საქართველოს საუნივერსიტეტო საზოგადოება განცხადებას ავრცელებს – ხელმომწერები

დღეს, 20 ნოემბერს, საქართველოს საუნივერსიტეტო საზოგადოების განცხადება გავრცელდა, რომელშიც ხელმომწერები – საქართველოს უმაღლესი საგანმანათლებლო დაწესებულებების პროფესორ-მასწავლებლები, ლექტორები  და დოქტორანტები “მკაცრად გმობენ 19 ნოემბერს, თბილისის სახელმწიფო საუნივერსიტეტო სივრცის ბოროტად გამოყენებით, მშვიდობიანი აქციის  ძალის გადამეტებით დაშლას  და თავისუფლების პრინციპების უხეშ უგულებელყოფას”.

ხელმომწერთა განცხადებით, ნებისმიერი ადმინისტრაცია, რომელიც უგულებელყოფს სტუდენტების უფლებებსა და გამოხატვის თავისუფლებას, მიიღებს აკადემიური საზოგადოების მკაცრ პროტესტს და მიაჩნიათ, რომ აღნიშნულ ქმედებაზე პასუხისმგებლობა ეკისრება უნივერსიტეტის აკადემიურ საბჭოსა და რექტორს.

“უნივერსიტეტმა, რომლის კარი ყოველთვის ღია უნდა იყოს სტუდენტებისა და პროფესორებისთვის, დღეს მისი პრინციპული მისიის საპირისპიროდ იმოქმედა — კარები ჩაუკეტა მათ და ძალოვანი სტრუქტურები შეუშვა მშვიდობიანი აქციის მონაწილეთა, მათ შორის, ამავე უნივერსიტეტის სტუდენტების დასარბევად. ეს ქმედება შეურაცხყოფს უნივერსიტეტს, როგორც თავისუფლებისა და პროგრესის სიმბოლოს, არღვევს აკადემიურ დამოუკიდებლობას და ეწინააღმდეგება მის ისტორიულ მისიას”, – წერია განცხადებაში, რომელსაც 13:30 საათისთვის უკვე ხელს აწერს 500-მდე ადამიანი.

ხელმოწერები კვლავაც გრძელდება.

სრული განცხადება და ხელმომწერთა სია იხილეთ ბმულზე