„ამ გამოცდებით მასწავლებლები ვიქნებით მუდმივ ტონუსში – აბა, ჩვენ ხომ ისე წიგნს არ გადავშლით?!…“

ქართული ენისა და ისტორიის მასწავლებელი, „მასწავლებლის ეროვნული ჯილდო 2019-ის“ გამარჯვებული გიორგი ჭაუჭიძე, ჩვეული, იუმორნარევი კრიტიკით ეხმიანება მასწავლებლის სახელფასო ფორმულის დათქმას, რომელიც პედაგოგებისგან მაღალი ანაზღაურების მიღებისთვის საფეხურების შესაბამისად სერტიფიცირებას, ანუ გამოცდების კიდევ ჩაბარებას ითხოვს.

„მასწავლებლის მაღალი ანაზღაურება მხოლოდ იმ საფეხურის საათებზე გავრცელდება“ – საგნები, საფეხურები და ანაზღაურების ახალი წესი

“ვისაც ვრცელი ნაწერის წაკითხვა გეზარებათ, დასაწყისშივე დავწერ: წელს უნდა ჩავაბაროთ სხვა საფეხურის საგნობრივი გამოცდა – თუ დაწყებითის სერტიფიკატი გვაქვს, ვაბარებთ საშუალო-საბაზოს და პირიქით.

(არგუმენტირება: განა დაწყებითის მასწავლებელმა შეიძლება ასწავლოს მეათეკლასელებს?!)

გაისად ცალ-ცალკე უნდა ჩავაბაროთ: I-IV და V-VI, საბაზო და საშუალო.

(არგუმენტირება: განა პირველი კლასის მასწავლებელმა შეიძლება ასწავლოს მეექვსეკლასელებს?!)

მერმისს ცალ-ცალკე უნდა ჩავაბაროთ კლასების მიხედვით და მოვიპოვოთ თითოეული კლასის საგნობრივი სერტიფიკატი.

(არგუმენტირება: განა პირველი კლასის მასწავლებელმა შეიძლება ასწავლოს მეოეეკლასელებს?!)

წარმოიდგინეთ, რამდენი სიკეთე მოაქვს ასეთ სტრატეგიას: დასაქმდებიან საგამოცდო სტანდარტბის ექსპერტები, ტესტოლოგები, გამოცდის დამკვირვებლები, მეთვალყურეები, გამსწორებლები, მასწავლებელთა რეპეტიტორები, სააპელაციო კომისიის წევრები, საგამოცდო ცენტრების გაგრილების სისტემის თანამშრომლები…

მასწავლებლები ვიქნებით მუდმივ ტონუსში – აბა, ჩვენ ხომ ისე წიგნს არ გადავშლით და საკუთარ პროფესიულ განვითარებაზე საერთოდ არ ვიზრუნებთ?!