ბედნიერი დედა და აბიტურიენტის ახდენილი სურვილი ქართული ენისა და ლიტერატურის გამოცდაზე

3 ივლისს ზაფხულის საგამოცდო ციებ-ცხელებამ სრული სვლით აიღო სტარტი და 2024 წლის აბიტურიენტები ერთიანი ეროვნული გამოცდების ჩაბარებას შეუდგნენ. მშობლიურ ქართულ ენასა და ლიტერატურაში გამოსაცდელების ტესტირება 5 ივლისს დასრულდა. ახლა აბიტურიენტებს სულ მცირე კიდევ ერთი სავალდებულო (უცხოური ენა) და ერთი არჩევითი გამოცდა აქვთ ჩასაბარებელი.

ქართულის გამოცდების პირველ დღეს EDU.ARIS.GE-მ გამოცდის დაწყებამდე აბიტურიენტებისა და მათი მშობლებისგან არაერთი ვარაუდი მოისმინა მთავარი თემებისა და ავტორების შესახებ.

გავიცანით აბიტურიენტის, ლუკა რატიანის დედაც, რომელმაც გაგვიმხილა, რომ ლუკას დიდი სურვილი იყო გამოცდაზე ვაჟა-ფშაველას პოემიდან მოსვლოდა წერითი დავალება.

“ჩემს შვილს უნდა ვაჟა-ფშაველას პოემა მოუვიდეს, თანახმა იყო ბარათაშვილის “მერანზე”, ელოდება და დიდი სურვილი აქვს, კონსტანტინე გამსახურდიაც, ვნახოთ, როგორ გაგვიმართლებს”, – გვითხრა მშობელმა.

ეს დღე მართლად ახდენილ სურვილად იქცა, მშობლის წინასწარმეტყველება და შვილის სურვილი გამართლდა და ქართული ენისა და ლიტერატურის გამოცდის პირველ ვარიანტში მართლაც ვაჟას “სტუმარ-მასპინძელი” მოვიდა პროგრამულ თემად.

ფაქტით ბედნიერმა დედამ გვითხრა ისიც, რომ შვილის დიდ სიყვარულს ვაჟა-ფშაველას მთიელობას უკავშირებს, რადგან ლუკა სვანური წარმოშობისაა.

“ინტუიციური გათვლა მქონდა ის, რომ ვაჟას პოემები წელს საკმაოდ ხშირად ციტირდება. ბევრი პარალელი იყო ხოლმე თითქმის ყველა თემის ირგვლივ: საზოგადოებაში, სოციუმში. სიმბოლურია, რომ ბოლო ზარზე ვაჟას პორტრეტი გვქონდა დახატული პერანგზე, რადგან ის ჩემი შვილის საყვარელი ავტორია. ასევე, ვფიქრობ, რომ დღევანდელობაში “სტუმარ-მასპინძელის” თემატიკა რაც არის, ზუსტად მიესადაგება ყოველდღიურობას. როდესაც გავიგე, რომ ვაჟა მოვიდა, პირველი ფიქრი ის იყო, რომ ლუკა ნამდვილად შეძლებდა საკუთარი თავის წარმოჩენას მაქსიმალურად კარგად.”

გახარებულ ლუკას EDU.ARIS.GE 39-ე საჯარო სკოლის საგამოცდო ცენტრთან დედასთან ერთად ელოდა. ჩვენ ის გამოცდის დასრულების შემდეგ ჩავწერეთ და მართლაც დავრწმუნდით, რომ ლუკას ვაჟას შემოქმედება განსაკუთრებულად უყვარს:

“ვაჟას ყველაზე მეტად არ ველოდებოდი, მაგრამ ყველაზე მეტად მინდოდა. ძალიან გამიმართლა და კმაყოფილი ვარ. პარალელები ისევ ვაჟას ნაწარმოებებიდან გავავლე, მაგალითად მოვიყვანე “ალუდა ქეთელაური”, – გვითხრა ლუკამ.

ასევე იხილეთ:

იპოვე შენი თავი EDU.ARIS.GE-ს TikTok-ზე 😘

გაწევრიანდი ჯგუფში “აბი გლუკოზა აბიტურიენტებისთვის” და გაიგე ყველა საჭირო სიახლე

განახლებადი ინფორმაცია გამოცდების შესახებ

ავტორები: მარიამ ბარამიძე, EDU.ARIS.GE