ბათუმის ორი სკოლის 100–ზე მეტ პედაგოგსა და თანამშრომელს კორონავირუსზე ტესტირება ჩაუტარდა

ბათუმის ორ სკოლაში პედაგოგებსა და ადმინისტრაციის თანამშრომლებს კორონავირუსზე ტესტირება ჩაუტარდათ.

ბათუმის რესურსცენტრის უფროსის ინფორმაციით, ნიმუშების აღება ასზე მეტმა პედაგოგმა გუშინ, მას შემდეგ დაიწყო რაც ბათუმელ პედაგოგს COVID-19 აღმოაჩნდა.

დაწყებითი კლასების მასწავლებელი ბათუმის მე-6 და მე-15 სკოლებში მუშაობდა. მას ორივე სკოლაში კოლეგებთან კონტაქტი ჰქონდა, რის გამოც ეპიდემიოლოგებმა შემხებლობაში მყოფი ადამიანების ტესტირება დაიწყეს.

“სკოლების დირექტორებმა აღრიცხეს პედაგოგები, დიდმა ნაწილმა ტესტის ჩასაბარებლად სამედიცინო დაწესებულებას გუშინვე მიმართა, ნაწილმა დღეს აიღო სინჯი. როგორც ვიცი, ამ ეტაპზე ტესტირება ყველამ გაიარა. ორივე სკოლაში დაახლოებით 130 პედაგოგი და თანამშრომელი მუშაობს”, – განაცხადა ბათუმის რესურსცენტრის ხელმძღვანელმა EDU.ARIS.GE-სთან.

გოჩა დავითაძის ინფორმაციით, ეპიდემიოლოგები მუშაობას ტესტირების შედეგების მიხედვით გააგრძელებენ. სასწავლო წლის დაწყება საკლასო ოთახებში 2 კვირით არის გადადებული და ბათუმსა და ქობულეთში სასწავლო პროცესი დისტანციურად დაიწყება. გადაწყვეტილება პრემიერ მინისტრმა გუშინ გამოაცხადა.