დასაქმებული არასრულწლოვნებისთვის სამუშაო საათების მაქსიმალური ოდენობა უნდა განისაზღვროს
პარლამენტი „შრომის კოდექსში“ შესატან ცვლილებებს იხილავს, რომლის დამტკიცების შემთხვევაშიც დასაქმებულებისთვის, მათ შორის არასრულწლოვნებისთვის სამუშაო საათების მაქსიმალური ოდენობა და ასევე ზეგანაკვეთური შრომის ანაზღაურების პირობები განისაზღვრება.
კანონპროექტის თანახმად, ,,დასაქმებულისთვის სამუშაო დროის ხანგრძლივობა ზეგანაკვეთური სამუშაოს ჩათვლით არ უნდა აღემატებოდეს კვირაში 48 საათს. 16 წლიდან 18 წლამდე ასაკის არასრულწლოვნისთვის – 42, ხოლო 14 წლიდან 16 წლამდე ასაკის არასრულწლოვნისთვის – კვირაში 28 საათს”.
კანონპროექტის ინიციატორი დეპუტატი ბექა ნაცვლიშვილია, რომელიც მიიჩნევს, რომ ცვლილებები რომელიც ზეგანაკვეთური შრომის, ღამის სამუშაოებისა და დასვენების დღეებში გაწეული მუშაობის ანაზღაურებას ეხება, აუცილებად გასატარებელია.
“ცვლილება ეხება ზეგანაკვეთური შრომის ანაზღაურებას, რომელიც ჩვეულ სამუშაო დროსთან შედარებით ერთნახევარი ოდენობით უნდა ანაზღაურდეს, ასევე ცვლილება ეხება ღამის შრომას და დასაქმებული არასრულწლოვნების ანაზღაურების საკითხს. კანონში ცვლილების ერთ-ერთი მთავარი ფაქტორი არის, რომ დამსაქმებელს სამუშაო საათების წარმოებისა და აღრიცხვის ვალდებულება გაუჩნდება. როგორც უმრავლესობამ ისე სხვამაც უნდა გაათვითცნობიეროს, რომ ამ ცვლილებების განხორციელება აუცილებელია”, – ამბობს დეპუტატი.
თ.ვ.
- ქარის შედეგად დაზიანებული 20 საჯარო სკოლა შეკეთდება – სკოლების სია by ინფოLIFE
- 500 ლარი მენტორი მასწავლებლებისთვის და 1000-ლარიანი ჯილდო გრანტის მქონე აბიტურიენტებს ლაგოდეხის მუნიციპალიტეტში by ინფოLIFE
- სკოლაში ასაფეთქებელი მოწყობილობის არსებობის შესახებ ინფორმაცია მეილზე მიიღეს – სწავლა შეწყვეტილია by ინფოLIFE