მანდატურის სამსახური სკოლის მოსწავლეებთან დაკავშირებულ ინციდენტზე განცხადებას ავრცელებს

საგანმანათლებლო დაწესებულების მანდატურის სამსახური ლაგოდეხში, სკოლის მოსწავლეებთან დაკავშირებული მძიმე ფაქტის შესახებ განცხადებას ავრცელებს, რომელსაც EDU.ARIS.GE უცვლელად გთავაზობთ:

„საქართველოს ერთ-ერთ რეგიონში არასრულწლოვნების მიმართ განხორციელებულ ძალადობის/ბულინგის ფაქტთან დაკავშირებით, გვსურს, კიდევ ერთხელ ხაზგასმით აღვნიშნოთ, რომ ინციდენტში მონაწილე პირებთან დაკავშირებით რაიმე სახის კონფლიქტს ადგილი არ ჰქონია სასკოლო სივრცეში, სკოლის ტერიტორიაზე, სადაც მანდატურის სამსახურის კომპეტენცია ვრცელდება. ამის მიუხედავად, როგორც კი მანდატურისთვის ცნობილი გახდა, რომ არასრულწლოვნების მიმართ ადგილი ჰქონდა ძალადობის/ბულინგის ფაქტს, მან მყისიერი რეაგირება მოახდინა და ფაქტის შესახებ პოლიციას აცნობა. ამასთან, განხორციელდა შემთხვევის რეფერირება მანდატურის სამსახურის ფსიქოსოციალური მომსახურების ცენტრსა და სახელმწიფო ზრუნვისა და ტრეფიკინგის მსხვერპლთა, დაზარალებულთა დახმარების სააგენტოში.

ინციდენტში მონაწილე, ბრალდებული ქალბატონის მხრიდან დაუსაბუთებელი თავდასხმა მანდატურზე, სავარაუდოდ, იმ ფაქტიდან გამომდინარეობს, რომ პოლიციაში შეტყობინება სწორედ მანდატურმა მოახდინა, რასაც შესაბამისი რეაგირება მოჰყვა.

მანდატურის სამსახური სარგებლობს შემთხვევით და მოუწოდებს ყველა პასუხისმგებლიან მოქალაქეს, ძალადობის ნებისმიერი ფაქტის შესახებ ინფორმაციის ფლობისთანავე მიმართოს სამართალდამცავ სტრუქტურებს“, – აღნიშნულია განცხადებაში.

შეგახსენებთ, რომ კახეთში ბავშვებზე ძალადობის ფაქტი მოხდა. სოციალურ ქსელში გავრცელდა ვიდეო, სადაც ჩანს, როგორ აიძულებენ მშობლები მოზარდებს ერთმანეთისთვის ბოდიშის მოხდას. საქმე უკავშირდება არასრულწლოვნებს შორის მომხდარ კონფლიქტს, რისი მოგვარებაც და შერიგებაც მშობლებმა სცადეს. მასალა შეიცავს დანაშაულის ნიშნებს და მისი შესწავლა უკვე დაიწყო შინაგან საქმეთა სამინისტრომ.