„ბუნებრივი თერაპია, უფასო და ძლიერ ეფექტიანი“ – რატომ არის თოვლში აქტივობები ბავშვებისთვის მნიშვნელოვანი

ავტორი: ქეთევან მჭედლიშვილი – თანამედროვე განათლების აკადემიის დაწყებითი კლასების მასწავლებელი

თოვლში აქტივობები ბავშვებისთვის მნიშვნელოვანია.

სეირნობა თოვლში – ავითარებს:

სენსორულ ინტეგრაციას – ცივი ჰაერი, განსხვავებული ზედაპირი, ხმების ჩახშობა თოვლით ამშვიდებს ნერვულ სისტემას;

ყურადღების კონცენტრაციას – ბავშვი იძულებულია, ნაბიჯებს დააკვირდეს;

ემოციურ რეგულაციას – ნელი მოძრაობა ბუნებაში ამცირებს შფოთვას.

არ ააჩქაროთ. სეირნობა უნდა იყოს ნელი. კითხვები დასვით: „რას ამჩნევ ირგვლივ?“ „რა ხმა გამოსცემს თოვლი, ნაბიჯების დროს?“. ეს ბავშვს აწმყოში აბრუნებს.

სრიალი – აძლიერებს:

ვესტიბულარულ სისტემას (ბალანსი, სხეულის კონტროლი);

საკუთარ შიშებთან ჯანსაღ შეხებას – ბავშვი სწავლობს რისკის შეფასებას;

თვითრწმენას – დაცემის შემდეგ ადგომა არის ძლიერი შინაგანი გამოცდილება.

არ უთხრათ „ფრთხილად იყავი“ ზედმეტად ხშირად. ეს ზრდის შიშს. სჯობს თქვათ: „ნახე, როგორ გააკონტროლო სიჩქარე“.

გუნდაობა (თოვლის გუნდებით თამაში) – ავითარებს:

სოციალურ უნარებს – წესებზე შეთანხმება, რიგის დაცვა;

აგრესიის ჯანსაღ გამოხატვას – ენერგიის დაცლა უსაფრთხო ფორმით;

ემპათიას – სწავლობს სხვების საზღვრების შეგრძნებას.

დააწესეთ მარტივი წესები ერთად: „სახეზე არ ვესვრით“, „თუ ვინმე გაჩერდება – ვჩერდებით“.
ეს ბავშვში პასუხისმგებლობას ზრდის და არა შიშს.

რატომ არის თოვლი განსაკუთრებით მნიშვნელოვანი ფსიქიკისთვის

სიმართლე ასეთია: თანამედროვე ბავშვები გადატვირთულები არიან ეკრანით, ხმაურით და მუდმივი სტიმულით.

თოვლი კი: ამცირებს ვიზუალურ ქაოსს, ანელებს რიტმს, აძლევს ნერვულ სისტემას დასვენების საშუალებას.

ეს არის ბუნებრივი თერაპია, უფასო და ძლიერ ეფექტიანი.

მთავარი „მესიჯი“ მშობლებისა და მასწავლებლებისთვის

თუ ბავშვს თოვლში თამაშის დროს: არ ვაჩქარებთ, არ ვაკონტროლებთ ზედმეტად, არ ვაშინებთ დაცემით – ის სწავლობს ყველაზე მნიშვნელოვანს: „სამყარო უსაფრთხოა და მე შემიძლია მასთან კონტაქტი“. ეს არის გაცნობიერებული თაობის საფუძველი.