GE

„ნახაზის გარეშე გეომეტრიაში ქულა დაგვაკლდება?“ – რა პასუხები გასცა აბიტურიენტებს მათემატიკის საგნის ჯგუფის ხელმძღვანელმა

შეფასებისა და გამოცდების ეროვნული ცენტრის მათემატიკის საგნის ჯგუფის ხელმძღვანელმა ზაზა თევდორაძემ 2022 წლის აბიტურიენტების შეკითხვებს 17 მარტს გამართულ ონლაინ ღია კარის დღეზე უპასუხა, სადაც მისაღებ გამოცდებზე გასვლის მსურველებმა არაერთი კითხვა დასვეს.

„წარმოიდგინეთ, თქვენ ხართ გამსწორებელი და აბა თუ ადვილია გაგება იმისა, რასაც წერთ“ – მითითებები 2022 წლის აბიტურიენტებს მათემატიკის გამოცდისთვის

კითხვების ნაწილი დღეს გამოცდების ცენტრმა გამოაქვეყნა, რომელსაც EDU.ARIS.GE უცვლელად გთავაზობთ:

ამოხსნების გზებთან დაკავშირებით რას გვირჩევთ, ნიმუში ხომ არ არის სადმე გამოქვეყნებული?

– თქვენ შეგიძლიათ გაეცნოთ ცენტრის ვებგვერდზე გამოქვეყნებულ მასალას. ეს არის კრებული „როგორ მოვემზადოთ ერთიანი ეროვნული გამოცდისათვის მათემატიკაში“. აქ მითითებულია ყველა ის საჭირო ინფორმაცია, რომლებიც დაგეხმარებათ გამოცდის წარმატებით ჩაბარებაში. ასევე მოცემულია დავალებების სრულყოფილი ამოხსნები, მოყვანილია გასულ წლებში აბიტურიენტების მიერ დაშვებული ტიპური შეცდომები და სხვ.

რა ტიპის შეცდომებს უშვებენ აბიტურიენტები მათემატიკაში ყველაზე ხშირად?

– ხვდება როგორც ტექნიკური სახის შეცდომები, როდესაც აბიტურიენტი სწორად ვერ აწარმოებს გამოსახულებების მათემატიკურ გარდაქმნებს, ისე მათემატიკური ფაქტობრივი ცოდნის ნაკლებობით გამოწვეული შეცდომები. ზოგჯერ შესაძლოა აბიტურიენტების ერთ ნაწილს ჰქონდეს კიდეც ამა თუ იმ საკითხთან დაკავშირებული ფაქტობრივი ცოდნა, მაგრამ უჭირს მისი გამოყენება კონკრეტულ შემთხვევებში.

რას ურჩევთ იმ აბიტურიენტებს, რომლებიც გეგმავენ ერთიან ეროვნულ გამოცდებზე მათემატიკის ჩაბარებას?

– მათემატიკა ბარდება იმ სასწავლო პროგრამებზე, რომლებზეც კარგი მათემატიკური ცოდნისა და უნარების ფლობის გარეშე სწავლა წარმოუდგენელია. ესენია: საინჟინრო, ეკონომიკური, საფინანსო, საინფორმაციო ტექნოლოგიები, მედიცინა, საბუნებისმეტყველო და მათემატიკის პროგრამები. აბიტურიენტებს ვურჩევდი, რომ ბეჯითად იმუშაონ, რათა გახდნენ თავიანთი სასურველი საგანმანათლებლო პროგრამების სტუდენტები და შემდგომ წარმატებით მოახერხონ სასურველი პროფესიის დაუფლება.

მათემატიკის ტესტში თუ შეიცვალა წელს რამე და როგორია ზღვარი ამ საგანში?

– ტესტის ფორმატს წელს არავითარი ცვლილება არ შეხებია. ზღვარი კვლავ მაქსიმალური ქულის 20%-ზე მეტი (11 ქულა) დარჩება, თუმცა უმაღლეს სასწავლებლებს შეუძლიათ მისი გაზრდა.

თუ სწორი მსჯელობით მივედით პასუხამდე, მაქსიმალური ქულით შეგვაფასებენ?

– რასაკვირველია. თუ წერილობით გადმოსცემთ თქვენს მსჯელობას და ყველა ნაბიჯს თანმიმდევრულად და ნათლად წარმოაჩენთ, დაიმსახურებთ ამ დავალებისათვის გათვალისწინებულ მაქსიმალურ ქულას.

ნახაზის გარეშე გეომეტრიაში ქულა დაგვაკლდება?

– ნახაზის წარმოდგენა სასურველია, ეს თავად თქვენ გიმარტივებთ მსჯელობას და ამოცანის ამოხსნის პროცესს. ასევე გამსწორებელს უმარტივებს თქვენი მსჯელობის (ამოხსნის) შეფასებას. ჩვენი რჩევაა წარმოადგინოთ ნახაზი.

მეორე მხრივ, თუკი არ გექნებათ ნახაზი, მაგრამ თითოეული ტოლობა მსჯელობით იქნება გამყარებული, აგრეთვე თქვენ მიერ დაწერილი ყველა სიდიდე ან ამოცანის პირობაში იქნება განმარტებული, ან თქვენ მიერ იქნება განმარტებული და ამოხსნა იქნება ლოგიკურად გამართული, ხარვეზების გარეშე, ცხადია, მიიღებთ მაქსიმალურ შეფასებას.

მათემატიკის ამოხსნებში პირობის ჩაწერა თუ არის საჭირო?

– ამოცანის პირობის გადაწერა საჭირო არ არის, მუშაობა პირდაპირ ამოხსნით დაიწყეთ, ამით დაზოგავთ დროსაც და სივრცეს პასუხების ფურცელზე.

მათემატიკის ღია კითხვებში ამოხსნა თუ სწორადაა დაწყებული და ბოლოს შეცდომას უშვებს აბიტურიენტი, კითხვა ნულდება, თუ სწორ მონაკვეთში რაიმე ქულა იწერება?

– თითოეული წერითი დავალებისათვის იწერება შეფასების სქემა, რომელიც განსაზღვრავს ამოცანის ამოხსნის ესა თუ ის ეტაპი რამდენი ქულით ფასდება. მაგალითად, თუ ამოცანა არის 3 ქულიანი, მაშინ კონკრეტული აბიტურიენტის ნაშრომი შეიძლება შეფასდეს, როგორც 0, ასევე 1, 2 ან 3 ქულით. ამას არეგულირებს შეფასების სქემა.

შეგვიძლია თუ არა გამოვიყენოთ არაპროგრამული დებულებები?

– შეგიძლიათ გამოიყენოთ, მაგრამ უნდა გამოიყენოთ სრულფასოვნად და არა ზედაპირულად, არასრულყოფილად.

შავი სამუშაოსთვის ფურცლები დაგვირიგდება?

– დიახ, შავი სამუშაოსთვის ფურცლები დაგირიგდებათ გამოცდის დაწყებამდე, თუ არ გეყოთ, შეგიძლიათ მოითხოვოთ დამატება. გაითვალისწინეთ, რომ შავი ფურცელი რჩება სექტორში, მაგრამ არ სწორდება.

მექანიკურ შეცდომებზე ქულა გვაკლდება?

– ეს დამოკიდებულია იმაზე, თუ ამოხსნის რა ეტაპზე დაუშვით შეცდომა. იმ შემთხვევაში, თუ მექანიკური შეცდომა ამოხსნის ბოლო ეტაპზეა დაშვებული, შესაძლოა, ქულა არც დაგაკლდეთ, მაგრამ თუ თავიდანვე დაუშვით ისეთი მექანიკური შეცდომა, რომელმაც ბევრი ცვლილება გამოიწვია, შესაძლოა ერთი ან მეტი ქულა დაგაკლდეთ. დეტალებს შეგიძლიათ გაეცნოთ შეფასების სქემებში, რომელიც ცენტრის ვებგვერდზეა გამოქვეყნებული.

მათემატიკის ტესტის სირთულე წელს შარშანდელის ანალოგიური იქნება?

– დიახ, ტესტის სირთულე არ შეიცვლება, დაახლოებით იგივე იქნება.

რაიმე მონაცემის აღნიშვნისას, მაგალითად, როდესაც ასოთი აღვნიშნავთ, აუცილებელია ტოლობის ნიშანი გამოვიყენოთ, თუ სამხაზიანი ტოლობის ნიშანის დაწერაა აუცილებელი?

– ამ მხრივ აბიტურიენტებთან გვაქვს მინიმალური მოთხოვნები. მართლწერის გამო ქულა არავის დააკლდება, გამოსაცდელს შეუძლია გამოიყენოს ის აღნიშვნა, რომელიც მისთვის უფრო ნაცნობი და მისაღებია.

გაწევრიანდი ჯგუფში “აბი გლუკოზა აბიტურიენტებისთვის” და გაიგე ყველა საჭირო სიახლე

განახლებადი ინფორმაცია გამოცდების შესახებ

დასვით კითხვა და მიიღეთ პასუხი - ედუს საცნობარო სამსახური