97-ე საჯარო სკოლის დირექტორი – სკოლის შენობა სრულად დაცლილია

თბილისის 97-ე საჯარო სკოლის დირექტორი EDU.ARIS.GE-სთან აცხადებს, რომ ამ დროისათვის სკოლის შენობა სრულად არის დაცლილი და ტერიტორია სკოლის ადმინისტრაციის წარმომადგენლებმაც დატოვეს, ვინაიდან ანტიტერორისტული სპეცოპერაცია მიმდებარე ტერიტორიაზე ამ დრომდე გრძელდება.

„სკოლა ამ დროისათვის სრულად დაცლილია ვინაიდან მოგეხსენებათ, რომ ანტიტერორისტული სპეცოპერაცია სწორედ ამ ტერიტორიაზე მიმდინარეობს ამ წუთებშიც. ადგილზე დილიდან იმყოფებოდა სკოლის ადმინისტრაცია, მანდატურის სამსახური და საგანმანათლებლო რესურსცენტრის ხელმძღვანელი. ამ დროისათვის ჩვენც ვტოვებთ სკოლის ტერიტორიას.

„რაც შეეხება მოსწავლეთა გაფრთხილებას, რომ სკოლაში არ მოსულიყვნენ, დავიწყეთ დილით, ადრიანად, დაახლოებით 07:30 საათზე და შედეგად გაფრთხილებულია სკოლის ყველა მოსწავლის მშობელი. ჩვენი სკოლა, შეიძლება ითქვას, რომ სწორედ იმ პერიმეტრზეა განთავსებული, სადაც სპეცოპერაცია მიმდინარეობს“, – განუცხადა EDU.ARIS.GE-ს სკოლის დირექტორმა ქეთევან მეურმიშვილმა.

როგორც EDU.ARIS.GE-ს განათლების სამინისტროში განუმარტეს, სასწავლო პროცესი 97–ე საჯარო სკოლაში დროებით არის შეწყვეტილი და გაცდენილი საათების ანაზღაურება მოსწავლეებს შაბათი დღის ხარჯზე მოუწევთ.

 ანტიტერორისტული სპეცოპერაციის გამო 97–ე საჯარო სკოლაში სასწავლო პროცესი შეწყდა