აწსუ-ში უცხოელი სტუდენტებისთვის ქართველოლოგიის საზაფხულო სკოლა დაიწყო

აკაკი წერეთლის სახელმწიფო უნივერსიტეტი უკვე მეორედ მასპინძლობს ქართველოლოგიის საზაფხულო სკოლას, რომელიც ტარდება ჰუმანიტარულ მეცნიერებათა ფაკულტეტის ქართული ფილოლოგიის დეპარტამენტისა და ქართული ენის მიმართულების ორგანიზებით.

საზაფხულო სკოლის მიზანია, მონაწილეებს გააცნოს ქართველოლოგიის საკითხები, ქართული ენის შესწავლაში დაეხმაროს იმ უცხოელ სტუდენტებს, რომლებიც საზღვარგარეთის უნივერსიტეტებში ეუფლებიან ქართული ენისა და ლიტერატურის სპეციალობას ან სასწავლო კურსს ქართულ ენაში. საზაფხულო სკოლაში მონაწილეობენ თურქეთის რესპუბლიკის სამი უნივერსიტეტის – რიზეს რეჯეფ ტაიფ ერდოღანის უნივერსიტეტის, დუზჯეს უნივერსიტეტისა და ყარსის კავკასიის უნივერსიტეტის – ქართული ენისა და ლიტერატურის სპეციალობის სტუდენტები. საკმაოდ დატვირთული პროგრამის ფარგლებში დაგეგმილია როგორც სასწავლო-საგანმანათლებლო, ისე კულტურული ღონისძიებები.

მონაწილეები ახლოს გაეცნობიან საქართველოს, მის კუთხეებს, ქართველ ხალხსა და ქართულ კულტურას. ქართველოლოგიის საზაფხულო სკოლის გახსნის ღონისძიებაზე დაჯილდოვდნენ საქართველოს სახელმწიფო ენის დღისადმი მიძღვნილ კონკურსებში გამარჯვებული სტუდენტები და სკოლის მოსწავლეები.

უნივერსიტეტის სხვა ამბები