დადგინდა უცხო ქვეყნის უნივერსიტეტებიდან საქართველოში სწავლის გაგრძელების მსურველთა გამოცდის ჩატარების თარიღი

შეფასებისა და გამოცდების ეროვნული ცენტრის (NAEC) მიერ დღეს, 22 აგვისტოს გამოქვეყნებული ინფორმაციით, უცხო ქვეყნების უმაღლესი საგანმანათლებლო დაწესებულებებიდან საქართველოში სწავლის გაგრძელების მსურველი სტუდენტებისთვის ტესტირება 8 სექტემბერს ჩატარდება.

რეგისტრაცია 11:00, გამოცდა კი 12:00 საათზე შეფასებისა და გამოცდების ეროვნულ ცენტრში გაიმართება.

გაითვალისწინეთ: გამოცდაზე დაგვიანების შემთხვევაში გამოსაცდელი ტესტირებაზე აღარ დაიშვება.

NAEC-ის ცნობით, მონაწილემ თან უნდა იქონიოს პირადობის დამადასტურებელი დოკუმენტი ან პასპორტი, სურვილის შემთხვევაში კი, წყალი პლასტმასის ბოთლით. ტესტურ დავალებაზე მუშაობის პროცესში ცენტრი მას შესაბამისი კალმითა და სხვა საჭირო ნივთებით უზრუნველყოფს.

საგამოცდო ტესტი შედგება 3 ნაწილისგან:

• წაკითხულის გააზრება;
• ლოგიკური მსჯელობა;
• რაოდენობრივი მსჯელობა.

ტესტის ნიმუში

თითოეულ ნაწილში გაერთიანებულია 15 არჩევითპასუხებიანი ტესტური დავალება. შესაბამისად, ტესტი სრულად შედგება 45 არჩევითპასუხებიანი ტესტური დავალებისგან. თითოეულ დავალებას აქვს 5 სავარაუდო პასუხი, რომელთაგან მხოლოდ ერთი არის სწორი.

თითოეულ ტესტურ დავალებაზე გაცემული სწორი პასუხი ფასდება 1 ქულით, ხოლო არასწორი პასუხი – 0 ქულით.

გამოცდის წარმატებით ჩაბარება გულისხმობს ტესტისთვის განსაზღვრული მაქსიმალური ქულის 50%-ზე მეტის (მინიმუმ 23 ქულა) დაგროვებას. ტესტირების ხანგრძლივობა 2 საათი და 30 წუთია.

შედეგების ნახვა შესაძლებელი იქნება ვებგვერდზე: online.naec.ge იმ პაროლის გამოყენებით, რომელსაც გამოცდის დღეს ცენტრის თანამშრომელი გადასცემს მონაწილეს.

გამოცდის პროცედურის დადგენილი წესის დარღვევის ფაქტის თაობაზე გამოსაცდელს შეუძლია ცენტრს მიმართოს საპრეტენზიო განაცხადით. საპრეტენზიო განაცხადები გამოცდის დღის 20:00 საათამდე, მისამართზე: ქ. თბილისი, ე. მინდელის N9 მიიღება.