ნიშნავს თუ არა დისციპლინა სიმკაცრეს? – „როცა კლასში წესრიგია, მოსწავლე უკეთ სწავლობს“

ავტორი: ანა კვიჟინაძე – განათლების სპეციალისტი, თბილისის 45-ე საჯარო სკოლის სამოქალაქო განათლების მასწავლებელი

დისციპლინა პირდაპირ გავლენას ახდენს სწავლებისა და სწავლის ხარისხზე, რადგან ის განსაზღვრავს, რამდენად ეფექტურად მიმდინარეობს გაკვეთილი, რამდენად არიან მოსწავლეები ჩართულები და რამდენად შეუძლია მასწავლებელს მიზნის მიღწევა. კარგად ორგანიზებული კლასი – მაღალი ხარისხის სწავლება; არეული კლასი – დაბალი შედეგები.

დისციპლინა საგაკვეთილო პროცესში:

1. ზრდის სასწავლო დროის ეფექტურ გამოყენებას – ნაკლები დრო იკარგება მოსწავლეთა დაწყნარებაზე, მეტი დრო რჩება ახსნაზე, პრაქტიკასა და განხილვაზე, გაკვეთილი მიმდინარეობს გეგმურად.

2. ზრდის მოსწავლეთა ჩართულობას – დისციპლინირებულ გარემოში მოსწავლე ყურადღებით უსმენს, აქტიურად მონაწილეობს, არ ეშინია აზრის გამოთქმის.

3. აუმჯობესებს აკადემიურ შედეგებს – დავალებები სრულდება, ინსტრუქცია სწორად ისმის, მეტი განმტკიცება.

4. ამცირებს სტრესს როგორც მასწავლებლის, ისე მოსწავლისთვის – დისციპლინის არსებობა ნიშნავს: ნაკლები კონფლიქტი, ნაკლები ყვირილი, უსაფრთხო გარემო.

5. ხელს უწყობს პოზიტიურ სასწავლო გარემოს – როცა წესები დაცულია: ურთიერთპატივისცემა იზრდება, ბულინგი ნაკლებია, მოსწავლეები უფრო თამამად ერთვებიან საგაკვეთილო პროცესში.

6. აძლიერებს მასწავლებლის პროფესიულ ეფექტიანობას – დისციპლინა საშუალებას აძლევს მასწავლებელს: გამოიყენოს სხვადასხვა მეთოდი, დაგეგმოს აქტივობები, იმუშაოს ინდივიდუალურად მოსწავლეებთან. არეულ კლასში ეს თითქმის შეუძლებელია.

როდესაც ვსაუბრობთ დისციპლინაზე უნდა გვახსოვდეს, რომ დისციპლინა არ ნიშნავს სიმკაცრეს, ის ნიშნავს სწორად ორგანიზებულ, უსაფრთხო და პოზიტიურ სასწავლო გარემოს, სადაც თითოეულ ბავშვს შეუძლია სწავლა, განვითარება და საკუთარი შესაძლებლობების გამოვლენა.

დაწყებით საფეხურზე საკლასო დისციპლინის უზრუნველყოფას ხელს უწყობს:

• მარტივი წესები, რომლებიც ბავშვებთან ერთად არის შემუშავებული და/ან შეთანხმებული;
• ყოველდღიური რუტინა და წინასწარ განსაზღვრული მოქმედებები;
• აქტიური, მრავალფეროვანი და საინტერესო გაკვეთილები;
• პოზიტიური განმტკიცება – შექება, წახალისება, მხარდაჭერა;
• მასწავლებლის მშვიდი, მაგრამ მტკიცე დამოკიდებულება;
• მშობლებთან თანამშრომლობა;
• უსაფრთხო და პატივისცემაზე დაფუძნებული გარემო.

როცა კლასში არის წესრიგი, მოსწავლე უფრო მეტად არის ჩართული, უკეთ სწავლობს და თავს დაცულად გრძნობს.

ასევე იხილეთ: 

„ამცირებს მარცხის შიშს“ – კიდევ რატომ არის მოსწავლისთვის აუცილებელი ჯგუფური მუშაობა სკოლაში

ის, რაც ყველა მოსწავლემ უნდა იცოდეს – როგორ ამოვიცნოთ ემოციები და ვისწავლოთ მათი მართვა