CIU – ის მევენახეობა-მეღვინეობის ფაკულტეტის პროფესორი, ლევან უჯმაჯურიძე, აკადემიკოსად აირჩიეს
მევენახეობა-მეღვინეობის ფაკულტეტის პროფესორი, ლევან უჯმაჯურიძე, კავკასიის საერთაშორისო უნივერსიტეტის წარდგინებით, ერთხმად არჩეულია საქართველოს სოფლის მეურნეობის მეცნიერებათა აკადემიის აკადემიკოსად მებაღეობა-მევენახეობის მიმართულებით.
ლევან უჯმაჯურიძე გახლავთ სოფლის მეურნეობის დოქტორი, სსიპ სოფლის მეურნეობის სამეცნიერო-კვლევითი ცენტრის დირექტორი, საერთაშორისო ექსპერტი აგრარული მიმართულებით. საზოგადოება მას კარგად იცნობს, როგორც მევენახეობა-მეღვინეობის პრობლემატიკის ნაყოფიერ მკვლევარს. მას გამოქვეყნებული აქვს 78 სამეცნიერო სტატია, მათ შორის – 12 მონოგრაფია, 1 გამოგონება, 2 პატენტი, რომლებიც მნიშვნელოვანია სამეცნიერო იდეის, კვლევის ახალი მეთოდის, ან მათი პრაქტიკული გამოყენების თვალსაზრისით.
ლევან უჯმაჯურიძე კავკასიის საერთაშორისო უნივერსიტეტში მევენახეობა-მეღვინეობის ფაკულტეტის დაარსების დღიდან (2014 წ.) ამ ფაკულტეტის პროფესორია და ეწევა ნაყოფიერ საგანმანათლებლო საქმიანობას. თავის ღრმა და აკადემიურ ცოდნას გადასცემს ქართული მევენახეობა-მეღვინეობის საბაკალავრო და სამაგისტრო პროგრამის სტუდენტებს, აქტიურად არის ჩართული ფაკულტეტის სამეცნიერო საქმიანობაში და წლების განმავლობაში გაუწია ხელმძღვანელობა არაერთ წარმატებულ სამეცნიერო-კვლევით საგრანტო პროექტს.
კავკასიის საერთაშორისო უნივერსიტეტის ადმინისტრაცია და რექტორატი, მევენახეობა-მეღვინეობის ფაკულტეტი, კოლეგები და სტუდენტები, გულითადად ვულოცავთ ამ საპატიო წოდებას და შემდგომ წარმატებებს ვუსურვებთ ბატონ ლევანს.
- CIU-ს საკალათბურთო კლუბი “CIU BC კავკასია” პლეი-ოფის ნახევარფინალშია by კავკასიის საერთაშორისო უნივერსიტეტი
- კავკასიის საერთაშორისო უნივერსიტეტს ნიაგარას კოლეჯის (კანადა) დელეგაცია ესტუმრა by კავკასიის საერთაშორისო უნივერსიტეტი
- კონკურენტული ინოვაციის ფონდის (CIF) საგრანტო კონკურსში CIU-ს თანამონაწილეობით წარდგენილმა პროექტმა გაიმარჯვა by კავკასიის საერთაშორისო უნივერსიტეტი