2023 წლის მესამე კვარტალში საქართველოში საშუალო თვიური ხელფასი გაიზარდა, განათლება კი საქმიანობების სახეებში ბოლო ადგილზეა

სტატისტიკის ეროვნული სამსახურის მიერ 15 დეკემბერს გამოქვეყნებული მონაცემებით, 2023 წლის მესამე კვარტალში საქართველოში საშუალო თვიური ნომინალური ხელფასი გასული წლის შესაბამის პერიოდთან შედარებით 16.3 პროცენტით, ანუ 260.4 ლარით გაიზარდა და 1 855.4 ლარი შეადგინა.

რაც შეეხება განათლებას, ის საქმიანობის სახეებში ხელფასის ოდენობის თვალსაზრისით ბოლო ადგილს იკავებს, მაგრამ ზრდა არის. საქსტატის მონაცემების თანახმად, განათლების მიმართულებაში მაჩვენებელი 920-დან 1039-ით შეიცვალა, რაც ნიშნავს, რომ ზრდა 119 ლარია.

ქვემოთ მოცემულ დიაგრამაზე წარმოდგენილია საშუალო თვიური ხელფასი ეკონომიკური საქმიანობის სახეების მიხედვით 2022-2023 წლების III კვარტალში და განათლების სექცია აღნიშნულია, როგორც “P”:

საქმიანობის სახეების მიხედვით, შედარებით მაღალი ხელფასი დაფიქსირდა შემდეგ დარგებში: ინფორმაცია და კომუნიკაცია – 3 958.1 ლარი; მშენებლობა – 3 033.4 ლარი; საფინანსო და სადაზღვევო საქმიანობები – 2 806.7 ლარი; პროფესიული, სამეცნიერო და ტექნიკური საქმიანობები – 2 615.6 ლარი.

საქმიანობის სახეების ჩამონათვალი იხილეთ ანგარიშის ბმულზე

გარდა ამისა, მონაცემები გამოქვეყნდა დასაქმებულთა სქესის მიხედვითაც. საქსტატის ცნობით, 2023 წლის მესამე კვარტალში ქალების საშუალო ხელფასი 1 459.1 ლარით, ხოლო კაცების – 2 233.9 ლარით განისაზღვრა. ხელფასების წლიურმა ზრდამ ქალებში 193.5 ლარი შეადგინა, ხოლო კაცებში – 329.1 ლარი. საქმიანობის სახეების მიხედვით კაცების ხელფასი ყველა სექტორში აღემატებოდა ქალების ხელფასს.

საანგარიშო პერიოდში, დაქირავებით დასაქმებულთა საშუალო თვიური ხელფასი ბიზნეს სექტორში 293.0 ლარით, ანუ 17.1% გაიზარდა და 2 007.2 ლარი შეადგინა. საქმიანობის სახეების მიხედვით ყველაზე მაღალი ხელფასი ფიქსირდება ინფორმაცია და კომუნიკაციის სექტორში – 4 073.1 ლარი. ასევე მშენებლობის სექტორში – 3 037 ლარი.

უწყების ანგარიშის მიხედვით, 2023 წლის მესამე კვარტალში არასამეწარმეო და საფინანსო სექტორში საშუალო თვიური ხელფასი გასული წლის შესაბამის პერიოდთან შედარებით 199.2 ლარით, ანუ 14.4%-ით გაიზარდა და 1 579.5 ლარი შეადგინა. რაც შეეხება რეგიონების მაჩვენებლებს, საშუალო ხელფასის სიდიდის მიხედვით, რეგიონებში თბილისი და მცხეთა-მთიანეთი ლიდერობს.

ასევე იხილეთ:

„გრძელვადიან მიზანს ვერ ხედავენ“ – რატომ ვერ დაძლია სხვადასხვა მთავრობამ რუბიკონი, სახელად „ღირსეული ხელფასი მასწავლებელს“?