2024 წელს საქართველოში 10 800 მოსწავლეს შეუჩერდა ან შეუწყდა მოსწავლის სტატუსი – მიზეზები

საქართველოს სახალხო დამცველის უახლეს ანგარიშში, რომელიც 2024 წელს საქართველოში ადამიანის უფლებათა და თავისუფლებათა დაცვის მდგომარეობის შესახებ მომზადდა და აპრილში საკანონმდებლო ორგანოს გადაეგზავნა, წერია, რომ იმ მოსწავლეების რიცხვი, რომლებსაც 2024 წელს შეუჩერდათ ან შეუწყდათ სტატუსი, 11 ათასს აღწევს.

ანგარიშის თანახმად, ზოგადი განათლება ქვეყნის მასშტაბით ფუნქციონირებს 2 086 საჯარო და 206 კერძო სკოლა, რომელთაგან 9 პანსიონური მომსახურებისაა, ხოლო მოსწავლეთა ჯამური რაოდენობა, 2024-2025 სასწავლო წლის მონაცემებით, 640 499-ს შეადგენს. 2024 წელს ჯამურად 10800 მოსწავლეს შეუჩერდა ან შეუწყდა მოსწავლის სტატუსი, რაც 2601 მოსწავლით ნაკლებია 2023 წელთან შედარებით. აქედან 7 599 მოსწავლეს შეუჩერდა, ხოლო 3201 მოსწავლეს შეუწყდა მოსწავლის სტატუსი. 1976 (10800 მოსწავლიდან) უცხოეთის მოქალაქეა, 2 კი მოქალაქეობის არმქონე.

“სტატისტიკის თანახმად, სტატუსის შეჩერება ყველაზე ხშირად, დაკავშირებულია ისეთ საფუძვლებთან, როგორიცაა „ოჯახთან ერთად საზღვარგარეთ გამგზავრება“, „მშობლის/კანონიერი წარმომადგენლის განცხადება“, „პროფესიულ კოლეჯში სწავლის გაგრძელება“ და „ზედიზედ გაცდენების ზღვრული რაოდენობა“. ამასთანავე, ტერიტორიული განფენილობის მიხედვით, 2024 წელს სტატუსის შეჩერებისა და შეწყვეტის ყველაზე მაღალი მაჩვენებელი თბილისში (4170), ასევე, ქვემო ქართლისა (1979) და აჭარის (1273) რეგიონებში დაფიქსირდა”, – ვკითხულობთ ანგარიშში.

მოსწავლის სტატუსის შეჩერების/შეწყვეტის საფუძვლები:

საზღვარგარეთ ჯახთან ერთად გამგზავრება – 3 900

ფინანსური დავალიანება – 33

ჩარჩენილი ვაუჩერის გადაუხდელობა – 6

სკოლიდან გარიცხვა – 30

სწავლის გაგრძელება ოკუპირებულ ტერიტორიებზე – 23

ზედიზედ გაცდენის ზღვრული რაოდენობა – 1427

დაოჯახება – 43

გარდაცვალება- 62

მშობლის/მოსწავლის განცხადება – 2595

ჯანმრთელობის მდგომარეობა – 122

დონის დაძლევით ამორიცხვა – 218

მუშაობის დაწყება – 300

პროფესიულ კოლეჯში სწავლის გაგრძელება – 2041

საფუძვლები ცხრილის სახით

ომბუდსმენი აღნიშნავს, რომ მიუხედავად იმისა, რომ სახალხო დამცველი, წლებია, უთითებს მოსწავლის სტატუსის შეჩერების/შეწყვეტის ერთიანი სტატისტიკის სრულყოფისა და დახვეწის აუცილებლობაზე, განათლების, მეცნიერების და ახალგაზრდობის სამინისტროს ინფორმაციით, კვლავაც მიმდინარეობს მუშაობა სტატუსის შეჩერების მიმართვების სტატისტიკის დახვეწაზე, მათ შორის, შიდაუწყებრივ რეგულირებაში ცვლილებების კუთხით და პრაქტიკის გაანალიზების საფუძველზე.

მოსწავლის სტატუსის შეჩერების/შეწყვეტის სტატისტიკა

ასევე იხილეთ:

განათლების უფლება საქართველოში – რას წერს სახალხო დამცველი უახლეს ანგარიშში