ავარიულობის მიზეზით სწავლის შეწყვეტის შემდეგ, 21-ე საჯარო სკოლის მოსწავლეებმა, მშობლებმა და პედაგოგებმა აქცია გამართეს

თბილისის 21-ე საჯარო სკოლასთან, (ყოფილი მე-6 „გერმანული სკოლა“), სადაც 2026-2027 სასწავლო წლის დაწყებიდან 2 დღეში სასწავლო პროცესი შეჩერდა, მოსწავლეების, მშობლების და მასწავლებლების აქცია მიმდინარეობს. როგორც სკოლის მიმდებარე ტერიტორიაზე შეკრებილები აცხადებენ, გუშინ, საღამოს საათებში, მიიღეს შეტყობინება, რომ დღეიდან, 18 სექტემბრიდან სწავლა უნდა შეჩერებულიყო, მიზეზად კი სკოლის შენობის ავარიულობა დასახელდა. მათი განცხადებით, ამ ეტაპზე ზუსტად არ იციან, შენობას ემუქრება დემონტაჟი, ჩატარდება რეაბილიტაცია, თუ უბრალოდ სარემონტო სამუშაოებია დაგეგმილი. სასკოლო საზოგადოებისთვის ასევე უცნობია, რა რეჟიმში გააგრძელებენ სწავლა-სწავლების პროცესს – იქნება ეს ონლაინ სწავლება, თუ სხვა სკოლაში, მეორე ცვლაში მოუწევთ სიარული.

როგორც აქციაზე მყოფმა, 21-ე საჯარო სკოლის ერთ-ერთი მოსწავლის მშობელმა, მანანა ონიანმა EDU.ARIS.GE-სთან საუბრისას განაცხადა, სკოლის შენობას 2023 წელს ჩაუტარდა სამხარაულის ექსპერტიზა, რომლის დასკვნის მიხედვითაც, შენობა ავარიული არ არის. აქედან გამომდინარე მშობლისთვის გაუგებარია, რა გახდა მიზეზი სასწავლო პროცესის მოულოდნელად შეჩერების:

„მოწმენდილ ცაზე, წუხელ შეგვატყობინეს. თვითონ მასწავლებლებმაც არ იცოდნენ. ამ წუთებში მიმდინარეობს სამეურვეო საბჭოს სხდომა და ველოდებით გადაწყვეტილებას, ველოდებით დასკვნას. თუ სამხარაულის ექსპერტიზის დასკვნა არის გაყალბებული, გვინდა მოვითხოვოთ ალტერნატიული ექსპერტიზა. თუ მართლა ავარიულია, ჩვენ გიჟები კი არ ვართ… შოკი გვაქვს ყველას“.

სწავლის შეჩერების შესახებ გადაწყვეტილება მოულოდნელი აღმოჩნდა აქციის კიდევ ერთი მონაწილის, 21-ე საჯარო სკოლის გეოგრაფიის წამყვანი მასწავლებლის, მარიამ ხიდეშელისთვისაც. როგორც პედაგოგმა გვითხრა, სკოლა რამდენიმე წელია ითხოვდა რემონტს, თუმცა პასუხად იღებდნენ, რომ მათთან რემონტი ჯერ არ იგეგმებოდა. მისი თქმით, შექმნილ ვითარებაში არ არის გამორიცხული, რომ პედკოლექტივი დაიშალოს, რადგან სკოლის ყველა მასწავლებელი როგორც დაბალ, ისე მაღალ კლასებში ასწავლის და აქედან გამომდინარე, სხვა სკოლაში გადაყვანის შემთხვევაში, გადაწყობა ფიზიკურად ვერ მოხდება.

„ჩვენს სკოლას ცოტა სხვა სპეციფიკა აქვს – მაგალითად, 1-ელ კლასში რომ შედის მასწავლებელი, ის მე-11-შიც შედის. აქედან გამომდინარე, ასე მარტივად, უხეშად საფეხურების გაყოფა ვერ მოხდება და ყველაფერი ირევა – ვიღაც იძულებული იქნება და წავა. ჩვენ ვეფერებით ამ სკოლას. თუკი ვინმეს რამე შემხებლობა ჰქონია, ყველამ იცის, რომ ეს არ არის მხოლოდ სკოლა, ეს არის ბრენდი…

მას შემდეგ, რაც გაირკვევა, დემონტაჟია დაგეგმილი, თუ რემონტი და რას შემოგვთავაზებენ, იქიდან გამომდინარე იქნება ჩვენი რეაგირებაც. გვინდა, რომ შევინარჩუნოთ ეს სკოლა ზუსტად ისეთი, როგორიც არის“, – აცხადებს მასწავლებელი.

ალტერნატიულ შენობაში სწავლის გაგრძელებაა შექმნილ ვითარებში გამოსავალი ნინო სირაძისთვის. როგორც მშობელმა EDU.ARIS.GE-ს უთხრა, სწავლების ონლაინ რეჟიმზე, ან სხვა სკოლის შენობაში გადასვლა არ სურთ.

„მივიღეთ შეტყობინება, რომლის მიხედვითაც, განათლების სამინისტრომ გამოაცხადა, რომ სამხარაულის ექსპერტიზის დასკვნით შენობა სარეაბილიტაციოა. 2 წლის წინ, ამ სკოლამ გაიარა ავტორიზაცია. აქ სარეაბილიტაციო არაფერი იყო. 2 წლის შემდეგ რა მოხდა ისეთი, რომ სკოლა გახდა დასანგრევი?! მაშინ არ იყო საშიში და ახლა გახდა?!

ამ სკოლაში არის საგნობრივი სწავლა. ამ ეტაპზე ჩვენ გვინდა, რომ გამოგვიყონ ალტერნატიული ფართი, სადაც გადავა ყველა მოსწავლე პედკოლექტივთან ერთად. შევალთ დროებით, ვისწავლით და შემდეგ დავბრუნდებით ჩვენს სკოლაში“, – აღნიშნა მშობელმა

ასევე იხილეთ: 

„არ გვაქვს ილუზია, რომ წელს დავასრულებთ ყველა სკოლას – დავაჩქარებთ და მივიღებთ ისევ უხარისხოს“

ესაუბრა მარიამ იმერლიშვილი