სოხუმის სახელმწიფო უნივერსიტეტს ქართული უნივერსიტეტის რექტორი ესტუმრა

სოხუმის სახელმწიფო უნივერსიტეტის ჰუმანიტარულ მეცნიერებათა ფაკულტეტს სტუმრად, თვალსაჩინო ქართველი ისტორიკოსი და საზოგადო მოღვაწე, საქართველოს საპატრიარქოს წმინდა ანდრია პირველწოდებულის სახელობის ქართული უნივერსიტეტის რექტორი, პროფესორი სერგო ვარდოსანიძე ესტუმრა.

შეხვედრის ორგანიზატორი ისტორიის მიმართულების სტუდენტების მიერ ახლად შექმნილი „ახალგაზრდა ისტორიკოსთა ლიგა“ გახლდათ. მათ ღონისძიება სამოციქულო ეკლესიის ღირსშესანიშნავ თარიღებს: ავტოკეფალიის აღდგენის 100 წლისთავს, უწმინდესისა და უნეტარესის, სრულიად საქართველოს კათოლიკოს-პატრიარქის აღსაყდრებიდან 40 და დაბადებიდან 85 წლის იუბილეს მიუძღვნეს. სპეციალურად, ლექციაზე დასასწრებად დუშეთიდან ჩამოვიდა, ჰუმანიტარულ მეცნიერებათა ფაკულტეტის მაგისტრანტი – სალომე ლაზვიაშვილი, რომელიც დუშეთის ერთ-ერთი სკოლის მასწავლებელია და თან თავისი ხუთი მოსწავლე ჩამოიყვანა. 

სერგო ვარდოსანიძე აუდიტორიის წინაშე „ახალგაზრდა ისტორიკოსთა ლიგის“ პრეზიდენტმა, გიორგი კაციამ წარადგინა. სტუმარს მიესალმნენ: სოხუმის სახელმწიფო უნივერსიტეტის რექტორი, პროფესორი ზურაბ ხონელიძე; ყოფილი რექტორი, პროფესორი ჯონი აფაქიძე; ჰუმანიტარულ მეცნიერებათა ფაკულტეტის დეკანი, პროფესორი მერაბ ნაჭყებია და უნივერსიტეტის სამეცნიერო მიმართულების ხელმძღვანელი, ისტორიკოსი, პროფესორი ზურაბ პაპასქირი.