AIA-GESS-ის გუნდი Solana Hackathon-ის გამარჯვებულია

სერვანტესის სახელობის გიმნაზია AIA-GESS-ის გუნდმა, სახელწოდებით AdMint, რომლის წევრები არიან გიორგი ჩიკვატია, ლუკა ძაგანია, დავით ტყემალაძე და გიორგი ჩილინგარაშვილი, Solana Hackathon-ში პირველი ადგილი მოიპოვა და $500-ის ოდენობის საპრიზო თანხა მიიღო.

გიმნაზიის მიერ 1-ელ ოქტომბერს გამოქვეყნებული ინფორმაციით, ჰაკათონს კავკასიის უნივერსიტეტის ინოვაციებისა და მეწარმეობის ცენტრმა უმასპინძლა. ორდღიანი ინტენსიური Web3 ღონისძიება Superteam Georgia-ს, საქართველოში Solana-ს ოფიციალური წარმომადგენლობის ჩართულობით გაიმართა და მონაწილეებს Solana-ს ეკოსისტემისა და Web3 ტექნოლოგიების გაცნობისა და საკუთარი ინოვაციური იდეების განვითარების შესაძლებლობა მისცა.

ჰაკათონის განმავლობაში მონაწილეები გაეცნენ Solana-ს ეკოსისტემას, იმუშავეს რეალურ პრობლემებზე, შექმნეს და დახვეწეს საკუთარი პროექტები, მიიღეს მენტორებისგან უკუკავშირი და საბოლოოდ საკუთარი იდეები ჟიურის წინაშე წარადგინეს.

გამარჯვებულების შერჩევისას ჟიურიმ ყურადღება გაამახვილა პროექტების Solana-ს ეკოსისტემასთან შესაბამისობაზე, იდეის ინოვაციურობასა და პრაქტიკულობაზე, ტექნოლოგიური გადაწყვეტის ეფექტიანობასა და პროექტის განვითარების პოტენციალზე.

„ვულოცავთ ჩვენს მოსწავლეებს ამ მნიშვნელოვან წარმატებას და ვამაყობთ მათი ინოვაციური ხედვით, ტექნოლოგიური ცოდნითა და გუნდური მუშაობით!“, – აცხადებენ გიმნაზიაში.

სკოლის სხვა ამბები