ვარსკვლავებიან მოსასხამში იღბლიანი ბილეთებით – მოსწავლეთა გამოკითხვის მაგიური მეთოდი მასწავლებლისგან

როცა მოსწავლეს მისთვის ყველაზე რთულ საკითხს შეასწავლი, ის მადლიერებით გეტყვის: “მასწავლებელო, თქვენ მართლა კეთილი ჯადოქარი ყოფილხართ”.

პედაგოგიურ პრაქტიკაში ასეთი გულთბილი ეპიზოდები ხშირია.

დღეს, 30 იანვარს, EDU.ARIS.GE-მ უნდა გაგაცნოთ მასწავლებელი, რომელიც პირდაპირი მნიშვნელობით ჯადოქარია.

სკოლა „ნიკეს“ კეთილმა ჯადოქარმა მასწავლებელმა, თეა მალაყმაძემ მაგიური მოსასხამი და იღბლიანი ბილეთები იმ გზად აქცია, რომლითაც მოსწავლეებს ყველაზე რთულ საკითხებსაც კი შეასწავლის.

იხილეთ ფოტოები:

აი, რას მოგითხრობთ თეა მალაყმაძე:

„მინდოდა, შემაჯამებელი გაკვეთილები არასტანდარტული, მრავალფეროვანი და მოულოდნელობებით სავსე ყოფილიყო. გადავიქეცი იმ “ზღაპრის გმირად,” რომელიც ჯადოსნური სკივრიდან ჯადოსნურ დავალებებს ამოალაგებს და “თავდაყირა” დააყენებს საგაკვეთილო პროცესს.

„თითოეული მოსწავლე განსხვავებულია თავიანთი შესაძლებლობებიდან გამომდინარე. ზოგს თხრობა გამოსდის კარგად, ზოგს წერა, ზოგს კრიტიკული ანალიზი, ზოგს ხატვა და ა.შ. მასწავლებელი კი ნამდვილად არის ჯადოქარი. ის ჯადოსნური სკივრიდან ჯადოსნურ დავალებებს ალაგებს და მაგიურ ორომტრიალს აყენებს გაკვეთილზე. არასტანდარტული, მრავალფეროვანი და მოულოდნელობებით სავსე მეთოდები ნამდვილად იწვევს მოსწავლეების აღფრთოვანებას”,  – აგვიხსნა პედაგოგმა.