გიორგი ამილახვარმა კიდევ ერთი ახალი მოადგილე წარადგინა

საქართველოს განათლებისა და მეცნიერების მინისტრმა გიორგი ამილახვარმა მოადგილის თანამდებობაზე სამართლის დოქტორი, პროფესორი ნოდარ პაპუკაშვილი წარადგინა, რომელიც განათლებისა და მეცნიერების სამინისტროს 1-ელი მაისის ინფორმაციით, კურატორობას გაუწევს სამინისტროს უმაღლესი განათლებისა და მეცნიერების მიმართულებებს.

“ნოდარ პაპუკაშვილს საჯარო და კერძო სექტორში, მათ შორის განათლების სფეროში, მუშაობის მრავალწლიანი გამოცდილება აქვს. სხვადასხვა დროს ის იკავებდა სსიპ განათლების ხარისხის განვითარების ეროვნული ცენტრთან არსებული სააპელაციო საბჭოს თავმჯდომარისა და ერთ-ერთი კერძო უნივერსიტეტის რექტორის თანამდებობებს. გამოცემული აქვს 14 სამეცნიერო ნაშრომი და 3 მონოგრაფია”, – აცხადებენ განათლებისა და მეცნიერების სამინისტროში.

უმაღლესი განათლების მიმართულებით განათლების მინისტრის მოადგილის თანამდებობას აქამდე ნუნუ მიცკევიჩი იკავებდა. მისი ამჟამინდელი თანამდებობის შესახებ გიორგი ამილახვარის უწყების მიერ მოწოდებულ ინფორმაციაში საუბარი არ არის.