რა უპირატესობა აქვს პროფესიით პედაგოგ პარტნიორს

ძვირფასო მასწავლებლებო, ახლა არდადეგებია, შესაძლოა, მოიწყინეთ კიდეც. მართალია, ბატონი მინისტრი მუდამ ზრუნავს ჩვენს განწყობაზე და ამიერიდან ჯანმრთელობაზეც, მაგრამ თუკი ვაშლიდან მიღებული კალიუმი, ფოსფორი, კალციუმი, B, C და სხვა ვიტამინები საკმარისი არ არის თქვენი განწყობის ასამაღლებლად, ერთ საინტერესო პოსტს შემოგთავაზებთ.

რამდენიმე დღის წინ გადავაწყდი სტატიას, რომელშიც ჩამოთვლილი იყო 15 მიზეზი იმისა, რატომ უნდა აირჩიოთ თქვენს რომანტიკულ პარტნიორად მასწავლებლის პროფესიის წარმომადგენელი. ძალიან ვიხალისე და გადავწყვიტე, ცოტაოდენი ინტერპრეტაციით მეთარგმნა აღნიშნული სტატია. რა თქმა უნდა, ნებისმიერი ქვემოთ ჩამოთვლილი თვისება სხვა პროფესიის ადამიანებსაც მიესადაგება და პირიქით – ეს თვისებები ყველა მასწავლებელს როდი ახასიათებს. მაგრამ, ვიმეორებ, პოსტი სახალისოა და სერიოზულობას ნუ მოვთხოვთ.

მოკლედ, თუკი ბოლოს და ბოლოს გადაწყვიტეთ, გარისკოთ და ვინმესთან რომანტიკული ურთიერთობა წამოიწყოთ, დაბეჯითებით გირჩევთ, რომ ის პედაგოგთა კასტიდან შეარჩიოთ. ასეთ შემთხვევაში:

1. თქვენ გექნებათ ბევრი თავისუფალი დრო, ვინაიდან 120 ესეს შესწორებას და გაკვეთილების დაგეგმვას ერთი-ორი საათი არ ჰყოფნის.

2. ყველაფერი, რასაც თქვენს რჩეულს აჩუქებთ, ძვირფასი და განსაკუთრებული იქნება. ისინი ხომ მიჩვეულნი არიან ქაღალდის ნიანგებისა და პლასტელინის სოკოების ჩუქებას.

3. შაბათ-კვირას გარანტირებული გექნებათ დილის ძილი და საყვარელი სერიალის მომდევნო ეპიზოდების ყურება.

4. ის იქნება ძალიან ხელმომჭირნე და ყაირათიანი. მასწავლებლები არ ხარჯავენ ბევრ ფულს, იმიტომ რომ არც აქვთ იგი.

5. ის იქნება ძალიან შემოქმედებითი. ბევრ ადამიანს იცნობთ, ვინც ტუალეტის ქაღალდის რულონისგან 100 სხვადასხვა ნივთს გააკეთებს?

6. ის იქნება ყველაზე მომთმენი, ამტანი, რკინის ნერვების მქონე ადამიანი მსოფლიოში. მასწავლებლები ხომ სულ ითმენენ, ელოდებიან, ხსნიან, ელოდებიან და ითმენენ. გიპასუხებთ ყველა შეკითხვაზე, იმათზეც კი, რომლებზეც უკვე ჩვიდმეტჯერ გიპასუხათ.

7. ის ყოველთვის შეძლებს თქვენს გამხიარულებას, მოგიყვებათ რა უამრავ დაუჯერებელ და სახალისო ისტორიას. ასევე ელვისუსწრაფესად გეცოდინებათ ყოველი ახალი პაროდიისა თუ სასაცილო ვიდეოს შესახებ. მოსწავლეები ამით მუდამ უზრუნველყოფენ მასწავლებლებს.

8. თავს ცნობილ ადამიანად იგრძნობთ, განსაკუთრებით სავაჭრო ცენტრებსა და მაკდონალდსში. რაღა თქვენ და რაღა კიმ კარდაშიანი. შესაძლოა, პაპარაცებიც დაგედევნონ. მოსწავლეები ყველგან არიან. ეს მეცნიერულად დასაბუთებული ფაქტია.

9. თუკი უბრალოდ საუბარი გჭირდებათ, თუნდაც დინოზავრებზე, მასზე კარგ მსმენელს ვერსად ნახავთ.

10. თუ შვილის ყოლა ჯერ არ გინდათ, არამგონია მან დაგაძალოთ. ისინი ათობით ბავშვს უვლიან ყოველდღიურად. და პირიქითაც, თუკი შვილისთვის მზრუნველი მშობელი გსურთ, მასწავლებელზე კარგი ვინ უნდა იყოს?

11. არ მოგიწევთ ნერვიულობა, როდესაც მას ოჯახს წარუდგენთ. მასწავლებლებმა ყველაზე უკეთ იციან მშობლებთან საუბარი. ის მათ აუცილებლად მოხიბლავს.

12. როგორც და სადაც არ უნდა ჩაფლავდეთ, ამას არასდროს გაგრძნობინებთ. ჯერ აუცილებლად აღნიშნავს, რა მოეწონა, ხოლო შემდეგ ტაქტიკურად შემოგაპარებთ, რისი გამოსწორებაც სურს. სენდვიჩის მეთოდზე გსმენიათ? ასე თქვენი ეგო მუდამ კმაყოფილი იქნება. გარდა ამისა, მუდამ მზად ექნება სათადარიგო გეგმა ექსტრემალური შემთხვევებისთვის.

13. და ბოლოს, მათ ყოველთვის თან ექნებათ კალამი და სხვა საკანცელარიო აღჭურვილობა. რა იცით, რაში დაგჭირდეთ.

იხილეთ ორიგინალი