როგორ უნდა განხორციელდეს მოსწავლეთა რემედიაციის პროგრამა – ინსტრუქცია საჯარო სკოლების ადმინისტრაციებს

სკოლებში 2024-2025 სასწავლო წლიდან მუშაობს რემედიაციის პროგრამა. რადგან ის ზოგადსაგანმანათლებლო დაწესებულებებისთვის მაინც ახალი ხილია, EDU.ARIS.GE  სკოლების მხარდაჭერის მიზნით, შეეცდება პროგრამის განხორციელების ზუსტი ინსტრუქცია მიიღოთ.

რა არის რემედიააციის პროგრამა?

სკოლებში 2024-2025 სასწავლო წელს დაიწყო რემედიაციის პროგრამა, რომელიც ეხება დაწყებით და საბაზი საფეხურზე იმ მოსწავლეებს, რომლებსაც განმავითარებელი და განმსაზღვრელი შეფასების მონაცემების მიხედვით, ცოდნის და უნარ-ჩვევების მნიშვნელოვანი ხარვეზები აღმოაჩნდათ.

უფრო მარტივად: რემედიაცია საჭირო ხდება, როდესაც მოსწავლეები არ არიან საკმარისად მომზადებულნი ან უჭირთ გარკვეული აკადემიური მიზნების მიღწევა. ეს შეიძლება გამოწვეული იყოს სხვადასხვა მიზეზით, როგორიცაა: სასწავლო მასალის არასაკმარისად გაგება, ინდივიდუალური სასწავლო საჭიროება, ენის ბარიერი ან სხვა პიროვნული მახასიათებლები.

EDU.ARIS.GE-ს რესპონდენტი თბილისის ერთ-ერთი დიდი საჯარო სკოლის სასწავლო ნაწილი და დირექტორის მოადგილე, ნარგიზ ქილიფთარია. ის მენტორი მასწავლებელია და სკოლის ადმინისტრაციაში 25 წლიანი მუშაობის გამოცდილება აქვს.

მაშ ასე, აი, რა რეკომენდაციას მიიღებთ გამოცდილი სპეციალისტისგან:

რემედიაციის პროგრამის ცხრილი სკოლებისთვის

რემედიაციის პროგრამის განხორციელების პირველი ეტაპი:

პირველ ეტაპზე საჭიროა სამიზნე ჯგუფის  დიაგნოსტიკური ტესტირება, დამრიგებლისა და საგნის მასწავლებლის შეფასებაზე დაყრდნობით; შემდეგ კი  ჯგუფის დაკომპლექტება, მშობლების ინფორმირება და თანხმობის მიღება; რემედიაცია სკოლაში ორი  ფორმატით მიმდინარეობს: გაკვეთილში ჩაშენებით, რომლის დროსაც  მასწავლებელი გაკვეთილის მსვლელობის პროცესში ერთ ან რამდენიმე მოსწავლეს მიზნობრივად უტარებს კონკრეტული უნარის გავარჯიშებაზე ორიენტირებულ აქტივობებს და დამატებითი გაკვეთილის სახით, არასაგაკვეთილო დროს (ძირითად გაკვეთილებამდე/შემდეგ) ერთ ან რამდენიმე მოსწავლეს მიზნობრივად უტარდება კონკრეტული უნარის გავარჯიშებაზე ორიენტირებული აქტივობები, თავისივე, ან სხვა მასწავლებლის მიერ;

სარემედიაციო ჯგუფის შექმნის შემდეგ იგეგმება ეს საფეხურები:

• რემედიატორი მასწავლებლების სამუშაო განრიგის შედგენა;
• რემედიაციის მიზნით გაკვეთილების ცხრილის შედგენა საგნების მიხედვით;
• სარემედიაციო პროგრამის და გაკვეთილების გეგმების შედგენა;
• სარემედიაციო გაკვეთილების წარმართვა;
• პროგრესის მონიტორინგი, შუალედური შეფასება;
• საბოლოო ეტაპი:  შემაჯამებელი შეფასება.

ქალბატონი ნარგიზი ამბობს, რომ კარგი სასკოლო პრაქტიკაა, როდესაც რემედიააცის განხორციელების ყველა ეტაპზე მაღალია მშობელთა ინტერესი და ჩართულობა, რადგან ისინი უზრუნველყოფენ შვილების დროულად გამოცხადებას დამატებითი გაკვეთილების შემთხვევაში; ასევე, არიან შემფასებლები სკოლის ძალისხმევის, რომელიც ასე მნიშვნელოვანია მათი შვილების აკადემიური მიღწევების გაუმჯობესებისთვის.