რამდენიმე ინციდენტი დაფიქსირდა თბილისის 173-ე და 133-ე სკოლების საგამოცდო ცენტრებში

2020 წლის აბიტურიენტები დღეს ეროვნულ გამოცდას ისევ ქართულ ენასა და ლიტერატურაში აბარებენ.

რამდენიმე ინციდენტი დაფიქსირდა თბილისის ორ საგამოცდო ცენტრში.

173-ე საჯარო სკოლაში განთავსებულ საგამოცდო ცენტრში აბიტურიენტმა გამოცდაზე შესვლა ვერ შეძლო, რადგან შეცდომით სხვა სკოლაში გამოცხადდა.

როგორც საგამოცდო ცენტრის წარმომადგენელმა EDU.ARIS.GE ს განუცხადა, რეგისტრაციის გავლის დროს აღმოჩნდა, რომ აბიტურიენტი სხვა საგამოცდო ცენტრის აპლიკანტი იყო.

“დაცვის სამსახურმა მას შესთავაზა საგამოცდო ბარათში დაფიქსირებულ საგამოცდო ცენტრამდე მიყვანა, თუმცა უარი მივიღეთ”, – განაცხადეს საგამოცდო ცენტრში.

საბოლოოდ კი გაირკვა, რომ აპლიკანტს საგამოცდო ბარათი ტელეფონიდან არასწორად ჰქონდა ამობეჭდილი და ის გამოცდაზე გუშინ, 9 ივნისს უნდა გამოცხადებულიყო. აპლიკანტი და მისი მშობელი გეგმავენ, რომ გამოცდაზე დაშვების თხოვნით შეფასებისა და გამოცდების ეროვნულ ცენტრს მიმართონ.

თბილისის 133-ე საჯარო სკოლის საგამოცდო ცენტრში არასწორად გამოცხადდა დღეს ერთი აბიტურიენტი, რომელიც 207-ე ცენტრში გააბრუნეს, თუმცა მოასწრო თუ არა მან დროულად მისვლა, ჯერ უცნობია.

გამოცდის დაწყების ბოლო წუთზე მივიდა 133-ე საჯარო სკოლაში გახსნილ საგამოცდო ცენტრში კიდევ ერთი აპლიკანტი, რომელმაც გამოცდაზე შესვლა მოასწრო.

მოამზადა თამთა ვირსალაძემ