საბაუნიში პირველი სადოქტორო დისერტაციის დაცვა წარმატებით შედგა

სულხან-საბა ორბელიანის უნივერსიტეტის (საბაუნი) ისტორიაში პირველი სადოქტორო დისერტაციის დაცვა წარმატებით შედგა. დოქტორანტმა მაკა ფარცვანიამ წარადგინა სადისერტაციო ნაშრომი აქტუალურ თემაზე – “განახლებადი ენერგიის ბაზარზე სახელმწიფოს კონტროლის სამართლებრივი ფარგლები”.

აღსანიშნავია, რომ დისერტაციას ორი თანახელმძღვანელი ჰყავდა: სულხან-საბა ორბელიანის უნივერსიტეტის პრორექტორი, პროფესორი დიმიტრი გეგენავა და პოლონეთის ლუბლინის უნივერსიტეტის პროფესორი მიხალ დომაგალა, რაც უნივერსიტეტის საერთაშორისო სამეცნიერო კავშირების მაღალ დონეზე მიუთითებს.

სადისერტაციო ნაშრომის განხილვაში მონაწილეობდნენ როგორც საბაუნის პროფესორები, ისე მოწვეული ექსპერტები, რომლებმაც მაღალი შეფასება მისცეს წარმოდგენილ კვლევას. დისერტაციამ დაიმსახურა უმაღლესი შეფასება – Summa Cum Laude.

განსაკუთრებით მნიშვნელოვანია, რომ სადისერტაციო საბჭოს გადაწყვეტილებით, ნაშრომი მონოგრაფიის სახით გამოიცემა, რაც მის მაღალ სამეცნიერო ღირებულებაზე მეტყველებს.
“ეს არის მნიშვნელოვანი მოვლენა არა მხოლოდ ჩვენი უნივერსიტეტის, არამედ ქართული სამეცნიერო სივრცისთვისაც. პირველი სადოქტორო დისერტაციის წარმატებით დაცვა და მისი უმაღლესი შეფასება ადასტურებს საბაუნის სადოქტორო სკოლის მაღალ აკადემიურ სტანდარტებს”, – აღნიშნავენ უნივერსიტეტში.