ბავშვებისთვის განკუთვნილი 200-ლარიანი დახმარების ჩარიცხვა 1-ლი სექტემბრიდან დაიწყება
![](https://edu.aris.ge/news/wp-content/uploads/2020/08/gaxaria-458x257.jpg)
საქართველოს მთავრობის ინფორმაციით, 17 წლის ასაკის ჩათვლით ბავშვებისთვის განკუთვნილი 200-ლარიანი დახმარების ჩარიცხვა 1-ლი სექტემბრიდან დაიწყება.
საბანკო დავალიანებების მქონე მშობლებს ან ბავშვის კანონიერ წარმომადგენლებს აღნიშნული თანხა ბანკების მიერ, არ ჩამოეჭრებათ. ამის შესახებ პრემიერ-მინისტრი და კომერციული ბანკების ხელმძღვანელები შეთანხმდნენ.
შეთანხმების შესაბამისად, თუ დახმარების ბენეფიციარს ბანკთან აქვს სასესხო ვალდებულება, მის დასაფარად, ბანკი კონკრეტულად აღნიშნულ სოციალურ დახმარებას არ მიმართავს.
18 წლამდე ბავშვთა ერთჯერადი 200-ლარიანი სოციალური დახმარების მიღების მიზნით შექმნილ სპეციალურ პორტალზე – daxmareba.moh.gov.ge დღეის მდგომარეობით რეგისტრირებულია 742 000 ბავშვი და 442 000 მშობელი. სისტემაში რეგისტრაცია 2020 წლის 1-ელ დეკემბრამდე გრძელდება.
პირებს, რომლებსაც რეგისტრაციის პრობლემა აქვთ, შეუძლიათ სხვადასხვა სახელმწიფო სტრუქტურებს მიმართონ ,მათ შორის მერიებსა და რაიონულ გამგეობებს, ასევე სოციალური მომსახურების სააგენტოს ოფისებს.
თ.ვ.