ეს მნიშვნელოვანია, რომ არ დარჩეთ ჩარიცხვების მიღმა – NAEC-ის ხელმძღვანელი 2025 წლის აბიტურიენტებს აფრთხილებს

ერთიანი ეროვნული გამოცდები 2025 ივლისში დაიწყება და ივლისშივე დასრულდება.

ამის შესახებ შეფასებისა და გამოცდების ეროვნული ცენტრის ხელმძღვანელმა, ნინო წერეთელმა 14 მაისს, პირდაპირ ეთერში ისაუბრა.

ნინო წერეთელი აცხადებს, რომ ყოველ წელს არის ასეულობით აბიტურიენტი, რომლებიც კარგ ქულებს იღებენ, მაგრამ ჩარიცხვების მიღმა რჩებიან, რადგან რეგისტრაციის დროს არ იყენებენ იმ შესაძლებლობას, რაც აქვთ – რაოდენობის განუსაზღვრელად საგანმანათლებლო პროგრამის არჩევა.

“არჩევანი აბიტურიენტებისთვის შეუზღუდავია და ყოველთვის ამას ვეუბნებით პირველი – გამოიყენეთ ეს შესაძლებლობა. სხვათა შორის, შარშან და არამხოლოდ შარშან, დაახლოებით 500-მდე ადამიანი ჩარიცხვების მიღმა დარჩა ერთადერთი მიზეზით…

“მათ არამარტო გადალახეს ზღვარი, არამედ საკმაოდ კარგი ქულები მიიღეს, მაგრამ იმის გამო, რომ მხოლოდ სამი არჩევანი ჰქონდათ [დაფიქსირებული] და კონკურსს არ მიაქციეს ყურადღება, აი, ამიტომ დარჩნენ ჩარიცხვის მიღმა, რაც ჩვენთვისაც გულდასაწყვეტია. უბრალოდ, რომ დაემატებინათ რამდენიმე პროგრამა, ისინი დღეს სტუდენტები იქნებოდნენ. ამიტომ, ეს მნიშვნელოვანია და თან, ეს არჩევანიც [საგანმანათლებლო პროგრამების არჩევა, დამატება, წაშლა] აგვისტოს შუა რიცხვებამდე შეუძლიათ დაამატონ. ასე რომ, გამოიყენონ ეს შესაძლებლობა”, – განაცხადა ნინო წერეთელმა.

ასევე იხილეთ:

განახლებადი ინფორმაცია გამოცდების შესახებ

გაწევრიანდი ჯგუფში “აბი გლუკოზა აბიტურიენტებისთვის” და გაიგე ყველა საჭირო სიახლე