კერძო საბავშვო ბაღების მომსახურება 20%-ით გაძვირდა

Covid-19-ის პანდემიის გავლენისა და პროდუქტების გაძვირების გამო, კერძო ბაგა-ბაღებში გადასახადი 20%-ით გაიზარდა. ამის შესახებ კერძო ბაგა-ბაღების ასოციაციის ხელმძღვანელმა პავლე ქალიაშვილმა საზოგადოებრივი მაუწყებლის ეთერში ისაუბრა.

მისი თქმით, იმის გამო რომ კერძო ბაღების საქმიანობა ნახევარი წელია შეჩერებულია, ამ ბიზნესში ჩართულმა პირებმა დიდი ზარალი ნახეს. გარდა ამისა, ახალი რეგულაციების თანახმად, ბაღებს დამატებითი ინვენტარის შეძენა მოუხდათ, რაც ბუნებრივია ხარჯებზე აისახა. თუმცა, პერსონალის შენარჩუნება ასოციაციის წევრმა ყველა სკოლამდელმა დაწესებულებამ შეძლო.

რაც შეეხება ბაღებში ბავშვების რაოდენობას, როგორც ასოციაციაში ამბობენ, შრომის უსაფრთხოების პროტოკოლში გაწერილი მოთხოვნების შესაბამისად, ბაღებში ბავშვების რაოდენობა განახევრებულია. ამასთან 30%-50%-მდეა შემცირებული მოთხოვნა მომხმარებლების მხრიდანაც.

პავლე ქალიაშვილის განცხადებით, იმის გამო, რომ მთავრობამ ბაღების გახსნის თარიღი რამდენჯერმე შეცვალა, კერძო ოპერატორებს მძიმე ფინანსური პრობლემები შეექმნათ.

საქართველოს სკოლამდელ დაწესებულებებში, გარდა აჭარის რეგიონისა, სასწავლო პროცესი 12 ოქტომბერს აღდგა.