პროფესიული კოლეჯის “განთიადის” მისიაა, მოამზადოს ადგილობრივი და საერთაშორისო შრომის ბაზარზე კუნკურენტუნარიანი, კვალიფიციური, მაღალი ზნეობრივი ფასეულობების მქონე კადრები, რითაც ხელს შეუწყობს დემოკრატიული საზოგადოების განვითარებას და ქვეყნის ეკონომიკურ წინსვლას. კოლეჯი ზრუნავს კადრების მუდმივ განვითარებაზე, ნერგავს თანამედროვე ტექნოლოგიებს, ხელს უწყობს სწავლას ბაზარზე მოთხოვნადი პროფესიული საგანმანათლებლო პროგრამების, პროფესიული გადამზადების და კვალიფიკაციის ამაღლების მოკლევადიანი პროგრამების შეთავაზებით. კოლეჯი განთიადი აქტიურად თანამშრომლობს კერძო სექტორთან, კონსულტირების გზით ხელს უწყობს კურსდამთავრებულებს საკუთარი ბიზნესის წამოწყებასა და თვითდასაქმებაში.

2012 წლის 24 აგვისტოს პროფესიული კოლეჯი „ორიენტის“ და პროფესიული კოლეჯი „განთიადის “ რეორგანიზაციის შედეგად დაფუძნდა პროფესიული კოლეჯი „განთიადი“. 2014 წლის 29 აგვისტოდან კოლეჯი 18 ავტორიზებულ პროფესიულ საგანმანათლებლო პროგრამას ახორციელებს. 2018 წლის 12 სექტემბერიდან კოლეჯს მიეცა უფლება განახორციელოს დამატებით შემდეგი პროფესიული საგანმანათლებლო პროგრამები: მეფუტკრე (დუალური მიდგომით), სამღებრო სამუშაოების შესრულება, თაბაშირ-მუყაოს კონსტრუქციების მონტაჟი, იატაკის და ფილის სამუშაოები. კოლეჯი ორიენტირებულია რეგიონის შრომის ბაზრისა და მოსახლეობის მოთხოვნებზე, რაც ხელს უწყობს კურსდამთავრებულთა დასაქმებას, ახლო კონტაქტების დამყარებას დამსაქმებლებთან, ახალი სპეციალობების დამატებას.