განათლების სამინისტროში ახალი დეპარტამენტი შეიქმნა – კომპეტენციები დებულების თანახმად

გიორგი ამილახვარის უწყებაში ახალი, ახალგაზრდობის საქმეთა დეპარტამენტი შექმნა.

პრემიერ-მინისტრ ირაკლი კობახიძის ხელმოწერილი და 13 მარტს გამოქვეყნებული დადგენილების თანახმად, ცვლილება შევიდა საქართველოს განათლების, მეცნიერებისა და ახალგაზრდობის სამინისტროს დებულებაში და ახალი დეპარტამენტის კომპეტენციები განისაზღვრა.

ახალგაზრდობის საქმეთა დეპარტამენტის კომპეტენციები ასე ჩამოყალიბდა:

სახელმწიფო ახალგაზრდული პოლიტიკის შემუშავებასა და განხორციელებაში მონაწილეობა, კოორდინაცია და ანგარიშგება;

ახალგაზრდობის სფეროს, ახალგაზრდული საქმიანობისა და არაფორმალური განათლების განვითარების ხელშეწყობა;

სახელმწიფო ახალგაზრდული პოლიტიკიდან გამომდინარე, ახალგაზრდების განვითარების მხარდაჭერის მიზნით, ადგილობრივ და საერთაშორისო ორგანიზაციებსა და პარტნიორ ქვეყნებთან თანამშრომლობა;

სამინისტროს სტრუქტურულ ერთეულებსა და სამინისტროს მმართველობაში შემავალ საჯარო სამართლის იურიდიულ პირებთან ახალგაზრდულ სფეროს მიკუთვნებულ საკითხებზე თანამშრომლობა და, საჭიროების შემთხვევაში, ამ მიმართულებით მათი საქმიანობის კოორდინაცია;

ახალგაზრდობის სფეროს განვითარებისთვის, გაძლიერებისა და ახალგაზრდების სრულფასოვანი განვითარებისათვის შესაბამისი გარემოს შესაქმნელად კოორდინაციის გაწევა;

ახალგაზრდობის საქმეთა დეპარტამენტის დებულებით გათვალისწინებული სხვა უფლებამოსილებების განხორციელება.

შეგახსენებთ, რომ ახალგაზრდობის მიმართულებისა და ახალგაზრდობის სააგენტოს განათლების სამინისტროსთვის მიერთება 2024 წლის იანვრიდან შევიდა ძალაში.