ილიას სახელმწიფო უნივერსიტეტში ფოტოგამოფენა: იაპონიის ატომური დაბომბვა გაიმართება
![](https://edu.aris.ge/news/wp-content/uploads/2023/12/AXALI1-458x257.png)
16 დეკემბერს, ილიას სახელმწიფო უნივერსიტეტის G კორპუსის ფოიეში ილიას სახელმწიფო უნივერსიტეტისა და ატომური დაბომბვის მსხვერპლთა ნაგასაკის მშვიდობის ეროვნული მემორიალური დარბაზის ორგანიზებით გაიხსნება ფოტოგამოფენა „იაპონიის ატომური დაბომბვა“.
ექსპოზიციაზე წარმოდგენილი იქნება 1945 წლის 6 აგვისტოს ჰიროშიმისა და 1945 წლის 9 აგვისტოს ნაგასაკის დაბომბვის შედეგის ამსახველი ფოტონამუშევრები, გადარჩენილ ადამიანთა წერილობითი და ვიდეოჩანაწერები.
ფოტოგამოფენა გაგრძელდება 2024 წლის 30 იანვრამდე და დასრულდება ესეების კონკურსში „მსოფლიო ატომური იარაღის გარეშე“ გამარჯვებული სტუდენტების დაჯილდოებით.
სტუდენტებისთვის ასევე მოეწყობა ორიგამის წეროების ვორკშოპი. მათ მიერ შექმნილი ნამუშევრებიც საგამოფენო სივრცეში განთავსდება.
გამოფენის შესახებ
მეორე მსოფლიო ომის მიწურულს, 1945 წლის 6 და 9 აგვისტოს, ამერიკის შეერთებულმა შტატებმა იაპონიის ქალაქებში, ჰიროშიმასა და ნაგასაკიში, ჩამოაგდო 2 ატომური ბომბი, რომლებმაც მყისიერად გაანადგურა ორივე ქალაქი და შეიწირა 200 000-ზე მეტი ადამიანის სიცოცხლე, ხოლო მრავალი ათასი სიცოცხლის ბოლომდე იტანჯებოდა ატომური დაბომბვის შედეგად მიღებული დაზიანებებით.
იაპონიის მთავრობამ ატომური ბომბის მსხვერპლთა ხსოვნის პატივსაცემად და ატომური დაბომბვით შექმნილი საშინელი რეალობის გასაცნობად ჰიროშიმასა და ნაგასაკიში დააარსა ატომური დაბომბვის მსხვერპლთა მშვიდობის ეროვნული მემორიალური დარბაზები, რომლებიც მარადიული მშვიდობის მემორიალის როლს ასრულებს.
2005 წლიდან ატომური დაბომბვის მსხვერპლთა ნაგასაკის მშვიდობის ეროვნული მემორიალური დარბაზის ინიციატივით მთელი მსოფლიოს მასშტაბით ეწყობა ფოტოგამოფენები, რათა მთელ მსოფლიოს შეატყობინონ ატომური დაბომბვით მიღებული ზარალის შესახებ და მოუწოდონ მსოფლიოს ატომური იარაღის გარეშე მშვიდობიანი სამყაროს შექმნის აუცილებლობაზე. გამოფენები უკვე გაიმართა 13 ქვეყნის 24 ქალაქში, მსგავსი გამოფენა საქართველოში პირველად ეწყობა.
დრო: 16 დეკემბერი, 2023 – 30 იანვარი, 2024, 10:00 -20:00 საათი
ადგილმდებარეობა: ილიას სახელმწიფო უნივერსიტეტის G კორპუსის ფოიე, გ. წერეთლის ქ. N1
-
უნიკალური, ორმაგი ხარისხის სამაგისტრო პროგრამა ილიაუნიში – ატმოსფერო და ახლო კოსმოსის მეცნიერებები by ილიას სახელმწიფო უნივერსიტეტი
-
ილიაუნის 2024 წლის კურსდამთავრებულების გამოსაშვები ცერემონია გაიმართა by ილიას სახელმწიფო უნივერსიტეტი
-
საბუნებისმეტყველო მეცნიერების პოპულარიზაციის ღია კარის დღეს ბოტანიკურ ბაღში ილიაუნი გამართავს by ილიას სახელმწიფო უნივერსიტეტი