მედიაწიგნიერება – ციფრული უნარები სასკოლო განათლებაში

„ფიფლ ინ ნიდ“ (People in Need) – ჩეხური არაკომერციული ორგანიზაცია 1992 წელს დაარსდა ჩეხეთის რესპუბლიკაში, ჟურნალისტთა მცირე ჯგუფის მიერ, რომლებიც მონაწილეობდნენ ჰუმანიტარულ საქმიანობაში. თანდათან, მათი წრე გაფართოვდა და დღეს, PIN-ი წარმოადგენს ერთ-ერთ უმსხვილეს ორგანიზაციას, რომელიც მსოფლიოს კრიზისულ რეგიონებში ცდილობს ადამიანის უფლებების დაცვას და დემოკრატიის განვითარების ხელშეწყობას. ჰუმანიტარული დახმარებების გარდა, ორგანიზაცია ასევე მუშაობს განათლებაზე ორიენტირებულ პროექტებზე.

„ფიფლ ინ ნიდ“ (PIN) 2020 წლიდან ახორციელებს მედიაწიგნიერების პროექტს საქართველოს სხვადასხვა რეგიონებში, რომელიც მიზნად ისახავს დამოუკიდებელი მედია აქტორებისა და სამოქალაქო საზოგადოების ორგანიზაციების შესაძლებლობების გაძლიერებას, ახალგაზრდების, პედაგოგებისა და განათლების სისტემაში მომუშავე სხვა აქტორების ცნობიერების ამაღლებას მედიაწიგნიერების საკითხებზე.

მიმდინარე პროექტის „მედიაწიგნიერება დემოკრატიული და მდგრადი საზოგადოებისთვის საქართველოში“ (2023-2024 წ.წ.) ფარგლებში, რომელიც ხორციელდება რადიო მარნეულთან თანამშრომლობით, ჩეხეთის საგარეო საქმეთა სამინისტროს მხარდაჭერით, ჩატარდა შეხვედრები პედაგოგებთან და მოიცვა ქვემო-ქართლის, სამცხე-ჯავახეთის, შიდა-ქართლის, რაჭა-ლეჩხუმის, გურიისა და აჭარის რეგიონები.

პროექტი ითვალისწინებდა მასწავლებლებისთვის მედიაწიგნიერების და ციფრული მოქალაქეობის თემაზე ორგანიზაცია „ფიფლ ინ ნიდ“-ის გამოცდილების გაზიარებას, OWIS-ის (One World in Schools – „ერთი მსოფლიო სკოლებში“) მეთოდოლოგიის გაცნობას, მასწავლებლებისთვის დამხმარე სახელმძღვანელოებისა და დოკუმენტური ფილმების შესახებ ინფორმაციის მიწოდებას.

თეონა ფურცხვანიძე, პროექტის მენეჯერი: „თანამედროვე განათლებაში მედიაწიგნიერებას, როგორც ერთ-ერთ გამჭოლ კომპეტენციას, უდიდესი მნიშვნელობა ენიჭება. ჩვენ ვცხოვრობთ 21-ე საუკუნეში, სადაც ყოველდღიურად ვითარდება ტექნოლოგიები, ხელოვნური ინტელექტი, გვაქვს მუდმივი კავშირი და წვდომა სოციალურ მედიასთან, ინტერნეტთან.

ჩეხური ორგანიზაცია „ფიფლ ინ ნიდ“ (PIN) ადამიანის უფლებების და მედიაწიგნიერების თემებზე ფლობს საინტერესო მასალებს. ჩვენ ვიყენებთ OWIS-ის (One World in Schools) მეთოდოლოგიას, რაც გულისხმობს სწავლებას დოკუმენტური ფილმებისა და დამხმარე სახელმძღვანელოების მეშვეობით. აღნიშნული რესურსები ხელმისაწვდომია ონლაინ პლატფორმაზე: www.literacydoc.ge, რომელთა გამოყენებაც პედაგოგებს შესაძლებლობას მისცემს სასწავლო პროცესი მეტად მრავალფეროვანი და საინტერესო გახადონ, ასევე თავადაც განივითარონ კომპეტენციები მედიაწიგნიერების მიმართულებით.

პლატფორმაზე დარეგისტრირების შემდეგ, დაინტერესებულ პირებს, მათ შორის მასწავლებლებს, ტრენერებს, ფასილიტატორებს და ა.შ, წვდომა ექნებათ როგორც მასალებზე, ასევე მედიაწიგნიერების მუდლის კურსზე, რომელიც მუდამ ღიაა მსურველთათვის. კურსი მოიცავს სასწავლო ვიდეოებს და ტესტურ დავალებებს, რომლის წარმატებით დასრულების შემთხვევაშიც, მსმენელი მიიღებს ონლაინ სერტიფიკატს.“

(R)