SANGU-ს გუნდმა კონფერენციაში „ტურიზმი და მწვანე ინვესტიციები“ II ადგილი მოიპოვა

კავკასიის უნივერსიტეტის ტურიზმის სკოლის ორგანიზებით საქართველოში აკრედიტებული უნივერსიტეტების ბაკალავრიატის სტუდენტებისთვის გაიმართა კონფერენცია თემაზე „ტურიზმი და მწვანე ინვესტიციები“, რომელშიც წმ. ანდრიას ქართული უნივერსიტეტის ბიზნესის, კომპიუტინგისა და სოციალურ მეცნიერებათა სკოლის, ბიზნესის ადმინისტრირებისა და ტურიზმის ბიზნესის პროგრამის სტუდენტთა გუნდი „SANGU“ მონაწილეობდა.

გუნდმა წარმატებით გადალახა პირველი ეტაპი, რომელიც საკონფერენციო თემის მომზადებას და შესაბამის პორტალზე ატვირთვას გულისხმობდა. მეორე ეტაპზე სულ 9 გუნდი გავიდა, გუნდ „SANGU“-ს მიერ მომზადებული საკონფერენციო თემა მაღალი ქულით შეაფასდა.

21 მაისს, კავკასიის უნივერსიტეტის საკონფერენციო დარბაზში ჟიურიმ კონფერენციის მეორე ეტაპზე გასულ გუნდთა მოხსენებები მოისმინა. ქართული უნივერსიტეტი ღირსეულად წარსდგა კონფერენციაზე, მეორე ადგილი დაიკავა და შესაბამისი პრიზები გადაეცა.

23 მაისს გამარჯვებულები SANGU-ს რექტორს, პროფესორ ირაკლი ბრაჭულს შეხვდნენ, მან გუნდის წევრებს გამარჯვება მიულოცა, სამახსოვრო საჩუქრები გადასცა და შემდგომი წარმატებები უსურვა.

მერცია სოლოღაშვილი – „მარტის თვეში პროფესორმა ნიკო კვარაცხელიამ მეილის მეშვეობით შეგვატყობინა, რომ კავკასიის უნივერსიტეტში ტარდებოდა კონფერენცია თემაზე „ტურიზმი და მწვანე ინვესტიციები“. მისი რეკომენდაციით გადავწყვიტეთ, დავრეგისტრირებულიყავით, რადგან ვმუშაობდით კვლევაზე – მდგრადი ტურიზმის მიმართულებით და მიღებული გამოცდილება დაგვეხმარებოდა ჩვენი კვლევის წარმოებაში“.

საბა კუკავა – „კონფერენციაზე წარსადგენი თემა ერთობლივად შევარჩიეთ. სამუშაოდ ავირჩიეთ „ინვესტირება ხალხში, პლანეტაში და ეკონომიკურ კეთილდღეობაში“. 2023 წლის მსოფლიო ტურიზმის დღესთან დაკავშირებით მსოფლიო ტურიზმის ორგანიზაციამ დღის წესრიგში სწორედ ეს საკითხები დააყენა და მუშაობა ჩვენც ამ მიმართულებით გადავწყვიტეთ. ბატონ ნიკო კვარაცხელიას რჩევით თბილისის ვერტიკალური გამწვანების საკითხზე მერციამ იმუშავა, რამაც ჟიურის მხრიდან დიდი მოწონება დაიმსახურა“.

მანანა ცირდავა – „კონფერენციისთვის მზადების დროს ძალიან ბევრი ვიშრომეთ, 20 მაისს გვქონდა შეხვედრა ქალბატონ ნინო დამენიასთან, სადაც ყველა დეტალი დაწვრილებით გავიარეთ, ძალიან ვნერვიულობდით, სამწუხაროდ თუ საბედნიეროდ გუნდების ჩამონათვალში სიით ბოლო აღმოვჩნდით, თუმცა დიდი გამოცდილება მივიღეთ, ბევრ რამეს დავაკვირდით და ყველანაირად ვეცადეთ, რომ მიგვეღწია წარმატებისთვის და მივაღწიეთ კიდეც. ჩვენ გამარჯვებაში დიდი წვლილი მიუძღვით ჩვენ ხელმძღვანელებს ქალბატონ ნინო დამენიას და ბატონ ნიკო კვარაცხელიას“.

გუნდ „SANGU“-ს წევრებს: საბა კუკავას, მერცია სოლოღაშვილს, მანანა ცირდავას, ანი არუთინოვს, გიორგი ხარბედიას და გუნდის ხელმძღვანელებს, პროფესორებს: ნინო დამენიას და ნიკო კვარაცხელიას ვულოცავთ გამარჯვებას და ვუსურვებთ შემდგომ წარმატებებს.

უნივერსიტეტის სხვა ამბები