GE

ზოგადი უნარების გამოცდა საქართველოში სწავლის გაგრძელების მსურველთა ნაწილისთვის მოიხსნა – ახალი რეგულაცია

საქართველოს განათლების, მეცნიერების, კულტურისა და სპორტის სამინისტრომ საქართველოში სწავლის გაგრძელების მსურველთათვის ახალი რეგულაცია აამოქმედა.

განათლების მინისტრის მიხეილ ბატიაშვილის ბრძანების თანახმად, შეფასებისა და გამოცდების ეროვნული ცენტრის მიერ ორგანიზებული ზოგადი უნარების გამოცდის ჩაბარების ვალდებულება გავრცელდება მხოლოდ იმ პირებზე, რომლებმაც სწავლის უფლება უცხო ქვეყანაში ამ ქვეყნის კანონმდებლობის შესაბამისად აღიარებულ უმაღლეს საგანმანათლებლო დაწესებულებაში მოიპოვეს 2019 წლის 1-ლი იანვრიდან.

სამინისტრო ამ ფორმით შეეცადა გამოხმაურებოდა იმ უკმაყოფილო აპლიკანტებს, რომლებსაც საქართველოში სწავლის გაგრძელებისთვის ზოგადი უნარების გამოცდის ჩაბარება უწევდათ, მიუხედავად იმისა, ჰქონდა თუ არა ჩაბარებული მათ ეს გამოცდა. შეგახსენებთ, რომ ეს პირები განათლების სამინისტროსთან აქციებს რეგულარულად მართავდნენ.

“უმაღლეს საგანმანათლებლო დაწესებულებაში ერთიანი ეროვნული გამოცდების გავლის გარეშე სწავლის უფლების მქონე პირთათვის გამოცდის ჩაბარების შესახებ  ახალი რეგულაცია ამოქმედდა.  ეს  გამონაკლისია და ამ გამონაკლისის მთავარი საფუძველი  თანაბარი პირობებისა და  ყველასათვის ხელმისაწვდომი გარემოს  შექმნა და უზრუნველყოფა გახდა”, – ვკითხულობთ განათლების სამინისტროს მიერ გავრცელებულ განცხადებაში.

საქართველოს განათლების, მეცნიერების, კულტურისა და სპორტის სამინისტროს გადაწყვეტილებით (იხ. ბრძანება №09) სწავლის გაგრძელებას საქართველოში სტუდენტები მხოლოდ ზოგადი უნარების გამოცდის  ჩაბარების შემთხვევაში შეძლებენ. ამ გამოცდის  წარმატებით  ჩაბარება გულისხმობს სტუდენტის მხრიდან საქართველოს ავტორიზებულ უმაღლეს საგანმანათლებლო დაწესებულებაში სწავლის მზაობისათვის მინიმალური კომპეტენციის დადასტურებას.

საგულისხმოა, რომ ზემოაღნიშნული პირებისათვის გამოცდა დღეს, 11 თებერვალს არის ჩანიშნული. მონაწილეებს, სურვილისა თუ “იძულების” გამო უკვე გადახდილი აქვთ სარეგისტრაციო თანხა 100 ლარის ოდენობით. სამინისტრო კი განმარტავს, რომ  ამ ახალი რეგულაციის ამოქმედების შემდეგაც, გამოცდაში მონაწილეობის შესაძლებლობა (სურვილის შემთხვევაში) აქვს ყველა დარეგისტრირებულ აპლიკანტს. რამდენად დროულად მიიღებენ აპლიკანტები ახალი რეგულაციის ამოქმედების შესახებ ინფორმაციას უცნობია, მინისტრ ბატიაშვილის ბრძანება 8 თებერვლით არის დათარიღებული და იგი 9 თებერველს გამოქვეყნდა.

იხილეთ რა უნდა იქონიოს თან ზოგადი უნარების გამოცდაზე საქართველოში სწავლის გაგრძელების მსურველებმა – დეტალები

edu.aris.ge საგანმანათლებლო ინტერნეტ-პორტალი