„სკოლა 39 წლის ასაკში, ექსტერნად დავამთავრე და ახლა გამოცდებს ვაბარებ უმაღლესი განათლების მისაღებად“

3 შვილის დედა, მაყვალა გორგაძე, 2024 წლის აბიტურიენტია და უმაღლესი განათლების მიღების მიზნით, ერთიან ეროვნულ გამოცდებს აბარებს.

შეფასებისა და გამოცდების ეროვნული ცენტრის ინფორმაციით, მაყვალამ ატესტატი შარშან, 39 წლის ასაკში აიღო და წელს პირველად აბარებს ერთიან ეროვნულ გამოცდებს ხულოს საგამოცდო ცენტრში.

„ხულოში დავიბადე და გავიზარდე, 16 წელი – დაქორწინებამდე აქ ვცხოვრობდი. ჩემთვის ეს ადგილი მშობლიურია და ხულოს საგამოცდო ცენტრის არჩევაც სწორედ ამიტომ გადავწყვიტე. ისე ბათუმში ვცხოვრობ და გამოცდების წარმატებით დაძლევის შემთხვევაში, ბათუმის უნივერსიტეტში ვგეგმავ ფსიქოლოგიის შესწავლას. ვფიქრობ, ეს პროფესია ხალხთან ურთიერთობაში ძალიან გამომადგება. ახლა პროფესიით ბუღალტერი ვარ. 22 წლის ვიყავი პირველად საბუღალტრო კურსები რომ გავიარე. მას შემდეგ სულ რაღაცას ვსწავლობ და ვიღრმავებ ცოდნას. წლის განმავლობაში, დაახლოებით, 80-მდე მოსწავლე მყავს.

„მინდა იცოდეთ, რომ მზად ვარ, ყველა მსურველს, განსაკუთრებით გოგონებსა და ქალბატონებს, უსასყიდლოდ შევასწავლო ჩემი პროფესია. მიუხედავად იმისა, რომ რეალიზებული ვარ და თავისუფალი დრო თითქმის არ მაქვს, მაინც გადავწყვიტე გამეკეთებინა ის, რაც ადრე ვერ შევძელი – 39 წლის ასაკში ექსტერნად დავამთავრე სკოლა და ახლა გამოცდებს ვაბარებ უმაღლესი განათლების მისაღებად.

„ჩემი მეუღლე მზარეულია, უფროსი ვაჟი ავტომობილების ხელოსანი, შუათანა კი მომავალ წელს აბარებს ერთიან ეროვნულ გამოცდებს და სავარაუდოდ საერთაშორისო სამართლის მიმართულებას აირჩევს. ნაბოლარა მხოლოდ 5 წლისაა და ძალიან ხალისობს იმაზე, რომ დედამისი შარშან მოსწავლე იყო, წელს კი სტუდენტობას გეგმავს“, – ამბობს მაყვალა გორგაძე NAEC-თან საუბარში.

ასევე იხილეთ:

იპოვე შენი თავი EDU.ARIS.GE-ს TikTok-ზე 😘

გაწევრიანდი ჯგუფში “აბი გლუკოზა აბიტურიენტებისთვის” და გაიგე ყველა საჭირო სიახლე

განახლებადი ინფორმაცია გამოცდების შესახებ