CIU-ში საერთაშორისო სამეცნიერო კონფერენცია გაიმართა
![](https://edu.aris.ge/news/wp-content/uploads/2023/02/edu-1-458x257.jpg)
14 თებერვალს კავკასიის საერთაშორისო უნივერსიტეტში საერთაშორისო სამეცნიერო კონფერენცია გაიმართა თემაზე: „თანამედროვე საერთაშორისო უსაფრთხოება და მასიური განადგურების იარაღი – ასიმეტრიული სამხედრო გამოწვევები და რეგიონალური უსაფრთხოების დილემა“.
კონფერენციის თანაორგანიზატორები არიან CIU-ს „ქიმიური, ბიოლოგიური, რადიოლოგიური და ბირთვული საფრთხეების სტრატეგიული კვლევების ინსტიტუტი“ და „მეცნიერებისა და ტექნოლოგიის ცენტრი უკრაინაში (STCU)“.
კონფერენციაზე მისასალმებელი სიტყვით წარდგნენ კავკასიის საერთაშორისო უნივერსიტეტის რექტორი კახაბერ კორძაია, უკრაინული მეცნიერებისა და ტექნოლოგიის ცენტრის კოორდინატორი, პროფესორი მარია ესპონა, პოლონეთის საგანგებო და სრულუფლებიანი ელჩი საქართველოში მარიუშ მაშკიევიჩი და ვეტერანების საქმეთა სახელმწიფო სამსახურის დირექტორი, გენერალ-მაიორი კობა კობალაძე.
ღონისძიებას მოდერატორობას უწევდა პოლიტიკის მეცნიერების დოქტორი, კავკასიის საერთაშორისო უნივერსიტეტისა და ვარშავის უნივერსიტეტის პროფესორი, ვახტანგ მაისაია.
კონფერენციაზე იმსჯელეს ქიმიური, ბიოლოგიური, რადიოლოგიური და ბირთვული საფრთხეების, ორმაგი დანიშნულების ტექნოლოგიის გეოპოლიტიკისა და ასიმეტრიული ომის სტრატეგიების შესახებ.
საერთაშორისო სამეცნიერო კონფერენციის მუშაობაში ჩართული იყვნენ საქართველოს, პოლონეთის, ბელგიის, თურქეთის, ყაზახეთისა და არგენტინის წარმომადგენლები, როგორც სფეროს ექსპერტები/პროფესორები, ისე სტუდენტები.
კონფერენციის გაერთიანებული პლენარული სექცია გაიმართა თემაზე: „ჰიბრიდული საფრთხეები 21-ე საუკუნეში გაუვრცელებლობის რეჟიმის დებულებებთან ერთად“, მოგვიანებით კი სამუშაო პროცესი 2 სექციაში გაგრძელდა: „ასიმეტრიული სამხედრო გამოწვევები საერთაშორისო უსაფრთხოებისთვის: WMD-ის გავრცელება, ორმაგი გამოყენების ტექნოლოგია და ბირთვული ტერორიზმი“ (ექსპერტების/პროფესორების სექცია, ხელმძღვანელი – მარია ესპონა, STCU) და „ჰიბრიდული ომი, სტრატეგიული ვაჭრობის კონტროლი და გაუვრცელებლობის პოლიტიკა: უსაფრთხოების დილემა 21-ე საუკუნეში“ (სტუდენტური სექცია, ხელმძღვანელი – ალიკა გუჩუა, CIU-ს „ქიმიური, ბიოლოგიური, რადიოლოგიური და ბირთვული საფრთხეების სტრატეგიული კვლევების ინსტიტუტის“ დირექტორი).
საერთაშორისო სამეცნიერო კონფერენცია 15 თებერვალს გაეროს უშიშროების საბჭოს მოდელირებითა და სიმულაციური თამაშებით დასრულდება.
-
CIU 2024-2025 სასწავლო წლის შემოდგომის სემესტრისთვის სამაგისტრო პროგრამებზე მიღებას იწყებს – დეტალები by კავკასიის საერთაშორისო უნივერსიტეტი
-
კავკასიის საერთაშორისო უნივერსიტეტი პროფესიულ პროგრამებს განახორციელებს by კავკასიის საერთაშორისო უნივერსიტეტი
-
CIU-ს პროფესიული მომზადებისა და პროფესიული გადამზადების პროგრამების განხორციელების უფლება მიენიჭა by კავკასიის საერთაშორისო უნივერსიტეტი