AIA-GESS-ის მიერ 29 სექტემბერს გამოქვეყნებული ინფორმაციით, წელს, სამეცნიერო პიკნიკზე, სკოლა წარმოდგენილი იყო კლუბებით – „აიას ბიოლოგები”, Green Space და STEAM Club, რომლებმაც მონაწილეებს STEM მიმართულების სხვადასხვა საგანმანათლებლო და პრაქტიკული აქტივობა წარუდგინეს.

„აიას ბიოლოგებმა” მონაწილეებს საინტერესო პრაქტიკული აქტივობა შესთავაზეს და ისინი ნამდვილ გამომძიებლებად აქციეს. მონაწილეები სხვადასხვა დავალების საშუალებით იკვლევდნენ დნმ-ს, ადგენდნენ თვალის ფერსა და თითის ანაბეჭდებს და საბოლოოდ დამნაშავის პორტრეტის შექმნის პროცესში ერთვებოდნენ.

Green Space-ისა და STEAM Club-ის წარმომადგენლებმა ასევე წარადგინეს STEM პროექტები და მეორადი რესურსების გამოყენებით შექმნილი საგანმანათლებლო და ინტერაქტიული აქტივობები, რომლებიც მონაწილეებს მეცნიერების სხვადასხვა მიმართულების პრაქტიკულად აღმოჩენის შესაძლებლობას აძლევდა.

AIA-GESS-ისთვის სამეცნიერო პიკნიკში მონაწილეობა მოსწავლეებისთვის მეცნიერების პრაქტიკულ გარემოში გაცნობის, კვლევითი ინტერესების გაღრმავებისა და საკუთარი ცოდნის სხვებისთვის გაზიარების მნიშვნელოვანი შესაძლებლობაა.

EDU.ARIS.GE თბილისისა და ერთ-ერთი რეგიონის რამდენიმე სკოლის შინაგანაწესის მაგალითზე გიზიარებთ, რა მიიჩნევა მოსწავლის დისციპლინურ გადაცდომად:

– გაკვეთილზე არაერთგზის დაგვიანება;
– გაკვეთილის ჩაშლა ან ჩაშლის მცდელობა;
გაკვეთილის თვითნებურად მიტოვება;
– სასწავლო პროცესის დროს მობილური ტელეფონით ან/და ნებისმიერი სხვა სახის ტექნიკური საშუალებით არასასწავლო მიზნით სარგებლობა;

– სკოლისათვის მატერიალური/ქონებრივი ზიანის მიყენება ან ასეთი ზიანის წარმოშობის საშიშროების შექმნა;

– მოსწავლის მიერ შინაგანაწესით დადგენილი ჩაცმულობის წესის დაუცველად სკოლის ტერიტორიაზე გამოცხადება, გარდა სკოლის მიერ წინასწარ განსაზღვრულ ღონისძიებაში მონაწილეობის მიღების მიზნით გამოცხადებისა;

– მოსწავლის/სკოლაში დასაქმებულის/მოსწავლის მშობლის/კანონიერი წარმომადგენლის/სკოლის ტერიტორიაზე შემოსული გარეშე პირის სიტყვიერი შეურაცხყოფა;

– მოსწავლის/სკოლაში დასაქმებულის/მოსწავლის მშობლის/კანონიერი წარმომადგენლის/სკოლის ტერიტორიაზე შემოსული გარეშე პირის ფიზიკური შეურაცხყოფა;

– სკოლის ტერიტორიაზე მოსწავლის გამოცხადება შემდეგი ნივთებით: თამბაქოს ნაწარმი/ელექტრონული სიგარეტი, ალკოჰოლური საშუალებები, ნარკოტიკული საშუალებები და ნარკოტიკული საშუალებების მოხმარებისათვის საჭირო ნივთები, ფსიქოტროპული საშუალებები, ექიმის შესაბამისი ნებართვის გარეშე, ასაფეთქებელი და მომწამვლავი ნივთიერებები, ნებისმიერი სახის იარაღი, კასტეტი ან ბასრი ნივთი, რომელიც შეიძლება გამოყენებულ იქნეს იარაღად, სანთებელა ან ასანთი, აზარტული თამაშის საშუალებები, უხამსობის ამსახველი ნივთები/საშუალებები, ელექტროშოკური მოწყობილობა, ნებისმიერი სხვა ნივთი, რომელიც შეიძლება საფრთხეს უქმნიდეს სიცოცხლესა და ჯანმრთელობას და მათი გამოყენება.

– მოსწავლის დისკრიმინაცია;
– მოსწავლის ან/და სკოლაში დასაქმებული პირის  პირად ცხოვრებაში ჩარევა;
– ფულის ან სხვა ნივთების გამოძალვა;
– სკოლაში დასაქმებული პირების კანონიერი მოთხოვნის დაუმორჩილებლობა;
– სკოლის ტერიტორიაზე სხვისი ნივთის უნებართვოდ აღება, დაკარგვა ან/და დაზიანება;
– სკოლის უსაფრთხოების წესების დარღვევა, რომელმაც ზიანი გამოიწვია;

– მოსწავლეთა ქცევის კოდექსის დარღვევა;
– მოსწავლის ან/და სკოლაში დასაქმებული პირის  მიმართ ფსიქოლოგიური ზეწოლა;
– სკოლის დოკუმენტაციის ხელყოფა;

– სკოლის საქმიანობისთვის განკუთვნილი კომპიუტერული მონაცემის მიღება ან/და კომპიუტერული სისტემის უნებართვოდ ან სკოლის ინტერესების საწინააღმდეგოდ გამოყენება;

– არაფხიზელ მდგომარეობაში სკოლაში გამოცხადება;

– მოსწავლისთვის შეუფერებელი სხვა ქმედების ჩადენა;
– ელექტრონული  საკომუნიკაციო  საშუალებების  გამოყენების  წესის დარღვევა.

დისციპლინური გადაცდომის ჩადენისათვის მოსწავლის მიმართ გამოიყენება შემდეგი დისციპლინური პასუხისმგებლობის სახე:

შენიშვნა, გაფრთხილება, მკაცრი გაფრთხილება, საყვედური, სასტიკი საყვედური, სკოლიდან დროებით დათხოვნა, სკოლისათვის სასარგებლო საქმიანობის დაკისრება, მოსწავლის სკოლიდან გარიცხვა (საშუალო საფეხურზე).

დისციპლინური სახდელის რომელი ზომა როდის გამოიყენება

პუნქტი I – შენიშვნა, შესაძლოა, გამოყენებულ იქნეს შემდეგ შემთხვევებში:

გაკვეთილზე ზედიზედ არაერთგზის დაგვიანება;
საგაკვეთილო პროცესის დროს მობილური ტელეფონით ან/და ნებისმიერი სხვა სახის ტექნიკური საშუალებით არასასწავლო მიზნით სარგებლობა;
მოსწავლის მიერ სკოლის შინაგანაწესით დადგენილი ჩაცმულობის წესის (სამოსი, იერსახე და სხვა) დაუცველად სკოლის ტერიტორიაზე გამოცხადება. გამონაკლისი დაიშვება სკოლის მიერ წინასწარ განსაზღვრულ ღონისძიებებში  მონაწილეობისას.
სკოლის ტერიტორიაზე სხვისი ნივთის უნებართვოდ აღება;
სკოლის ტერიტორიაზე მოსწავლის გამოცხადება შემდეგი ნივთებით: თამბაქოს ნაწარმი/ელექტრონული სიგარეტი, სანთებელა ან ასანთი, აზარტული თამაშის საშუალებები;
მოსწავლისათვის შეუფერებელი სხვა ქმედება.

პუნქტი II – გაფრთხილება, შესაძლოა, გამოყენებულ იქნეს შემდეგ შემთხვევებში:

I პუნქტით გათვალისწინებული დისციპლინური გადაცდომის განმეორებით ჩადენისას, თუ მოსწავლის მიმართ უკვე გამოყენებულია დისციპლინური პასუხისმგებლობის წინა ზომა (შენიშვნა) ან შინაგანაწესით გათვალისწინებული დისციპლინური გადაცდომის სისტემატურად ჩადენისას, რის გამოც მიზანშეწონილია მის მიმართ დისციპლინური სახდელის სახით გაფრთხილების გამოყენება დისციპლინური პასუხისმგებლობის წინა ზომის გამოყენების გარეშე;

გაკვეთილის ჩაშლა ან ჩაშლის მცდელობა;
გაკვეთილის თვითნებურად მიტოვება;
სკოლისათვის მატერიალური/ქონებრივი ზიანის მიყენება ან ასეთი ზიანის წარმოშობის საშიშროების შექმნა;
სკოლაში დასაქმებული პირების კანონიერი მოთხოვნის დაუმორჩილებლობა;
მოსწავლის სიტყვიერი შეურაცხყოფა;
სკოლის ტერიტორიაზე მოსწავლის გამოცხადება შემდეგი ნივთებით: ალკოჰოლური საშუალებები, უხამსობის ამსახველი ნივთები/საშუალებები;
არაფხიზელ მდგომარეობაში სკოლაში გამოცხადება;
ელექტრონული  საკომუნიკაციო  საშუალებების  გამოყენების  წესის დარღვევა.
თამბაქოს ნაწარმი/ელექტრონული სიგარეტის, აზარტული თამაშის საშუალებების გამოყენება სკოლის ტერიტორიაზე;
მოსწავლისათვის  შეუფერებელი სხვა ქმედება.

პუნქტი III – მკაცრი გაფრთხილება, შესაძლოა, გამოყენებულ იქნეს შემდეგ შემთხვევებში:

II პუნქტით გათვალისწინებული დისციპლინური გადაცდომის განმეორებით ჩადენისას, თუ მოსწავლის მიმართ უკვე გამოყენებულია დისციპლინური პასუხისმგებლობის წინა ზომა (გაფრთხილება) ან შინაგანაწესით გათვალისწინებული დისციპლინური გადაცდომის სისტემატურად ჩადენისას, რის გამოც მიზანშეწონილია მის მიმართ დისციპლინური სახდელის სახით მკაცრი გაფრთხილების გამოყენება დისციპლინური პასუხისმგებლობის წინა ზომის გამოყენების გარეშე;

სკოლის უსაფრთხოების წესების დარღვევა, რომელმაც ზიანი გამოიწვია;
მოსწავლის ფიზიკური შეურაცხყოფა;
მოსწავლის დისკრიმინაცია;
მოსწავლის ან/და სკოლაში დასაქმებული პირის  პირად ცხოვრებაში ჩარევა;
სკოლის დოკუმენტაციის ხელყოფა;
სკოლის ტერიტორიაზე სხვისი ნივთის დაკარგვა ან/და დაზიანება;
მოსწავლისათვის შეუფერებელი სხვა ქმედება.

პუნქტი IV – საყვედური, შესაძლოა, გამოყენებულ იქნეს შემდეგ შემთხვევებში:

III პუნქტით გათვალისწინებული დისციპლინური გადაცდომის განმეორებით ჩადენისას, თუ მოსწავლის მიმართ უკვე გამოყენებულია დისციპლინური პასუხისმგებლობის წინა ზომა (მკაცრი გაფრთხილება) ან შინაგანაწესით გათვალისწინებული დისციპლინური გადაცდომის სისტემატურად ჩადენისას, რის გამოც მიზანშეწონილია მის მიმართ დისციპლინური სახდელის სახით საყვედურის გამოყენება დისციპლინური პასუხისმგებლობის წინა ზომის გამოყენების გარეშე;

მოსწავლის ან/და სკოლაში დასაქმებული პირის მიმართ ფსიქოლოგიური ზეწოლა;
სკოლის საქმიანობისთვის განკუთვნილი კომპიუტერული მონაცემის მიღება ან/და კომპიუტერული სისტემის უნებართვოდ ან სკოლის ინტერესების საწინააღმდეგოდ გამოყენება;
მოსწავლის მიერ სკოლის ტერიტორიაზე ალკოჰოლური საშუალებების გამოყენება;
სკოლის ტერიტორიაზე ექიმის შესაბამისი ნებართვის გარეშე, ფსიქოტროპული საშუალებებით მოსწავლის გამოცხადება;
მოსწავლისათვის შეუფერებელი სხვა ქმედება.

პუნქტი V – სასტიკი საყვედური, შესაძლოა, გამოყენებულ იქნეს შემდეგ შემთხვევებში:

IV პუნქტით გათვალისწინებული დისციპლინური გადაცდომის განმეორებით ჩადენისას, თუ მოსწავლის მიმართ უკვე გამოყენებულია დისციპლინური პასუხისმგებლობის წინა ზომა (საყვედური) ან შინაგანაწესით გათვალისწინებული დისციპლინური გადაცდომის სისტემატურად ჩადენისას, რის გამოც მიზანშეწონილია მის მიმართ დისციპლინური სახდელის სახით სასტიკი საყვედურის გამოყენება დისციპლინური პასუხისმგებლობის წინა ზომის გამოყენების გარეშე;

სკოლაში დასაქმებულის/მოსწავლის მშობლის/კანონიერი წარმომადგენლის/სკოლის ტერიტორიაზე შემოსული გარეშე პირის სიტყვიერი შეურაცხყოფა;
სკოლის ტერიტორიაზე მოსწავლის გამოცხადება შემდეგი ნივთებით: ნებისმიერი სახის იარაღი, კასტეტი ან ბასრი ნივთი, რომელიც შეიძლება გამოყენებულ იქნეს იარაღად, ელექტროშოკური მოწყობილობა, ნებისმიერი სხვა ნივთი, რომელიც შეიძლება საფრთხეს უქმნიდეს სიცოცხლესა და ჯანმრთელობას;
მოსწავლისათვის შეუფერებელი სხვა ქმედება.

პუნქტი VI – სკოლიდან დათხოვნა, დროებით, 5 სასწავლო დღემდე სკოლის დირექტორის მიერ შეიძლება გამოყენებულ იქნეს შემდეგ შემთხვევებში:

V პუნქტით გათვალისწინებული დისციპლინური გადაცდომის განმეორებით ჩადეა) ნისას, თუ მოსწავლის მიმართ უკვე გამოყენებულია დისციპლინური პასუხისმგებლობის წინა ზომა (სასტიკი საყვედური) ან შინაგანაწესით გათვალისწინებული დისციპლინური გადაცდომის სისტემატურად ჩადენისას, რის გამოც მიზანშეწონილია მის მიმართ დისციპლინური სახდელის სახით სასტიკი საყვედურის გამოყენება დისციპლინური პასუხისმგებლობის წინა ზომის გამოყენების გარეშე;

სკოლაში დასაქმებულის/მოსწავლის მშობლის/კანონიერი წარმომადგენლის/სკოლის ტერიტორიაზე შემოსული გარეშე პირის ფიზიკური შეურაცხყოფა;
მოსწავლის მიერ სკოლის ტერიტორიაზე ექიმის შესაბამისი ნებართვის გარეშე ფსიქოტროპული საშუალებების გამოყენება;
სკოლის ტერიტორიაზე მოსწავლის გამოცხადება შემდეგი ნივთებით: ნარკოტიკული საშუალებები, ასაფეთქებელი და მომწამლავი ნივთიერებები;
მოსწავლისათვის შეუფერებელი სხვა ქმედება.

პუნქტი VII – სკოლიდან დათხოვნა, დროებით, 5-დან 10 სასწავლო დღემდე დისციპლინური კომიტეტის მიერ შეიძლება გამოყენებულ იქნეს შემდეგ შემთხვევებში:

VI პუნქტით გათვალისწინებული დისციპლინური გადაცდომის განმეორებით ჩადენისას, თუ მოსწავლის მიმართ უკვე გამოყენებულია დისციპლინური პასუხისმგებლობის წინა ზომა (სკოლიდან დროებით დათხოვნა – 5 სასწავლო დღემდე) ან შინაგანაწესით გათვალისწინებული დისციპლინური გადაცდომის სისტემატურად ჩადენისას, რის გამოც მიზანშეწონილია მის მიმართ დისციპლინური სახდელის სახით სასტიკი საყვედურის გამოყენება დისციპლინური პასუხისმგებლობის წინა ზომის გამოყენების გარეშე;

ფულის ან სხვა ნივთების გამოძალვა;
მოსწავლის მიერ სკოლის ტერიტორიაზე შემდეგი ნივთების გამოყენება: ნებისმიერი სახის იარაღი, კასტეტი ან ბასრი ნივთი, რომელიც შეიძლება გამოყენებულ იქნეს იარაღად, ელექტროშოკური მოწყობილობა, ნარკოტიკული საშუალებები, ნებისმიერი სხვა ნივთი, რომელიც შეიძლება საფრთხეს უქმნიდეს სიცოცხლესა და ჯანმრთელობას.

სასარგებლო საქმიანობის დაკისრება შეიძლება გამოყენებულ იქნეს, თუ სკოლა მიიჩნევს, რომ მოსწავლის მიერ დისციპლინური გადაცდომისას, სასარგებლო საქმიანობის დაკისრებით მეტად არის შესაძლებელი მისი დისციპლინის გაუმჯობესება და განმეორებით დისციპლინური გადაცდომის ჩადენის პრევენცია.

საშუალო საფეხურზე მოსწავლის სკოლიდან გარიცხვა, სკოლის დისციპლინური კომიტეტის მიერ შეიძლება გამოყენებულ იქნეს:

მოსწავლის მიერ შინაგანაწესით გათვალისწინებული დისციპლინური გადაცდომის ჩადენისას, თუ მის მიმართ გამოყენებულია დისციპლინური პასუხისმგებლობის წინა ზომა (სკოლიდან დროებით დათხოვნა 5-დან 10 სასწავლო დღემდე) ან პირდაპირ, დისციპლინური პასუხისმგებლობის წინა ზომების გამოყენების გარეშე, თუ მოსწავლის მიერ ჩადენილი ქმედება  განზრახ არსებით ზიანს აყენებს სკოლის ინტერესებს, თუ საფრთხე ექმნება სხვა მოსწავლის ან სკოლაში დასაქმებული პირის ჯანმრთელობას ან/და უსაფრთხოებას.

გადაცდომათა ერთობლიობის დროს, სკოლაში დასაქმებულ პირს/მოსწავლეს დაეკისრება უფრო მძიმე გადაცდომისთვის გათვალისწინებული სახდელი. გადაცდომათა ერთობლიობა გულისხმობს რამდენიმე გადაცდომის ჩადენას, რომლებიც გამოვლენილია, მაგრამ მასზე დისციპლინური სახდელის დაკისრება ჯერ არ მომხდარა.

მოსწავლის დისციპლინური სახდელის მოქმედების ვადაა 3 თვე. თუ მოსწავლემ სახდელის დაკისრებიდან 3 თვის ვადაში არ ჩაიდინა ახალი დისციპლინური გადაცდომა, რისთვისაც არ დაკისრებია ახალი დისციპლინური სახდელი, იგი ითვლება დისციპლინური სახდელის არ მქონედ.

ასევე იხილეთ: 

შენიშვნა და გაფრთხილება სასკოლო ფორმაზე უარის თქმის გამო და მშობლის პასუხი, რომლის შვილიც ფორმის ტარებას არ აპირებს

მას შემდეგ, რაც ფორმების სავალდებულოდ შემოღება დაანონსდა, არაერთხელ დაისვა კითხვა – რა „სასჯელი“ განისაზღვრებოდა მოსწავლისთვის, თუკი სკოლაში განათლების სამინისტროს მიერ დადგენილი დიზაინის პიჯაკის, შარვლისა თუ ქვედაკაბის გარეშე გამოცხადდებოდა.

რას ამბობდა განათლების მინისტრი

„თუ ეს არის მიზანმიმართული ნაბიჯი, რომ არ მინდა და არ ჩავაცმევ ჩემს შვილს ფორმას, ამ შემთხვევაში პირველ რიგში იწარმოებს აღმზრდელობითი კომპონენტი და მშობელთან იქნება არაერთგზის გასაუბრება საკითხთან დაკავშირებით… წარმოიდგინეთ, კლასში 28 ბავშვს აცვია ფორმა და ერთს – არა, რადგან მშობელმა გადაწყვიტა, რომ შვილს ფორმა არ ჩააცვას. და არც ახსნა-განმარტება არსებობს და არც მიზეზი. მშობელმა, შესაძლოა, მანიპულირება მოახდინოს ბავშვით. ასეთ შემთხვევაში ჩვენ ბავშვთან კი არ გვაქვს პრეტენზია, ჩვენ პრეტენზია გვაქვს მშობელთან. მშობლის გადაწყვეტილება ეწინააღმდეგება შინაგანაწესს, საერთო სტანდარტსა და საერთო მიდგომას, რომელიც საზოგადოების უდიდესი უმრავლესობისთვის მისაღებია. მინდა დაგარწმუნოთ, რომ ყველა შემთხვევას გავივლით ინდივიდუალურად და სკოლა მაქსიმალურად იმუშავებს აღმზრდელობითი კუთხით მშობელთან…

ყველა სკოლაში შექმნილია დისციპლინური კომისია და ეს არის მათი პრეროგატივა და გადასაწყვეტი. შინაგანაწესის არაერთგზის დარღვევის გამო, რა გადაწყვეტილებას მიიღებენ, ამას სკოლა განსაზღვრავს. სამინისტრო გვერდში დაუდგება თითოეულ სკოლას, დირექტორს, მასწავლებელს, რომ ბავშვის საუკეთესო ინტერესებიდან გამომდინარე, მაქსიმალურად ჯანსაღი გარემო იყოს უზრუნველყოფილი სასწავლო პროცესის დროს“.

რა ჩაწერეს სკოლებმა შინაგანაწესში

EDU.ARIS.GE-მ ნახა თბილისისა და საქართველოს ერთ-ერთი რეგიონის სკოლების შინაგანაწესი, რომელშიც განსაზღვრულია, კონკრეტულად, რა ღონისძიებებს გაატარებს სკოლა ფორმის ტარებაზე უარის თქმის შემთხვევაში.

1. ობიექტური მიზეზის გარეშე სასკოლო ფორმის ტანსაცმლის ტარებაზე უარის თქმის შემთხვევაში სკოლა იყენებს შემდეგ თანმიმდევრულ ღონისძიებებს:

ა) პირველი შემთხვევა – მშობლის/კანონიერი წარმომადგენლის ინფორმირება, მიზეზების დადგენა და დარღვევის აღმოსაფხვრელად გონივრული ვადის მიცემა;

ბ) შემდგომი განმეორება – დისციპლინური დევნის დაწყება ამ შინაგანაწესით დადგენილი წესით.

2. დისციპლინური ღონისძიების გამოყენებამდე მოსწავლესა და მშობელს უნდა მიეცეთ განმარტების წარმოდგენის შესაძლებლობა.

3. დისციპლინური სახდელის დაკისრებისას მხედველობაში უნდა იქნას მიღებული:

ა) მოსწავლის ასაკი;
ბ) დარღვევის მიზეზი;
გ) დარღვევის განმეორებითობა;
დ) მოსწავლის ჯანმრთელობა და ინდივიდუალური საჭიროებები.

რას გულისხმობს დისციპლინური დევნის დაწყება და დისციპლინური სახდელის დაკისრება

დისციპლინურ გადაცდომად მიიჩნევა მოსწავლის მიერ სკოლის შინაგანაწესით დადგენილი ჩაცმულობის წესის (სამოსი, იერსახე და სხვა) დაუცველად სკოლის ტერიტორიაზე გამოცხადება (გამონაკლისი დაიშვება სკოლის მიერ წინასწარ განსაზღვრულ ღონისძიებებში მონაწილეობისას), რის გამოც, დისციპლინური სახდელის სახით, თავდაპირველად, შესაძლოა, გამოყენებულ იქნას შენიშვნა, განმეორებით ჩადენისას კი – გაფრთხილება. მოსწავლეს გააფრთხილებენ დისციპლინური გადაცდომის სისტემატურად ჩადენისთვისაც, რის გამოც მიზანშეწონილია მის მიმართ დისციპლინური სახდელის სახით გაფრთხილების გამოყენება დისციპლინური პასუხისმგებლობის წინა ზომის გამოყენების გარეშე.

როგორია ერთი მშობლის მოსაზრება ფორმებზე, დისციპლინურ დევნასა და სახდელზე

ნათია ქოიავას შვილი თბილისის 23-ე საჯარო სკოლის მე-5 კლასში სწავლობს. მშობელი EDU.ARIS.GE-სთან საუბრისას აცხადებს, რომ მოსწავლე, საკუთარი გადაწყვეტილებით, სკოლაში ფორმით სიარულს არ აპირებს, თავად კი გეგმავს, რომ ზოგადსაგანმანათლებლო დაწესებულებას სასკოლო სამოსზე უარის თქმა შემდეგნაირად დაუსაბუთოს:

„ფორმის ჩაცმა ხომ არ არის ერთჯერადი პროცესი. ანუ გამოდის, რომ ყოველდღე ბავშვი უნდა ვატირო, დავსტრესო, „გავკოჭო“, ჩავაცვა, დავუზიანო ფსიქიკა, მივაყენო ბავშვობის სერიოზული ტრავმა, შევაძულო სწავლა და სკოლა. სწორედ ამას წარვადგენ სკოლაში იმის დასაბუთებად, თუ რატომ არ ივლის ბავშვი ფორმით. მე სულაც მომხრე რომ ვიყო, მას არ სურს. ხშირად ამბობენ – „ბავშვს ვინ ეკითხება?!“. გაოგნებული ვარ – მოსწავლემ უნდა ჩაიცვას ფორმა და აბა, ვის ეკითხება?! თუ შეიცვლის მოსაზრებას და ფორმის ჩაცმას გადაწყვეტს, მე, რა თქმა უნდა, მხარს დავუჭერ“.

ჩვენი რესპონდენტის თქმით, იმ შემთხვევაში, თუ მის შვილს დისციპლინური სახდელი დაეკისრება, შესაბამის ზომებს მიმართავს:

„ზედმეტად თუ შეაწუხებენ ჩემს შვილს შენიშვნებით და გაფრთხილებებით, რა თქმა უნდა, განცხადებით მივმართავ პირველ რიგში სკოლის დირექციას, რომ ნუ გადაატანინებენ ბავშვს ყურადღებას სასწავლო პროცესიდან.

რაც შეეხება აღმზრდელობით კომპონენტს და მშობლებთან მრავალგზის გასაუბრებას, არც დრო მაქვს და არც სურვილი, რომ სულ სკოლის კარებზე ვიყო. ერთხელ რომ დავუსაბუთებ, რატომ არ დადის ბავშვი სკოლაში ფორმით, მეორედ რაღატომ უნდა დამიბარონ – კიდევ უნდა მოვუყვე თავიდან და ვასწავლო ზეპირად? გამოდის, აღმზრდელობითი ღონისძიებების გატარება იქით მომიწევს“.

როგორც მშობელი აღნიშნავს, სასკოლო ფორმების საყოველთაოდ შემოღების ინიციატივა არღვევს „ზოგადი განათლების შესახებ“ კანონს, რომლის მიხედვითაც, ფორმის შემოღების უფლება აქვს ნებისმიერ სკოლასა და სასკოლო საზოგადოებას ერთი კონკრეტული სკოლისთვის და „არა ერთ ადამიანს და ერთ სამინისტროს“.

„ეს არის კანონის დარღვევა, რაზეც მე, როგორც მშობელს, პროტესტი მაქვს. „ერთი კაცის თავსმოხვეულ გადაწყვეტილებას დავემორჩილოთ“ – ამას მე ჩემს შვილს არ ვასწავლი. სულ სხვა საკითხი იქნებოდა, ეს რომ ყოფილიყო მოსწავლეებისა და მშობლების ჩართულობით, სასკოლო საზოგადოების გადაწყვეტილება… და რაც ყველაზე უფრო სამწუხაროა, პოლიესტერის უნიფორმები ძალიან მალე ნაგავსაყრელზე აღმოჩნდება“, – უთხრა ნათია ქოიავამ EDU.ARIS.GE-ს.

ასევე იხილეთ:

დადგინდა, რა ფერის და როგორი სამოსი უნდა ეცვას მოსწავლეს სასკოლო ფორმის პიჯაკის ქვეშ

„დაუშვებელია შორტი, ბრიჯი, გამჭვირვალე სამოსი“ – გაფრთხილება სკოლებიდან იმ მშობლებს, რომელთა შვილების კლასებშიც ფორმა ჯერ არ არის

იმის გარდა, რომ ამ კლასებისთვის ფორმა სავალდებულოდ შემოვიდა, საჯარო სკოლების შინაგანაწესით სასკოლო ფორმის ტანსაცმელთან შესათავსებელი სამოსის სახეობა და ფერიც განისაზღვრა, რაც იმას ნიშნავს, რომ თუ თქვენი შვილი დაწყებით საფეხურზე სწავლობს, მას პიჯაკის შიგნით წითელ, ყვითელ, ვარდისფერ ან ნებისმიერ სხვა კონტრასტული ფერის სამოსს ვეღარ ჩააცმევთ.

EDU.ARIS.GE თბილისისა და რეგიონის საჯარო სკოლების მაგალითზე გიჩვენებთ, რა ჩაიწერა სკოლის შინაგანაწესში და რა მიიჩნევა სასკოლო ფორმის ტანსაცმელთან შესათავსებელ სამოსად.

სასკოლო ფორმის ტანსაცმელთან შესათავსებელი სამოსი მოიცავს პიჯაკის ქვეშ ჩასაცმელ ზედა სამოსს. პიჯაკის ქვეშ ჩასაცმელი ზედა სამოსი შესაძლებელია იყოს:

1. პერანგი ან ბლუზა;
2. პოლოს ტიპის მაისური;
3. სადა მაისური;
4. მაღალსაყელოიანი ზედატანი;
5. სვიტერი ან ჯემპრი.

პიჯაკის ქვეშ ჩასაცმელი ზედა სამოსის ძირითადი ფერი უნდა იყოს ერთ-ერთი შემდეგი:

• თეთრი
• ცისფერი ან ღია ლურჯი
• ღია ნაცრისფერი

დასაშვებია ამ ფერების ერთმანეთთან კომბინაცია.

დადგენილია, რომ ზედატანი უნდა იყოს სადა. მასზე არ უნდა იყოს განთავსებული დიდი ზომის ან მკვეთრად კონტრასტული წარწერა, გამოსახულება, ორნამენტი.

დასაშვებია:

1. მცირე ზომის მწარმოებლის ნიშანი;
2. სხვა ფერის ღილი, კანტი, ნაკერი ან მცირე ზომის დეკორატიული ელემენტი, თუ იგი არ განსაზღვრავს სამოსის ძირითად ფერს.

სკოლების შინაგანაწესში ასევე გაწერილია, რომ:

სასკოლო ფორმის ტანსაცმლის ტარების წესის შესრულებაზე კონტროლს ახორციელებს კლასის დამრიგებელი ან უსაფრთხოებაზე პასუხისმგებელი პირი.

კონტროლი უნდა განხორციელდეს მოსწავლის პირადი სივრცისა და ღირსების დაცვით. დაუშვებელია მოსწავლის საჯაროდ შემოწმება, გაკრიტიკება ან სხვა მოსწავლეებისგან დამამცირებელი ფორმით გამორჩევა.

ასევე იხილეთ: 

„დაუშვებელია შორტი, ბრიჯი, გამჭვირვალე სამოსი“ – გაფრთხილება სკოლებიდან იმ მშობლებს, რომელთა შვილების კლასებშიც ფორმა ჯერ არ არის

სკოლას კომბინირებული გამოცდის ჩატარების უფლებამოსილებას ანიჭებს ცვლილება, რომელიც „ექსტერნატის ფორმით მიღებული განათლების სერტიფიცირების დებულების დამტკიცების შესახებ“ ბრძანებაში განხორციელდა.

საქართველოს განათლების, მეცნიერებისა და ახალგაზრდობის მინისტრის ახალი ბრძანების მიხედვით, V კლასის II სემესტრიდან XII კლასის ჩათვლით სპორტის საგნობრივ ჯგუფში გაერთიანებულ საგნებში და არჩევით საგნებში მოსწავლე შეფასდება ჩათვლის სისტემით: ჩაეთვალა/არ ჩაეთვალა. ექსტერნმა, ექსტერნატის გამოცდის დაძლევისთვის, აღნიშნულ საგნებში უნდა მიიღოს შეფასება – ჩაეთვალა.

ბრძანება 11 სექტემბერს გამოქვეყნდა და ძალაშია იმავე დღიდან.

განსაკუთრებით დაინტერესებულთათვის: განათლების მინისტრის ბრძანება

ასევე იხილეთ: 

გამოცხადდა რეგისტრაცია I-XI კლასების პროგრამის ექსტერნატის ფორმით დაძლევის მსურველთათვის – ვადები

როცა მოსწავლე საქართველოს სკოლაში გადმოდის – უცხოეთში მიღებული ზოგადი განათლების აღიარების წესი ამოქმედდა

„პოლიგლოტი“ მოსწავლეებს, მშობლებსა და მასწავლებლებს ულოცავს სწავლის დაწყებას და მათ წარმატებულ წელს უსურვებს.

„გილოცავთ ახალი სასწავლო წლის დაწყებას. გისურვებთ სიხარულს, ბედნიერებასა და ულევ წარმატებას ცოდნის უკიდეგანო სამყაროში“, – აცხადებენ სკოლაში.

გიმნაზიის მიერ 15 სექტემბერს გამოქვეყნებული ინფორმაციით, ოლიმპიადის პროგრამა როგორც ინდივიდუალურ, ისე გუნდურ დავალებებს მოიცავდა, მონაწილეებს კი შესაძლებლობა ჰქონდათ, გამოევლინათ ინგლისური ენის ცოდნა, კრიტიკული აზროვნება, კომუნიკაციისა და გუნდური მუშაობის უნარები, შემოქმედებითი მიდგომა და საკუთარი იდეების ეფექტურად წარმოჩენის შესაძლებლობა.

განსაკუთრებული წარმატებით იასპარეზა AIA-GESS-ის გუნდმა B1 დონის გუნდურ პროექტში, სადაც პირველი ადგილი 100 ქულით დაიკავა. გუნდის წევრები არიან:

• ირაკლი ცაგარეიშვილი
• ნანიკო ჩიმჩიური
• მარიამ ჭუასელი
• ნინი ოქრაძე

B2 დონის გუნდურ პროექტში AIA-GESS-ის გუნდმა მეორე ადგილი 94 ქულით მოიპოვა. გუნდის წევრები არიან:

• კესო ღვინიაშვილი
• თორნიკე სიხარულიძე
• დავით ტყემალაძე
• გიორგი ჩილინგარაშვილი

ინდივიდუალურ კატეგორიაში Honorable Mention – ღირსების ჯილდო დაიმსახურეს:

• თეკლა კოშაძემ – 92.5 ქულა
• ნინი ოქრაძემ – 95 ქულა

ოლიმპიადაში ასევე წარმატებით იასპარეზეს ირაკლი ხურცილავამ, მარიამ ზაქაშვილმა და მარიკო ომიაძემ.

IELO 2026-ის მნიშვნელობა მხოლოდ აკადემიური შედეგებით არ შემოიფარგლება. საერთაშორისო გარემოში მონაწილეობამ მოსწავლეებს მისცა შესაძლებლობა, ინგლისური ენა რეალურ კომუნიკაციაში გამოეყენებინათ, გაცნობოდნენ სხვადასხვა ქვეყნის კულტურებსა და ტრადიციებს, დაემყარებინათ ახალი მეგობრული კავშირები და უფრო თავდაჯერებულები გამხდარიყვნენ.

„ვულოცავთ ჩვენს მოსწავლეებს ამ მნიშვნელოვან წარმატებას, ვამაყობთ თითოეული მათგანის მიღწევით და ვუსურვებთ კიდევ ბევრ ახალ შესაძლებლობასა და საერთაშორისო გამარჯვებას!

განსაკუთრებულ მადლობას ვუხდით დელეგაციის ხელმძღვანელ მასწავლებლებს – თამარ უსანეთაშვილსა და ლალი ტერტერაშვილს, მოსწავლეების მხარდაჭერისა და საერთაშორისო ოლიმპიადაში მათი წარმატებული მონაწილეობის ხელშეწყობისთვის“, – აცხადებენ გიმნაზია AIA-GESS-ში.

ზოგადსაგანმანათლებლო დაწესებულებების ეზოებში დილიდან, ტრადიციულად, ხალხმრავლობა და მოსწავლეების, მშობლებისა და მასწავლებლების საზეიმო განწყობა იგრძნობოდა. მღელვარებას განსაკუთრებით ვერ მალავდნენ მშობლები, რომელთა შვილებისთვისაც დღეს სკოლის ზარი პირველად დაირეკა. EDU.ARIS.GE-მ, რომელიც დღეს თბილისის 180-ე საჯარო სკოლაში იმყოფებოდა, გადაწყვიტა, სწორედ პირველკლასელთა მშობლების მოლოდინების, სურვილების შესახებ მოესმინა და რეფორმის ხელშესახები შედეგის – სასკოლო ფორმის ავ-კარგიანობაც გაეანალიზებინა.

ციცი ფანგანს, რომელმაც დღეს სკოლაში მეოთხე შვილი შეიყვანა, ფორმაც მოსწონს და მისი ფასიც. მშობელი სასკოლო სამოსის სხვა პრაქტიკულ დეტალებზეც გვესაუბრება და აღნიშნავს, რომ ზოგადად, კმაყოფილია ჩინეთში შეკერილი ფორმებით და საქართველოში, რომელიმე ადგილობრივ სამკერვალოში, იდენტური ტანსაცმლის შეკერვაზე არც უფიქრია:

„ძალიან კარგი განწყობა გვაქვს, ბედნიერად ვგრძნობთ თავს. ბავშვმა ფორმა რომ ჩაიცვა, აღარ იხდიდა, ისე მოეწონა. ზოგადად, მიხარია ფორმებთან დაკავშირებული სიახლე, რადგან მიმაჩნია, რომ ეს ბიუჯეტურია და მოსაგვარებლადაც უფრო მარტივია. ჩვენ განათლების სამინისტროს ფორმა შევიძინეთ. ზოგი აკერინებს, თუმცა, მე გადავწყვიტე, მეყიდა. ძალიან მომწონს და კმაყოფილი ვარ. ერთი პიჯაკი და ორი შარვალი ვიყიდეთ და 71 ლარი გადავიხადეთ 20%-იანი ფასდაკლებით. 70 ლარად პიკაჯს და ორ შარვალს სხვა დროს უბრალოდ ვერ ვიყიდდით“.

მაია კაველიძის შეფასებით, სასკოლო სამოსი სინთეტიკურია, თუმცა სუფთა ბამბის სარჩული აქვს. როგორც მშობელი ამბობს, ფორმაში შემავალი კომპონენტები მარტივად ირეცხება და არც მათი გაუთოვება წარმოადგენს სირთულეს:

„დიდი მოლოდინით შევდივართ პირველ კლასში. იმედი მაქვს, რომ წარმატებული ბიჭი იქნება. ერთნაირად შემოსილი ბავშვები მომწონს, კარგია. შესაძლოა, ამას რაღაც უარყოფითი ნიუანსებიც ჰქონდეს, მაგრამ საერთო ჯამში, მაინც მოსაწონია. სასკოლო ფორმაზე იმხელა აჟიოტაჟი იყო ატეხილი, რომ ვაიმე, სინთეტიკაა – კი, სინთეტიკაა, მესმის, მაგრამ არ არის ისეთი ხარისხი, როგორც ამას ხატავდნენ. რა თქმა უნდა, 100%-ით ბამბა არ არის, მაგრამ ჩაიცმევა. შარვალსაც და პიჯაკსაც სუფთა ბამბის სარჩული აქვს. ისეთი უხეში ქსოვილი არ არის, როგორც ამას სოციალურ ქსელში ახასიათებდნენ. ჩვენ შევიძინეთ განათლების სამინისტროს მიერ ჩამოტანილი ჩინეთში შეკერილი ფორმები. თავიდან ვფიქრობდი, ერთ პიჯაკსა და ერთ შარვალს ვუყიდი მხოლოდ და მეორე შარვალს შევაკერინებ-მეთქი, მაგრამ შემდეგ გადავწყვიტე, რომ მეორე შარვალიც მეყიდა. ფორმა მარტივად ირეცხება, გაუთოვებაც მარტივია. მე პირადად ჩვეულებრივი უთოთი ძველებურად – სველი ნაჭრით გავაუთოვე. პიჯაკზე კი ორთქლის უთო დავახმარე“.

ერთნაირ პიჯაკებში, შარვლებსა და ქვედაკაბებში გამოწყობილი ბავშვები ძალიან მოსწონს კიდევ ერთ ჩვენს რესპონდენტს, თუმცა შენიშვნა აქვს სასკოლო ტანსაცმლის სეზონურობასთან დაკავშირებით.

„ძალიან უხდებათ ფორმები ბავშვებს. ახლა, რომ ვუყურებ პირველკლასელებს, ძალიან ლამაზები არიან. თავიდან წარმოდგენა მქონდა, რომ საშინელება იქნებოდა, მაგრამ – არა, ძალიან მომეწონა. ერთადერთი რაც შემიძლია გითხრათ, შარვალი თხელია, ჩემი შვილი შარვლის შიგნით არაფერს იცვამს და იმედი მაქვს, რომ ზამთრისთვის რამე ალტერნატივა გვექნება. ფორმა უკვე გავრეცხე და დავაუთოვე. ძალიან არ იჭმუჭნება, უთო კი ისედაც ყველაფერს სჭირდება. მარტივად უთოვდება, ჩვეულებრივი უთოთი“, – ამბობს პირველკლასელის მშობელი.

ფორმა „არ ბრწყინავს“ და არც „ძალიან ცუდია“ რუსუდან გენებაშვილისთვის. მშობლის თქმით, სასკოლო სამოსის ხარისხზე სოციალურ ქსელებში გაკეთებული უარყოფითი შეფასებები და რეალური სურათი ერთმანეთისგან განსხვავებულია:

„დღეს ძალიან კარგი განწყობა გვაქვს. ჩემი მესამე შვილი შედის სკოლაში. ერთი სული ჰქონდა, რომ ფორმა ჩაეცვა და წამოსულიყო, თან უხდება და მეც მომწონს. ზოგადად, სასკოლო ფორმას მივესალმები, ბავშვებს შორის სხვანაირ დამოკიდებულებებს ჩამოაყალიბებს. რაც შეეხება ხარისხს, რამაც საზოგადოებაში გარკვეული აჟიოტაჟი გამოიწვია, ჩემი აზრით, ნორმალური ხარისხისაა – არ ბრწყინავს, თუმცა არც ძალიან ცუდია. ისეთი გამოხმაურება ჰქონდა, რომ მთლად ასეთიც არ არის. ფორმა უკვე გავრეცხე, ორთქლის უთოთი გავაუთოვე შარვალიც და პიჯაკიც“.

თეონა ნასყიდაშვილისთვის კი მნიშვნელოვანია, რომ სასკოლო ფორმა სავალდებულო არა მხოლოდ დაწყებითი საფეხურის, არამედ მაღალი კლასების მოსწავლეებისთვისაც იყოს.

„ბავშვს ფორმა რომ ჩავაცვი, ძალიან მოეწონა და გაუხარდა. მესამე შვილი შემყავს სკოლაში, მშვენიერი განწყობა გვაქვს, გახარებული და ბედნიერები ვართ. ფორმა ჯერ არ გამირეცხავს და არ ვიცი, იჭმუჭნება თუ არა ძალიან. დაუთოვებით კი მარტივად დავაუთოვე. კმაყოფილი ვარ, ნორმალური, კარგი ფორმაა. თავიდანვე რომ ითქვა, რომ ფორმები სავალდებულო ხდებოდა, გამიხარდა, ვთქვი – „რა კარგია-მეთქი“. თუმცა, ვფიქრობ, რომ სჯობდა პირველკლასელების ნაცვლად, მაღალკლასელებს სცმოდათ და თუ მათთვისაც სავალდებულო გახდება, კარგი იქნება“, – განუცხადა EDU.ARIS.GE-ს თეონა ნასყიდაშვილმა.

ასევე იხილეთ: 

ცნობილია, ვისი ავტორობით დაიწერა და რა წერია ახალ სასკოლო წიგნებში – ელექტრონული ვერსიები კლასების მიხედვით (I ნაწილი)

მოამზადა მარიამ იმერლიშვილმა

სასკოლო ფორმები

დღეიდან, საქართველოს საჯარო სკოლებში I-VI კლასების მოსწავლეებისთვის ფორმის ტარება სავალდებულოა, თუმცა ზოგადსაგანმანათლებლო დაწესებულებების კარი კუბოკრული თუ ლურჯი პიჯაკებით დღეს მხოლოდ პირველკლასელებმა შეაღეს, დაწყებითი საფეხურის დანარჩენი კლასების მოსწავლეებისთვის კი სასკოლო სამოსი ამ ეტაპზე ხელმისაწვდომი არ არის. საქართველოს განათლების, მეცნიერებისა და ახალგაზრდობის სამინისტროს ინფორმაციით, მათთვის ფორმის ყიდვა პირველი სემესტრის განმავლობაში ეტაპობრივად იქნება შესაძლებელი.

მობილური ტელეფონები და სხვა ელექტრონული საკომუნიკაციო საშუალებები

დღეიდან, საჯარო სკოლების მოსწავლეები სასწავლო პროცესში მობილურ ტელეფონებს/სმარტფონებს, „ჭკვიან“ საათებს, პლანშეტურ და პორტატიულ კომპიუტერებს არამიზნობრივად ვეღარ გამოიყენებენ. სკოლაში მისულმა ბავშვმა მობილური ტელეფონი ან „ჭკვიანი“ საათი, გამორთულ მდგომარეობაში, სპეციალურად მოწყობილ დაცულ სათავსში, ხოლო პლანშეტური ან პორტატიული კომპიუტერი, ასევე გამორთული, ან ჩანთაში ან სათავსში უნდა განათავსოს – პირველი გაკვეთილის დაწყებიდან ბოლო გაკვეთილის დასრულების ჩათვლით – იგულისხმება შესვენებებიც. სიახლე დაწყებითი, საშუალო და საბაზო საფეხურების მოსწავლეებს ერთნაირად ეხებათ. ამ წესის დარღვევის შემთხვევაში კი მათ დისციპლინური პასუხისმგებლობა დაეკისრებათ, „სასჯელის“ ტიპს სკოლის შინაგანაწესი განსაზღვრავს.

ახალი წიგნები

დღეიდან, 1-ელ, მე-7 და მე-10 კლასების მოსწავლეებმა სრულიად ახალი სახელმძღვანელოებით  უნდა ისწავლონ. ეს იმას ნიშნავს, რომ ზოგადი განათლების რეფორმის ფარგლებში დაგეგმილი ერთ-ერთი სიახლე – „ერთი სახელმძღვანელოს“ პრინციპი ნაწილობრივ ამოქმედებულია. როგორც განათლების სამინისტრო გვპირდება, ზოგადი განათლების სამივე საფეხურზე ჰუმანიტარული და STEM მიმართულებების საგნებში – ქართული ენა და ლიტერატურა, ისტორია, გეოგრაფია, მათემატიკა, ფიზიკა, ქიმია, ბიოლოგია – სახელმძღვანელოები 2028 წლის 15 სექტემბრამდე უნდა შეიცვალოს.

ცვლილებები საგნების სწავლების მიხედვით

ქართული ენა და ლიტერატურა – I-VI, VIII და X-XII კლასების მოსწავლეები ისწავლიან საგანს – „ქართული ენა და ლიტერატურა“. VII და IX-კლასელები კი „ქართულ ენას“ და „ქართულ ლიტერატურას“ ისწავლიან ცალ-ცალკე საგნებად.

ინგლისური ენა – I კლასში აღარ ისწავლება. მისი შესწავლა II კლასიდან დაიწყება.

ისტორია – VII კლასში ისწავლება საგანი „მსოფლიოს ისტორია“ და ისწავლება , VIII-IX და XI-XII კლასებში – საგანი „ისტორია“ და VII და X-XII კლასებში – საგანი „საქართველოს ისტორია“.

ქიმია – აღნიშნულ საგანს VII-XII-კლასელები ისწავლიან.

სამოქალაქო განათლება – მოიცავს საგან „მოქალაქეობას“ და ისწავლიან VII-XII კლასების მოსწავლეები და სავალდებულო პროექტებით სწავლება – XI-XII კლასებში.

ეროვნული სასწავლო გეგმით გაწერილი ყველა სხვა სიახლე და ცვლილება შეგიძლიათ ნახოთ დამტკიცებულ დოკუმენტში საგნების მიხედვით

ასევე იხილეთ:

ასე ასწავლიან და შეაფასებენ მოსწავლეს სკოლაში – ახალი ესგ-ის „მნიშვნელოვანი“, „ფილოსოფიური“ და კოსმეტიკური ცვლილებები გასაგებ ენაზე

სკოლებში ელექტრონული საშუალებების გამოყენების წესები დამტკიცდა – სკოლისა და მოსწავლის უფლებები და ვალდებულებები

რა ვალდებულებები აქვს მოსწავლის კანონიერ წარმომადგენელს, მიმღებ სკოლას და თავად მოსწავლეს:

უცხოეთში სწავლის პერიოდში მიღებული განათლების აღიარება

1. უცხოეთში სწავლის პერიოდში მიღებული ზოგადი განათლების აღიარებას ახორციელებს ის ზოგადსაგანმანათლებლო დაწესებულება, რომელშიც პირს სურს სწავლის გაგრძელება.

2. უცხოეთში სწავლის პერიოდში მიღებული ზოგადი განათლების დაწყებითი ან საბაზო განათლების აღიარების მიზნით სრულწლოვანი პირი ან არასრულწლოვანი პირის კანონიერი წარმომადგენელი განცხადებით მიმართავს ზოგადსაგანმანათლებლო დაწესებულებას და წარუდგენს უცხოეთში სწავლის პერიოდში მიღებული ზოგადი განათლების დამადასტურებელი დოკუმენტის სანოტარო წესით დამოწმებულ ასლს სანოტარო წესით დამოწმებულ ქართულენოვან თარგმანთან ერთად. საერთაშორისო დაცვის მქონე პირი გათავისუფლებულია უცხოეთში სწავლის პერიოდში მიღებული ზოგადი განათლების დამადასტურებელი დოკუმენტის წარდგენის ვალდებულებისგან.

3. საქართველოს ზოგადსაგანმანათლებლო დაწესებულებაში დაწყებით ან საბაზო საფეხურზე სწავლის გაგრძელების მიზნით ზოგადსაგანმანათლებლო დაწესებულება:

ა) ატარებს გასაუბრებას და/ან ტესტირებას სწავლების ენის ფლობის დონის დადგენისა და სხვა საგნებში აკადემიური ცოდნის დონის განსაზღვრის მიზნით;

ბ) სრულწლოვან პირთან ან არასრულწლოვანი პირის კანონიერ წარმომადგენელთან შეთანხმებით, სკოლისათვის წარდგენილი უცხოეთში სწავლის პერიოდში მიღებული ზოგადი განათლების დამადასტურებელი დოკუმენტაციის შესაბამისად განსაზღვრავს დაწყებით ან საბაზო საფეხურზე ასაკის შესაბამის კლასს ან არაუმეტეს 2 კლასით დაბალ კლასს. სკოლასა და მშობელს შორის კლასის განსაზღვრასთან დაკავშირებული უთანხმოების შემთხვევაში უპირატესობა ენიჭება მშობლის გადაწყვეტილებას;

გ) მოსწავლეს ჩარიცხავს დაწყებით ან საბაზო საფეხურზე ექსტერნატის პროცედურების გავლის გარეშე;

დ) სწავლების ენის ფლობის დონისა და სხვა საგნებში/საგნობრივ ჯგუფებში აკადემიური ცოდნის გათვალისწინებით, მოსწავლის სოციალიზაციის ხელშეწყობისა და სასკოლო გარემოში ადაპტაციისთვის ადგენს რემედიაციის პროგრამას არაუმეტეს 2 სასწავლო წლის ვადით კონკრეტული სასწავლო წლისთვის ცალ-ცალკე.

4. საქართველოს ზოგადსაგანმანათლებლო დაწესებულებაში საშუალო საფეხურზე სწავლის გაგრძელების მიზნით პირის ჩარიცხვა დასაშვებია საბაზო განათლების დამადასტურებული დოკუმენტის წარდგენის საფუძველზე.

საშუალო საფეხურზე საერთაშორისო გაცვლითი პროგრამის ფარგლებში უცხოეთში სწავლის პერიოდში მიღებული განათლების აღიარება

1. საშუალო საფეხურის იმ მოსწავლეებს, რომელთაც საქართველოში მოსწავლის სტატუსი შეჩერებული ჰქონდათ არაუმეტეს ერთი სასწავლო წლით სხვადასხვა საერთაშორისო გაცვლით პროგრამაში მონაწილეობის მიზნით, უცხოეთში სწავლის პერიოდში მიღებულ განათლებას უღიარებს ზოგადსაგანმანათლებლო დაწესებულება, ხოლო იმ საგნების დაძლევა, რომელთა სასკოლო სასწავლო გეგმასთან შესაბამისობის დადგენაც ვერ ხერხდება ზოგადსაგანმანათლებლო დაწესებულების მიერ, განხორციელდება ინდივიდუალური გეგმით ან ექსტერნატის გამოცდის ჩაბარების გზით.

2. ინდივიდუალური გეგმით იმ საგნების დაძლევა, რომელთა სასკოლო სასწავლო გეგმასთან შესაბამისობის დადგენაც ვერ მოხერხდა ზოგადსაგანმანათლებლო დაწესებულების მიერ, დასაშვებია განხორციელდეს იმ შემთხვევაში თუ შესაბამისი კლასისთვის სასწავლო წლის დასრულებამდე დარჩენილია არანაკლებ 10 სასწავლო დღე. სხვა შემთხვევაში ამ საგნების დაძლევა ხორციელდება ექსტერნატის გამოცდის ჩაბარების გზით.

უცხოეთში სწავლის პერიოდში მიღებული განათლების აღიარების თავისებურებანი

1. საბაზო საფეხურის დამამთავრებელ კლასში მოსწავლის ამ წესის შესაბამისად ჩარიცხვის აუცილებელი წინაპირობაა სწავლების ენის ფლობა, რომელსაც ზოგადსაგანმანათლებლო დაწესებულება ადგენს ამ წესის მე-2 მუხლის შესაბამისად ჩატარებული შეფასების საფუძველზე იმ დონეზე, რომ მოსწავლემ შეძლოს საბაზო საფეხურის მისაღწევი შედეგების მინიმალურ დონეზე დაძლევა.

2. საქართველოს მოქალაქე დაბრუნებული მიგრანტი ოჯახების მოსწავლეებისთვის საქართველოს განათლების, მეცნიერებისა და ახალგაზრდობის სამინისტროს სსიპ – მასწავლებელთა პროფესიული განვითარების ეროვნული ცენტრი ახორციელებს ქართული ენის შემსწავლელ დისტანციურ კურსებს.

3. ზოგადსაგანმანათლებლო დაწესებულება ახორციელებს მხარდამჭერ ღონისძიებებს ამ წესის შესაბამისად ჩარიცხული მოსწავლეების აკადემიური და ფსიქო-ემოციური მხარდაჭერის მიზნით.

4. საქართველოს ზოგადსაგანმანათლებლო დაწესებულება უფლებამოსილია, პირი, რომელიც 2022 წლის 24 თებერვალს უკრაინაში დაწყებული საომარი მოქმედებების შედეგად ვერ ახერხებს უკრაინის ზოგადსაგანმანათლებლო დაწესებულებაში ზოგადი განათლების მიღების გაგრძელებას და გამოხატავს სურვილს, რომ სწავლა გააგრძელოს საქართველოს ზოგადსაგანმანათლებლო დაწესებულებაში, ჩარიცხოს იმ კლასის შესაბამის კლასში, რომელშიც აღნიშნული პირი ირიცხება/შეჩერებული აქვს მოსწავლის სტატუსი/შეწყვეტილი აქვს მოსწავლის სტატუსი ზოგადსაგანმანათლებლო დაწესებულებაში. ამ პუნქტით გათვალისწინებულ პირზე არ ვრცელდება ამ წესით გათვალისწინებული, უცხოეთში სწავლის პერიოდში მიღებული ზოგადი განათლების აღიარებისათვის დადგენილი რეგულაციები.

მე-4 პუნქტით გათვალისწინებული პირის საქართველოს ზოგადსაგანმანათლებლო დაწესებულებაში ჩარიცხვის მიზნით, საკმარისია ნებისმიერი დოკუმენტის წარმოდგენა, რომლითაც დასტურდება პირის უკრაინის ზოგადსაგანმანათლებლო დაწესებულებაში სწავლის ფაქტი. იმ შემთხვევაში, თუ დადგინდება წარმოდგენილი დოკუმენტის სიყალბე, საქართველოს ზოგადსაგანმანათლებლო დაწესებულების გადაწყვეტილება პირის ზოგადსაგანმანათლებლო დაწესებულებაში ჩარიცხვის შესახებ ბათილია მისი ძალაში შესვლის დღიდან. მე-4 პუნქტით გათვალისწინებული წესით ჩარიცხვის შესაძლებლობა ვრცელდება 2021-2022, 2022-2023, 2023-2024, 2024-2025, 2025-2026 და 2026-2027 სასწავლო წლებში ჩარიცხულ პირებზე.

ამავე თემაზე:

მოსწავლეს, რომელიც ჯერ უცხოეთში სწავლობდა, ზოგად განათლებას საქართველოში მიმღები სკოლა უღიარებს