სასკოლო სახელმძღვანელოს გრიფირებამდე მისი რეცენზირების პროცესში მშობლებიც ჩაერთვებიან – ცვლილება კანონში

მინისტრ მიხეილ ბატიაშვილის ხელმოწერით, ცვლილება შევიდა „ზოგადსაგანმანათლებლო დაწესებულების სახელმძღვანელოს/სერიის გრიფირების წესის დამტკიცების შესახებ“ შესაბამის ბრძანებაში.

კერძოდ, მე–2 მუხლს დაემატა ახალი ქვეპუნქტი, რომლის საფუძველზეც კანონში გაჩნდა ქვეთავი სახელწოდებით „მშობელთა ჩართულობა“, რაც ითვალისწინებს შემდეგს:

„მშობელთა ჩართულობა  –  ზოგადსაგანმანათლებლო დაწესებულების მოსწავლის მშობლისთვის ან კანონიერი წარმომადგენლისთვის (შემდეგში – მშობელი) სახელმძღვანელოს/სერიის მაკეტის (ანონიმური ეგზემპლარი) გაცნობისა და მათზე არგუმენტირებული შენიშვნა/რეკომენდაციის წარდგენის შესაძლებლობა.“

ბრძანებაში განმარტებულია, რომ საზოგადოებრივი საწყისებიდან გამომდინარე, სახელმძღვანელოს რეცენზირების პროცესში ხორციელდება მშობლების ჩართულობა და მშობელს ექნება შესაძლებლობა, რომ მიიღოს და გაეცნოს სახელმძღვანელოს/სერიის ანონიმურ ეგზემპლარს და წარმოადგინოს მასზე საკუთარი არგუმენტირებული შენიშვნა ან რეკომენდაციები.

რაც შეეხება მშობელთა შერჩევას, როგორც ბრძანებაში წერია, „რეცენზირების პროცესში მშობელთა შერჩევის, მათი ჩართულობის წესი და პირობები განისაზღვრება სახელმძღვანელოს/სერიის მაკეტის რეცენზირების წესით“.

რაც შეეხება მშობლის მიერ გამოთქმული რეკომენდაციების გათვალისწინების ნაწილს, ცვლილების თანახმად, მშობელთა მიერ გამოთქმული შენიშვნა/რეკომენდაციების გაზიარების შესახებ გადაწყვეტილება მიიღება შესაბამისი საგნობრივი ჯგუფის წევრთა ხმათა უმრავლესობით, იმ შემთხვევაში, თუკი მაკეტზე გამოთქმული შენიშვნა/რეკომენდაცია მიმართულია მაკეტის გაუმჯობესებისკენ, საკმარისად დასაბუთებულია და მისი გათვალისწინება განპირობებულია აუცილებლობით.