სახელმწიფო ენის გამოცდაში მონაწილეობა სულ 45-მა პირმა მიიღო

განათლების, მეცნიერებისა და ახალგაზრდობის სამინისტროს მხარდაჭერითა და შეფასებისა და გამოცდების ეროვნული ცენტრის ორგანიზებით საქართველოში პირველად სახელმწიფო ენის გამოცდა ჩატარდა.

ოფიციალური მონაცემებით, გამოცდაზე დარეგისტრირებული 51 აპლიკანტიდან ტესტირებაში მონაწილეობა 45-მა მიიღო.

„2025 წელს, ქართული განათლების სისტემის ისტორიაში პირველად, სახელმწიფო ენის გამოცდა ჩატარდება“

შეფასებისა და გამოცდების ეროვნულ ცენტრში ქართულ ენაში განსხვავებული სირთულის 2 გამოცდა ჩატარდა. პირველი განსაზღვრავს ქართული ენის ფლობის A1 და A2 დონეებს, ხოლო მეორე – B1 და B2 დონეებს.

“სახელმწიფო ენის გამოცდის მიზანია, ქართულის, როგორც სახელმწიფო ენის სტატუსის განმტკიცება, გაძლიერება და ენის ფუნქციონირების არეალის გაფართოება. გამოცდა განსაკუთრებით მნიშვნელოვანია უცხოელი სტუდენტებისთვის, საჯარო სამსახურში მუშაობის უფლების მქონე უცხოეთის მოქალაქეებისთვის, უცხოეთში მცხოვრები ქართველებისა და ბიზნესსექტორში დასაქმებული არაქართულენოვანი კადრებისთვის”, – წერია შეფასებისა და გამოცდების ეროვნული ცენტრის ინფორმაციაში.

რა მოთხოვნები უნდა დააკმაყოფილოს პირმა, რომელიც სახელმწიფო ენის გამოცდას ჩააბარებს – გამოქვეყნდა ტესტის ნიმუშები, მოსმენის დავალებები, შეფასების სქემა და კრიტერიუმები

სახელმწიფო ენის ფლობის დონის დამადასტურებელ დოკუმენტს, გამოცდის შედეგების საფუძველზე, სახელმწიფო ენის დეპარტამენტი გასცემს.

გამოცდა წელიწადში რამდენჯერმე ჩატარდება. მასში მონაწილეობის მიღება ნებაყოფლობითია და ნებისმიერ მსურველს შეუძლია.