თსუ-ის სტუდენტი

ის, რომ ქართული ენის სიწმინდის დაცვა ყოველი ქართველის მოვალეობაა, უდავოა, მაგრამ, ძვირფასო მკითხველო, როცა პუბლიკაციის სათაური წაიკითხე, პირველად რომელი მწერალი გაგახსენდა? ჰმ, საინტერესოა.

აი, ჩემთვის ქართული ენის სიწმინდის დამცველთან, უპირველეს ყოვლისა, მიხეილ ჯავახიშვილი ასოცირდება. დიახ, სწორედ მან ერთ-ერთმა პირველმა მიაქცია ყურადღება სალიტერატურო ნორმებს, სწორედ იგი, სხვა პროგრესულად მოაზროვნე ადამიანებთან ერთად, იღწვოდა ქართული ენის გამრავალფეროვნებისა და გაჯანსაღებისკენ. მისი ენა, ჩვეულებისამებრ, დახვეწილი სალიტერატურო ქართულის ნიმუშია და ეს მწერლის შეგნებული დამოკიდებულებაა.

მიხეილ ჯავახიშვილს ჩამოყალიბებული ჰქონდა სამწერლობო ენის ზოგადი მოთხოვნები: „გამჭირვალობა, მუდმივობა, უბრალოება, სინათლე“.

მხატვრული სიტყვის ოსტატი სულაც არ იყო წინააღმდეგი ქართულ ენაში უცხოური სიტყვების დამკვიდრებისა, მაგრამ მას მიაჩნდა, რომ მწერალი მუდამ დარაჯად უნდა ედგეს მშობლიურ ენას: „უცხო სიტყვა მუდამ არ ეგუება ქართულს. ის, რაც მოსათმენია ტექნიკოსისთვის, ზოგჯერ ყოვლად აუტანელია სიტყვის ხელოვანისთვის. მაინც ორივეს უაღრესი სიფრთხილე მართებს, უფრო მეტად პოეტსა და ჟურნალისტს, რადგან მათი სიტყვა უფრო მჭრელია და ხმოვანი“.

ისე, რა ამის პასუხია და, მიხეილ ჯავახიშვილს დღევანდელ საქართველოში რომ ეცხოვრა, ალბათ გული ეტკინებოდა, როცა მოუსმენდა ჟურნალისტთა მეტყველებას, ამდენ ბარბარიზმს, კალკირებულ ფრაზეოლოგიზმს, ქართულ-ინგლისურ და ქართულ-რუსულ აქცენტთა ნაზავს და მისთ.

მიხეილ ჯავახიშვილმა საკუთარი ყურადღება მიაპყრო ქართულ კილოებში დაბუდებული მარგალიტებისკენ. „(პროვინცია) ნამდვილი ლექსიკური საგანძურია, უშრეტი აუზია, რომელიც… გამუდმებით ჰკვებავს და ამდიდრებს სალიტერატურო ქართულს“, – დასძენდა იგი.

მშობლიური ენის საიდუმლოთა ღრმა წვდომა, მისი ლექსიკის კარგი ცოდნა იყო საფუძველი იმისა, რომ მან ადგილი დაიმკვიდრა ქართულ მწერლობაში. მისი თხზულებები უმდიდრესი წყაროა „ხალხური“ ლექსიკისა, იდიომებისა და გამონათქვამებისა, მხატვრული ხერხებისა, რომლებიც ენობრივი შესაძლებლობების აქტიური გამოვლენაა ¹.

მწერალმა ყურადღება მიაქცია იდიომებს, ფრთიან ფრაზებს, მყარ შესიტყვებებს, ფრაზეოლოგიზმებს. ზოგჯერ საკუთრივაც ქმნიდა ასეთ ერთეულებს: ანდერძის აგება, ალღოს აღება, აყრილი გული და გულის მობრუნება, ენის ქავილი და ლაყბობის მუნი, გულის ჟანგის მოფხეკა, სულის ობის მობანა, აქავებული ენის მოფხანა და მისთ.

რაც არ უნდა იყოს, მიხეილ ჯავახიშვილი ყოველთვის ფიქრობდა ქართული ენის დაცვაზე, მისი თვითმყოფადობის შენარჩუნებაზე. სწორედ ამიტომაცაა, რომ მას, ყოველგვარი პათეტიკის გარეშე, ქართველები პატივს სცემენ და აფასებენ გარდაცვალებიდან რამდენიმე ათეული წლის შემდეგადაც კი.

_____________
1. ქართული ენა და ლიტერატურა.“სწავლანი“, xii კლასი.

]]>
https://edu.aris.ge/news/qartuli-enis-siwmindis-mcveli.html/feed 0
მასშტაბური შესაძლებლობები CIU-ს მევენახეობა-მეღვინეობის ფაკულტეტის სტუდენტებისთვის https://edu.aris.ge/news/masshtaburi-shesadzleblobebi-ciu-s-mevenaxeoba-megvineobis-fakultetis-studentebistvis.html https://edu.aris.ge/news/masshtaburi-shesadzleblobebi-ciu-s-mevenaxeoba-megvineobis-fakultetis-studentebistvis.html#respond Sat, 08 May 2021 09:30:19 +0000 https://edu.aris.ge/news/?p=109374 კავკასიის საერთაშორისო უნივერსიტეტის (CIU) მევენახეობა-მეღვინეობის ფაკულტეტის სტუდენტის ყოველდღიურობას რუტინას ძნელად თუ უწოდებ. თუკი ამ ფაკულტეტზე სწავლას გადაწყვეტ, უნდა იცოდე ისიც, რომ საბაკალავრო საფეხურზე სწავლის პერიოდში აუდიტორიაში ყველაზე ნაკლებად მოგიწევს ყოფნა. სამაგიეროდ, შენი „აუდიტორია“ ვენახი, ლაბორატორია და ღვინის მარნები გახდება.

„იმისათვის, რომ შეისწავლო მსოფლიოში აღიარებული კონცეფცია „ღვინო მიწიდან სუფრამდე“, აუცილებელია, პირველ რიგში, ისწავლო ვენახის დაგეგმვა“, – აღნიშნავს კავკასიის საერთაშორისო უნივერსიტეტის, მევენახეობა-მეღვინეობის ფაკულტეტის დეკანი.

ვენახის დაგეგმვა კი CIU-ში პირველივე კურსიდან იწყება. მომავალმა მეღვინემ აუცილებლად უნდა შეისწავლოს ესა თუ ის მიკროზონა და მისთვის დამახასიათებელი თავისებურებები; გააშენოს ვენახი ისე, რომ მისი მოვლა და შემდეგ მოსავლის აღებაც წინასწარ იყოს განსაზღვრული.

რას ნიშნავს კონცეფცია „ღვინო მიწიდან სუფრამდე“? ესაა პირველ რიგში ვაზის მოვლისა და ყურძნის მოყვანის ძირითადი აგროტექნოლოგიური მეთოდების დაუფლება; დაავადებებისა და მათ წინააღმდეგ დაგეგმილი ღონისძიებების შესწავლა; ეკოლოგიურად სუფთა პროდუქტის მიღება; საქართველოსა და მსოფლიოში მევენახეობა-მეღვინეობის პრაქტიკაში დანერგილი ტრადიციებისა და თანამედროვე, ინოვაციური მიდგომების გაცნობა; ყურძნისეული წარმოშობის ალკოჰოლური სასმელების ფიზიკური, ქიმიური შედგენილობისა და დარგში გამოყენებული საერთაშორისო სტანდარტებით გათვალისწინებული ანალიზის მეთოდების ათვისება.
თანამედროვე მიდგომებთან ერთად CIU-ში დამწყები მეღვინეები უნიკალური, ქართული ქვევრის ღვინის დამზადების ტრადიციულ ტექნოლოგიასაც სწავლობენ; გარდა ამისა, აქვე აუცილებელია ხარისხის მენეჯმენტის მართვის სწავლაც; ღვინის დაყენებასთან ერთად მისი შეფუთვა და მსოფლიო ბაზარზე სათანადო წარდგენა, დაბოლოს, ცხადია ღვინის დეგუსტაციის ხელოვნების დაუფლებაც.

„თამამად შეგვიძლია ვთქვათ, რომ ჩვენი პროგრამები თეორიულ და მრავალფეროვან პრაქტიკულ კომპონენტთან ერთად, გამორჩეულია საქართველოში. ფაკულტეტის თანამედროვე ლაბორატორიებსა და კვლევით ცენტრებში სტუდენტები პირველივე კურსიდან ეუფლებიან უმაღლესი ხარისხის ღვინის დაყენების ტრადიციულ და თანამედროვე მეთოდებს“, – აღნიშნავს ოლანი გოცირიძე.

როგორ გადიან პრაქტიკას მევენახეობისა და მეღვინეობის დამწყები სპეციალისტები CIU-ში

კავკასიის საერთაშორისო უნივერსიტეტი სტუდენტებს უნიკალურ სასწავლო-კვლევით ბაზას სთავაზობს. ქართული ქვევრებით აღჭურვილი მარანი, ქართული ვაზის გენოფონდის მდიდარი საკოლექციო ნაკვეთი 100-ზე მეტი ჯიშით; მდიდარი ენოთეკა; ქართული მარანი „კოლხი“, რომელიც მაღალხარისხიანი და ტრადიციების დაცვით აშენებული, გამორჩეული არქიტექტურის შენობაა, სრული ინვენტარით აღჭურვილი; მიკროვინიფიკაციის კვლევითი ლაბორატორია; ენოქიმიის, მევენახეობისა და მიკრობიოლოგიის თანამედროვე ტექნიკით აღჭურვილი ლაბორატორიები – ეს ყველაფერი CIU-ში გატარებულ საბაკალავრო თუ სამაგისტრო საფეხურს დაუვიწყარ და წარუშლელ გამოცდილებად აქცევს.

„ცალკე ყურადღებას იმსახურებს საერთაშორისო სტანდარტების შესაბამისად მოწყობილი სადეგუსტაციო კაბინეტიც, რომელიც ჩვენს სტუდენტებს განსაკუთრებით მოსწონთ. აქ შესაძლებელია სხვადასხვა ღვინის ორგანოლეპტიკური შეფასება, ღვინის ხარისხის, ზადისა და დაავადებების ამოცნობაში დახელოვნება“, – ამბობს გოცირიძე.

მრავალწლიანი გამოცდილების შედეგია ისიც, რომ სულ მალე დღის სინათლეს იხილავს კავკასიის საერთაშორისო უნივერსიტეტის ბაზაზე დამზადებული ღვინოებიც, რომლის დაყენებაშიც უდიდესი წვლილი მიუძღვის როგორც პერსონალს, ისე – სტუდენტებსაც.

კავკასიის საერთაშორისო უნივერსიტეტი გამორჩეულია პრესტიჟული ღვინის ფესტივალების მიმართულებითაც. აღსანიშნავია 2019 წელს გამართული „ქართული ღვინის ფესტივალი“, სადაც CIU გენერალური სპონსორი იყო. უნივერსიტეტმა თავის სტენდზე სტუდენტური ხაზით შექმნილი ღვინოები წარმოადგინა, რომლებმაც ქართველ და უცხოელ სტუმართა შორის დიდი მოწონება დაიმსახურეს – „საფერავი“; „ვარდისფერი საფერავი“; „რქაწითელი“; „ქვევრის რქაწითელი“; „თავკვერი“; „ციცქა ცოლიკოური“; „კაბერნე სოვინიონი“; „ველური ვაზი“.

აღნიშნული ფესტივალის პარტნიორი იყო კავკასიის საერთაშორისო უნივერსიტეტი 2020 წელსაც. ფესტივალის ფარგლებში, რომელიც გლობალური პანდემიის გამო დისტანციურ რეჟიმში გაიმართა, თავიანთი პროდუქცია 50-მდე მარანმა წარმოადგინა, მათ შორის კი კავკასიის საერთაშორისო უნივერსიტეტი ქვევრის ღვინოებით წარდგა: თავკვერი; შავკაპიტო; საფერავი; რქაწითელი; გორული მწვანე/ჩინური.

სასკოლო-საგანმანათლებლო პროექტები

კავკასიის საერთაშორისო უნივერსიტეტი გამორჩეულია სასკოლო-საგანმანათლებლო მიმართულებითაც. უკანასკნელ პერიოდში გაიმართა მევენახეობა-მეღვინეობის ფაკულტეტის ზამთრისა და გაზაფხულის ონლაინ სასკოლო ბანაკები, რომელშიც მონაწილეობას X, XI და XII კლასის მოსწავლეები იღებდნენ. ბანაკის ფარგლებში მოსწავლეები სფეროს პრაქტიკოსი სპეციალისტებისგან, მათ შორის, ფაკულტეტის კურსდამთავრებულებისგან, მევენახეობა-მეღვინეობის ძირითადი მიმართულებებისა და ბრენდინგის შესახებ ეუფლებოდნენ ცოდნას, გამარჯვებულები კი სოლიდური საჩუქრებით დაჯილდოვდნენ.

საერთაშორისო გამოცდილება

რაც ძალიან მნიშვნელოვანია, მევენახეობა-მეღვინეობის პროგრამების სტუდენტებს კავკასიის საერთაშორისო უნივერსიტეტში აქვთ განსაკუთრებული შესაძლებლობა, გაეცნონ საერთაშორისო გამოცდილებასაც. ფაკულტეტი მჭიდროდ თანამშრომლობს სხვადასხვა ღვინის წარმოებაში წამყვანი ქვეყნების კერძო მარნებთან თუ საგანმანათლებლო დაწესებულებებთან. ამ მხრივ, განსაკუთრებული და აღსანიშნავია ესპანეთთან თანამშრომლობა.

გარდა ამისა, სულ ახლახან CIU გლობალური ღვინის ტურიზმის ორგანიზაციის აკადემიის წევრი გახდა. აკადემია, რომელშიც მსოფლიოს 50-მდე უნივერსიტეტია გაერთიანებული, მიზნად ისახავს გაეროს 2030 წლის მდგრადი განვითარების პროგრამების შესაბამისად, ღვინის ტურიზმის მენეჯმენტის მიმართულებით კვლევებისა და სასწავლო პროგრამები განხორციელებას.

აკადემია უშუალოდ მიიღებს მონაწილეობას CIU-ს მევენახეობა-მეღვინეობისა და ტურიზმის მიმართულებების გაძლიერებაში. პრაქტიკები, მოკლევადიანი გადასამზადებელი კურსები, აკადემიის სპეციალისტების ჩართულობა ენოტურიზმის საბაკალავრო და სამაგისტრო პროგრამების შექმნაში – უნივერსიტეტს აქამდე არნახულ შესაძლებლობებს უხსნის წინ.

გლობალური ღვინის ტურიზმის ორგანიზაციის დამფუძნებლისა და პრეზიდენტის, ხოსე ანტონიო ვიდალის თქმით, ორგანიზაციის წევრობა კსუ-ს შესაძლებლობას მისცემს, იყოს მთავარი საერთაშორისო ღონისძიებების, გამოფენა-ბაზრობების, ტურიზმის, ღვინისა და გასტრონომიის სექტორის ფორუმების მონაწილე.

ამის შედეგად, კავკასიის საერთაშორისო უნივერსიტეტის მევენახეობა-მეღვინეობის ფაკულტეტი არამხოლოდ ახალ ეტაპზე გადავა, არამედ – პერსონალსა და სტუდენტებს კიდევ უფრო მეტად გზას გაუხსნის საერთაშორისო ასპარეზზე.

8000-წლიანი მოსავლის მქონე ქვეყნის ღვინის ისტორიაც კიდევ უფრო გაიშლება დედამიწის თითოეულ კუთხეში; ყველგან, სადაც ჭიქა ღვინო კულტურის განუყოფელი ნაწილია.

გაიგე რას ნიშნავს 100%-ანი სტუდენტობა CIU-ში

აირჩიე 115, გახდი ჩვენი სტუდენტი და ისარგებლე განსაკუთრებული შეთავაზებებით!

]]>
https://edu.aris.ge/news/masshtaburi-shesadzleblobebi-ciu-s-mevenaxeoba-megvineobis-fakultetis-studentebistvis.html/feed 0