მეფე თამარის სახელობის სკოლა-პანსიონში სახალხო დღესასწაული “თამარობა” გაიმართა

2018 წლის 14 მაისს, წმიდა მეფე თამარის ხსენების დღეს, საქართველოს საპატრიარქოს წმიდა მეფე თამარის სახელობის სკოლა-პანსიონში გაიმართა სახალხო დღესასწაული “თამარობა”.

სკოლის ტერიტორიაზე მდებარე წმიდა ტბელ აბუსერისძის სახელობის ტაძარში სადღესასწაულო წირვა დილის 9 საათზე დაიწყო, რომელიც აღასრულა ტაძრის წინამძღვარმა, დეკანოზმა მირიან სამხარაძემ, 12 საათზე მობრძანდა საჩხერისა და ჭიათურის მიტროპოლიტი დანიელი /დათუაშვილი/, რომელმაც მეფე თამარის სახელობის მშენებარე ტაძართან, ავჭალის წმიდა იოანე ნათლისმცემლის სახელობის მონასტრის წინამძღვართან, დეკანოზ რევაზ სიხარულიძესთან და დეკანოზ მირიან სამხარაძესთან ერთად, წმიდა მეფის პარაკლისი აღავლინა. პარაკლისის შემდეგ მეუფე დანიელმა, სტუმრებთან ერთად ზოგადი სკოლის მოსწავლეთა და პროფესიული სწავლების სტუდენტთა ნამუშევრების გამოფენა დაათვალიერა და სახალხო ზეიმის ფარგლებში მოწყობილ, სახელოვნებო მიმართულების მოსწავლეთა კონცერტს დაესწრო.

კონცერტში მონაწილეობდნენ სკოლა-პანსიონის ვაჟთა ფოლკლორული ანსამბლი /ხელმძღვანელი დავით შანიძე/, გოგონათა ვოკალური ანსმბლი /ხელმძღვანელი დალი დაბრუნდაშვილი/, ხალხურ საკრავთა ორკესტრი /ხელმძღვანელები: ალექსანდრე ხიზანიშვილი და მალხაზ ქოიავა/, ქორეოგრაფიული ანსამბლი “არსიანი”, /ხელმძღვანელი ჯონი დუგლაძე/., ასევე ინდივიდუალური შემსრულებლები.

სახალხო ზეიმზე მობრძანდნენ და მოსწავლეებსა და პედაგოგებს დღესასწაული მიულოცეს: სრულიად საქართველოს შოთა რუსთაველის საზოგადოების პრეზიდენტამა, პოეტმა დავით შემოქმედელმა, თბილისის საკრებულოს წევრმა, ნაძალადევის მაჟორიტარმა დეპუტატმა, დავით ჭელიძემ და ნაძალადევის რაიონის გამგეობის წარმომადგენლებმა. სახალხო ზეიმზე ჩამობრძანდა ხულოს მუნიციპალიტეტის დელეგაცია, საკრებულოს თავმჯდომარის, ჯუმბერ დიმიტრაძის ხელმძღვანელობით.

სკოლის სხვა ამბები