კორონავირუსის გამო, თბილისში უკვე 55 საბავშვო ბაღია დახურული – როდის განახლდება სააღმზრდელო პროცესი

ამჟამად თბილისში, COVID-19-ის ფაქტების გამოვლენის გამო, 55 საბავშვო ბაღია დახურული და მათი გახსნა ეპიდემიოლოგების მიერ განსაზღვრული საიზოლაციო პერიოდის გასვლის შემდეგ არის დაგეგმილი – აღნიშნულ ინფორმაციას თბილისის საბავშვო ბაგა-ბაღების მართვის სააგენტო ავრცელებს.

როგორც ბაგა-ბაღების მართვის სააგენტოში აცხადებენ, ბაღებში დაფიქსირებული კორონავირუსის შემთხვევებიდან არც ერთის შემთხვევაში შიდა გავრცელება არ მომხდარა.

საბავშვო ბაგა-ბაღების მართვის სააგენტოს ხელმძღვანელმა კახაბერ გვანცელაძემ COVID-19-ით ინფიცირების ფაქტების გამოვლენის შემდეგ დახურული საბავშვო ბაღების დირექტორებთან ვიდეოკონფერენცია გამართა.

კახაბერ გვანცელაძემ თითოეულ ბაღში გამოვლენილი შემთხვევის, დაინფიცირებულთა მდგომარეობისა და დახურული ბაღების გახსნის გეგმა-გრაფიკების შესახებ ინფორმაცია მიიღო. ასევე, საუბარი შეეხო 31 ოქტომბერს დანიშნული არჩევნების ჩასატარებლად ბაღების სამოქმედო გეგმებსა და ბაღების რამდენიმე დღით დახურვის საკითხს.