GE

შსს-ს აკადემიის კურსდამთავრებულებს დიპლომის აღიარებისა და მაგისტრის ხარისხთან გათანაბრებისთვის სასამართლოსთვის მიმართვა აღარ მოუწევთ – ცვლილება

შსს-ს აკადემიის მიერ გაცემული დიპლომების აღიარებისა და მათი მაგისტრის ხარისხთან გათანაბრების შესახებ საქართველოს პარლამენტმა საკანონმდებლო ცვლილება მიიღო. ინფორმაცია ამის შესახებ შინაგან საქმეთა სამინისტრომ დღეს გაავრცელა.

საქართველოს პარლამენტმა „უმაღლესი განათლების შესახებ“ საქართველოს კანონის ცვლილება მესამე მოსმენით მიიღო.

აღნიშნულ კანონში განხორციელებული ცვლილებით განისაზღვრა 2007-2008 სასწავლო წლის დაწყებამდე სსიპ – საქართველოს შინაგან საქმეთა სამინისტროს აკადემიის მიერ გაცემული დიპლომების აღიარებისა და მათი მაგისტრის ხარისხთან გათანაბრების საკითხი.

აღსანიშნავია, რომ 2007-2008 სასწავლო წლის დაწყებამდე გაცემული დიპლომების აღიარება პრაქტიკაში პრობლემას წარმოადგენდა. აკადემიის კურსდამთავრებულები მიღებული დიპლომის აღიარებასა და მაგისტრის ხარისხთან გათანაბრებას სასამართლოსადმი მიმართვის გზით აღწევდნენ. საკანონმდებლო ცვლილებების მიღების შედეგად აკადემიის კურსდამთავრებულებს აღარ მოუწევთ თავისი კანონიერი ინტერესების დაცვის მიზნით სასამართლოსადმი მიმართვა.

შსს აკადემიის 500 დიპლომი აღიარების პრობლემით და 185 სასამართლო დავა

დასვით კითხვა და მიიღეთ პასუხი - ედუს საცნობარო სამსახური