აბიტურიენტთა ჩარიცხვების შესახებ ინფორმაცია გამოქვეყნდა – გამოცდები 2026

2026 წლის აბიტურიენტთა უმაღლეს და პროფესიულ საგანმანათლებლო დაწესებულებებში ჩარიცხვის შესახებ ინფორმაცია უკვე ცნობილია. შეფასებისა და გამოცდების ეროვნულმა ცენტრმა (NAEC) გამოცდების შედეგები დღეს, 25 აგვისტოს გამოაქვეყნა.

იმის გასაგებად, მოიპოვა თუ არა სწავლის უფლება შესაბამის საგანმანათლებლო პროგრამაზე, გამოსაცდელი უნდა შევიდეს ვებგვერდზე online.naec.ge, შესაბამის ველში კი მიუთითოს პირადი ნომერი და პაროლი.

უმაღლესი განათლების რეფორმის ფარგლებში, წელს აბიტურიენტებს მიეცათ შესაძლებლობა, მათთვის სასურველი რაოდენობის უმაღლეს საგანმანათლებლო პროგრამებთან ერთად პროფესიული საგანმანათლებლო პროგრამებიც აერჩიათ.

ამასთანავე, სახელმწიფო უზრუნველყოფს იმ აბიტურიენტების სრულ დაფინანსებას, რომელთაც სწავლის უფლება მოიპოვეს სახელმწიფოს მიერ დაფუძნებულ უმაღლეს და პროფესიულ საგანმანათლებლო დაწესებულებებში.

შეფასებისა და გამოცდების ეროვნული ცენტრი შეახსენებს აბიტურიენტებს, რომ ხელშეკრულების გასაფორმებლად აუცილებლად დაუკავშირდნენ იმ უმაღლეს საგანმანათლებლო დაწესებულებას, სადაც სწავლის უფლება მოიპოვეს.