საქართველოში სწავლის გაგრძელების მსურველთათვის გამოცდის ჩატარების დრო შეიცვალა – დეტალები

საქართველოს უმაღლეს საგანმანათლებლო დაწესებულებაში სწავლის გაგრძელების მსურველებისათვის ტესტირების ჩატარების დრო შეიცვალა. იმ სტუდენტებისათვის, რომლებიც საქართველოში სწავლის გაგრძელების მიზნით 24 იანვრის ჩათვლით დარეგისტრირდნენ, ტესტირება 5 თებერვლის 15:00 საათზე ჩატარდება, ნაცვლად 10:00 საათისა.

რეგისტრირებული აპლიკანტი ზოგადი უნარების გამოცდას თბილისში არსებულ ერთ-ერთ საგამოცდო ცენტრში ჩააბარებენ. საგამოცდო ცენტრის მისამართი გახლავთ თ. იოსებიძის N50, ქ. თბილისის N161 სკოლის შენობა.

საგამოცდო ცენტრში აპლიკანტი რეგისტრაციის გასავლელად 14:30 საათზე უნდა გამოცხადდეს და თან უნდა იქონიოს: პირადობის დამადასტურებელი დოკუმენტი ან პასპორტი.

გაითვალისწინეთ, დაგვიანების შემთხვევაში, გამოსაცდელი ტესტირებაზე აღარ დაიშვება!

დეტალები ტესტიტირების შესახებ:

ტესტირების ხანგრძლივობაა 2 საათი და 30 წუთი.

იხილეთ ზოგადი უნარების ტესტის დავალებათა ნიმუშები

გაითვალისწინეთ, რომ წარმოდგენილ ნიმუშში შეტანილია 7 დავალება ტესტის თითოეული ნაწილიდან:

წაკითხულის გააზრება – 7 დავალება;
ლოგიკური მსჯელობა – 7 დავალება;
რაოდენობრივი მსჯელობა – 7 დავალება.

გამოცდაზე თითოეულ ნაწილში შესასრულებლად გექნებათ 15 დავალება. ტესტი შედგება 45 არჩევითპასუხებიანი ტესტური დავალებისაგან. თითოეულ დავალებას აქვს 5 სავარაუდო პასუხი, რომელთაგან მხოლოდ ერთი არის სწორი. თითოეულ ტესტურ დავალებაზე გაცემული სწორი პასუხი ფასდება 1 ქულით, ხოლო არასწორი პასუხი – 0 ქულით.

ტესტურ დავალებაზე მუშაობის პროცესში აპლიკანტს ცენტრი უზრუნველყოფს შესაბამისი კალმით და სხვა საჭირო ნივთებით.

გამოცდის წარმატებით ჩაბარება გულისხმობს ტესტისათვის განსაზღვრული მაქსიმალური ქულის 50%-ზე მეტის (მინიმუმ 23 ქულა) დაგროვებას.

რა შეიძლება იქონიოს თან აპლიკანტმა ტესტირების მიმდინარეობისას?

• წყალი (პოლიეთილენის ბოთლით);
• პირადი ჰიგიენის ნივთები;
• პირადობის დამადასტურებელი დოკუმენტი;
• საჭიროების შემთხვევაში, სხვა ნივთები, ცენტრის თანხმობით.

გამოცდის ჩატარებიდან 10 სამუშაო დღის ვადაში ცენტრი გამოაქვეყნებს:

• იმ აპლიკანტების სიას, რომელთაც წარმატებით ჩააბარეს გამოცდა;
• იმ აპლიკანტების სიას, რომელთაც ვერ ჩააბარეს გამოცდა.

მონაწილემ, რომელმაც რეგისტრაციის დროს მიუთითა სპეციალური საჭიროების თაობაზე (ფუნქციონალური დარღვევები, გადამდები ინფექციური დაავადებები და სხვა), შესაბამისი სამედიცინო ცნობა (ფორმა №100) უნდა წარადგინოს ცენტრში (მინდელის ქუჩა №9) 31 იანვრის 18:00 საათამდე.

ტესტირებისათვის ზედმეტად ან შეცდომით გადახდილი თანხის დაბრუნების თაობაზე განაცხადები მიიღება 29 იანვრიდან 28 თებერვლის ჩათვლით, მისამართზე: ე. მინდელის N9.