„სამაგისტრო გამოცდაზე თემა იყო, რამდენად ეფექტურია ელექტრონულ სწავლება, არ ველოდი, რადგან ძალიან გაცვეთილი და მარტივია“

26 ივლისს, 2022 წლის ზაფხულის გამოცდებს, მაგისტრანტობის მსურველებიც შეუერთდნენ. საერთო სამაგისტრო გამოცდისთვის სულ 9 500-ზე მეტი აპლიკანტია დარეგისტრირებული და დღეს მონაწილეთა ტესტირება წაკითხულის გააზრებასა და ანალიტიკურ წერაში ჩატარდა.

გამოცდაზე მოცემულ საკითხებსა და მის სირთულეზე, 103-ე საჯარო სკოლაში განთავსებულ საგამოცდო ცენტრიდან გამოსული აპლიკანტები EDU.ARIS.GE-ს თან საუბრობენ და ამბობენ, რომ ასეთ იოლ დავალებებს არ ელოდნენ:

მაგისტრანტობის მსურველი ლევან კვარაცხელია გამოცდაზე მოცემულ საკითხებს დეტალურად იხსნენებს და ამბობს, რომ კონკრეტული საკითხის გარდა, ყველაფერი მარტივად დაწერა.

„ერთი თემა ონლაინ სწავლებაზე იყო, – გაკვეთილის, ლექციის და ა.შ. ჩატარება არის თუ არა ეფექტური, რაზეც ვუპასუხე, რომ არ არის ეფექტური და ყველა მივლანძღე, ვინც საჭირო იყო. რაც შეეხება მეორე თემას, ორი არხის ორი გადაცემა იყო მოყვანილი. ერთში მონაწილეობდა მსახიობი და ცნობილი კომიკოსი, მეორე გადაცემა საგანმანათლებლო ხასიათის იყო, რომელიც ორი წელი ეცადა რეიტინგში დაწეოდა მეორეს, რაც არ გამოუვიდათ. უნდა გვემსჯელა, რა იყო ამის მიზეზები. რაც შეეხება წაკითხულის გააზრებას, სამი თემა იყო: ერთ თემაში ეწერა ძველ ქართულ დამწერლობაზე, მეხუთედან მეათე საუკუნემდე ითარგმნებოდა ბერძნულიდან, სომხურიდან და ეწერა, რომ ბერძნულიდან ნათარგმნი თანხვედრაში არ იყო დედანთან და ამ თემებზე იყო მოცემული კითხვები. ეს შედარებით მარტივი იყო. მეორე ტექსტი ათენში სახალხო კრებაზე იყო და აქედან კითხვებზე უნდა გვეპასუხა, რაც მაინცდამაინც რთული არ იყო. რაც შეეხება მესამე ტექსტს, ცოტა “გადამწვარიც” ვიყავი და ეს შედარებით მერთულა. ცხოველებზე ეწერა, საინტერესო იყო, მაგრამ უკვე ვეღარ ვაზროვნებდი”, – გვითხრა ლევან კვარაცხელიამ.

გამოცდიდან გამოსული ლიკა ხუნდაძე ჩვენთან საუბარში ამბობს, რომ ტესტური დავალებები რთული არ ყოფილა.

„ორი ტელევიზია იყო წარმოდგენილი. ერთ-ერთ არხზე გასართობი გადაცემა გადიოდა “მღერიან ცნობილი ადამიანები.” მეორე არხზე კი ინტელექტუალური გადაცემა. ორივე გადაცემა დროში ემთხვეოდა ერთმანეთს. ინტელექტუალურმა გადაცემამ გასართობს კონკურენცია ვერ გაუწია და ამაზე უნდა დაგვეწერა არგუმენტები. თემა მოვიდა რამდენად ეფექტურია ელექტრონულ სწავლება, რასაც არ ველოდი, რადგან ძალიან მარტივი და გაცვეთილი თემაა. ტექსტებიდან ერთ-ერთი ათენის სახალხო კრებაზე იყო, მეორე ქართული თარგმანები, მესამე კი, ცხოველთა სახეობების გადარჩენასა და ინსტინქტებზე”, – მოგვიყვა ლიკა ხუნდაძე.

ხვალ, 27 ივლისს, მომავალი მაგისტრები გამოცდას ლოგიკურ და რაოდენობრივ მსჯელობაში ჩააბარებენ. საგამოცდო ტესტი შედგება ოთხი ნაწილისაგან და ნებისმიერ სამ ნაწილში ზღვრის გადალახვის შემთხვევაში გამოსაცდელს საერთო სამაგისტრო გამოცდა წარმატებით ჩაბარებულად ეთვლება.

ასევე იხილეთ:

განახლებადი ინფორმაცია გამოცდების შესახებ

გაწევრიანდი ჯგუფში “აბი გლუკოზა აბიტურიენტებისთვის” და გაიგე ყველა საჭირო სიახლე

მოამზადა თამარ შუკვანმა