საჭირო იქნება თუ არა 12-15 წლის ქრონიკულ დაავადებათა მქონე ბავშვებში ბუსტერ დოზა – თამარ გაბუნიას განმარტება

ქრონიკული დაავადებების მქონე 12-15 წლის ბავშვებში კორონავირუსზე აცრის ორი დოზა იქნება საკმარისი და “ბუსტერის” გამოყენება მათ შემთხვევაში არ განიხილება. ამის შესახებ ჯანდაცვის მინისტრის მოადგილე თამარ გაბუნიამ დღეს, 10 ოქტომბერს, ტელეკომპანია “რუსთავი 2”-ის ეთერში ისაუბრა.

როგორც მინისტრის მოადგილე ამბობს, დელტა შტამის ბავშვებში გავრცელება საქართველოში 1%-ზე დაბალია და ავადობა მხოლოდ თანმხლები ქრონიკული დაავადებების მქონე შემთხვევებში დამძიმდა. შესაბამისად, 12-დან 15-წლამდე ასაკობრივ ჯგუფში, საწყის ეტაპზე იმ ბავშვების აცრის რეკომენდაცია გაიცა, რომლებისთვისაც კოვიდით ინფიცირება უფრო მაღალ სასიცოცხლო რისკს წარმოადგენს.

საკითხზე დამატებითი დაზუსტება დღეს ჯანდაცვის მინისტრმაც გააკეთა: „12-დან 15 წლამდე ბავშვებისთვის, ჩვენების მიხედვით, ვისაც აქვთ ქრონიკული დაავადებები, დღესაც არის დაშვებული, რომ აიცრან. სხვა ბავშვებთან დაკავშირებით, საბჭო დამატებით მიიღებს გადაწყვეტილებას. ჯერჯერობით, ეს გადაწყვეტილება საბჭოზე მიღებული არაა“, – აღნიშნა ეკატერინე ტიკარაძემ.

შეგახსენებთ, რომ იმუნიზაციის საბჭოს 7 ოქტომბრის გადაწყვეტილებით, 12-იდან 15 წლამდე ასაკობრივ ჯგუფში მხოლოდ ქრონიკული დაავადებების მქონე ბავშვთა ვაქცინაციაა დაშვებული. ისინი “ფაიზერის” (Pfizer-BioNTech) ვაქცინით აიცრებიან.

რაც შეეხება “ბუსტერ” დოზას, იმუნიზაციის საბჭომ მის გამოყენებას მხარი დაუჭირა, მაგრამ მხოლოდ 50 წლის ზემოთ და ასევე ნებისმიერი ასაკის ქრონიკული დაავადებების მქონე, ან მაღალი რისკის პროფესიის ადამიანებში.