გამოქვეყნდა ეროვნული სასწავლო ოლიმპიადის მესამე ტურის პირველადი შედეგები და სწორი პასუხები – 2025-2026 სასწავლო წელი

შეფასებისა და გამოცდების ეროვნული ცენტრი (NAEC) 2025-2026 სასწავლო წლის ეროვნული სასწავლო ოლიმპიადის მესამე ტურის პირველად შედეგებს აქვეყნებს.

NAEC-ის მიერ დღეს, 24 მარტს გამოქვეყნებული ინფორმაციით, ოლიმპიადის მონაწილეს შეფასების და ნაშრომის ასლის ნახვა პირადი ნომრის მითითებით შეუძლია, ხოლო სკოლის ადმინისტრაცია მოსწავლეების შედეგებს, ცხრანიშნა და ოთხნიშნა სპეციალური კოდების საშუალებით გაეცნობა.

მესამე ტურში გამარჯვებულია მოსწავლე, რომელმაც შესაბამის საგანში ტესტის მაქსიმალური ქულის არანაკლებ 60% მოიპოვა და საკუთარი კლასისა და საგნის რეიტინგულ სიაში პირველ 10 მონაწილეს შორის მოხვდა.

მოსწავლეს მიღებულ შეფასებასთან დაკავშირებით საპრეტენზიო განაცხადის წარდგენის უფლება აქვს 2026 წლის 25 მარტის 10:00 საათიდან 26 მარტის 18:00 საათამდე შეფასებისა და გამოცდების ეროვნულ ცენტრში ან შესაბამისი რეგიონის საგანმანათლებლო რესურსცენტრში.

საპრეტენზიო კომისიის გადაწყვეტილების შესაბამისად, ოლიმპიადის მონაწილის ნაშრომს შეიძლება მოემატოს ქულა, დააკლდეს ან დარჩეს უცვლელი.

მესამე ტურში გამარჯვებული მოსწავლეები საპრეტენზიო განაცხადების განხილვის შედეგების გათვალისწინებით გამოვლინდებიან.

იხილეთ:

მესამე ტურის ტესტები და სწორი პასუხები, მაქსიმალური ქულები საგნების მიხედვით და საპრეტენზიო განაცხადის ფორმა