ISET-ის კვლევით ინსტიტუტსა და ეკონომიკის სამინისტროს შორის ურთიერთთანამშრომლობის მემორანდუმი გაფორმდა

16 იანვარს საქართველოს ეკონომიკისა და მდგრადი განვითარების სამინისტროსა და თსუ-ს ეკონომიკის საერთაშორისო სკოლის, ISET-ის კვლევით ინსტიტუტს შორის ურთიერთთანამშრომლობის მემორანდუმი გაფორმდა, რომელსაც ხელს მოაწერეს საქართველოს ვიცე-პრემიერმა, ეკონომიკისა და მდგრადი განვითარების მინისტრმა გიორგი კვირიკაშვილმა და ISET-ის კვლევითი ინსტიტუტის დირექტორმა ერიკ ლივნიმ.

“ძალინ მოხარული ვართ, რომ ჩვენი თანამშრომლობა შედგა. “აისეტი” არის ერთ-ერთი გამორჩეული საერთაშორისო სკოლა და ჩვენი თანამშრომლობა წარიმართება ბევრი მიმართულებით. მნიშვნელოვანია, რომ ისინი გააკეთებენ ასევე ეკონომიკური პოლიტიკის პერიოდულ ანალიზს. ვფიქრობთ, საერთო ჯამში ძალიან საინტერესოა ეკონომიკურ წრეებთან თანამშრომლობა, რომელიც ასევე ითვალისწინებს სტუდენტების დასაქმებას სახელმწიფო და არასახელმწიფო სექტორში. ეს თანამშრომლობა მნიშვნელოვანია განსაკუთრებით ახლა, როდესაც ძალიან ბევრი გამოწვევაა ეკონომიკის სფეროში” – განაცხადა გიორგი კვირიკაშვილმა.

როგორც შეხვედრაზე ითქვა, ხელმოწერილი მემორანდუმის საფუძველზე მხარეები თანხმდებიან ერთობლივი პროექტების, ტრენინგებისა და კვლევების ორგანიზებასა და განხორციელებაზე. გარდა ამისა, მემორანდუმი გულისხმობს ISET-ის წარჩინებული სტუდენტების სტაჟირებას საქართველოს ეკონომიკისა და მდგრადი განვითარების სამინისტროში და მათ ჩართულობას სხვადასხვა საქმიანობაში.

ISET-ის კვლევითი ინსტიტუტი დაარსდა 2011 წელს თსუ-ს ეკონომიკის საერთაშორისო სკოლის ბაზაზე. კვლევითი ინსტიტუტის საქმიანობაში ჩართულნი არიან როგორც ISET-ის ლექტორები, ასევე სამაგისტრო პროგრამის საუკეთესო კურსდამთავრებულები, რომლებიც აწარმოებენ ეკონომიკურ კვლევებს, ატარებენ ტრეინინგებს და ეწევიან საკონსულტაციო საქმიანობას კერძო და საჯარო სექტორისთვის.